ୱାଶିଂଟନ୍: ନୋବେଲ ଶାନ୍ତି ପୁରସ୍କାର ନେଇ ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ପୁଣିଥରେ ନିଜ ଦାବି ଉପସ୍ଥାପନ କରିଛନ୍ତି। ବୁଧବାର ଓଭାଲ୍ ଅଫିସ୍‌ରେ ସାମ୍ବାଦିକଙ୍କ ସହ କଥାବାର୍ତ୍ତା ସମୟରେ ଟ୍ରମ୍ପ କହିଛନ୍ତି ଯେ ସେ ୮ଟି ଯୁଦ୍ଧ ସମାଧାନ କରିଛନ୍ତି ଏବଂ ଏପରି କିଛି କାମ କରିଛନ୍ତି, ଯାହା ପୂର୍ବରୁ କୌଣସି ରାଷ୍ଟ୍ରପତି କରିନାହାନ୍ତି। 

ଟ୍ରମ୍ପ କହିଛନ୍ତି, “ମୁଁ ବଢ଼େଇ କହୁନାହିଁ, କେବଳ ତଥ୍ୟ କହୁଛି। କୌଣସି ରାଷ୍ଟ୍ରପତି ବୋଧହୁଏ କେବେ ବି କୌଣସି ଯୁଦ୍ଧ ସମାଧାନ କରିନାହାନ୍ତି। ମୁଁ ୮ଟି ଯୁଦ୍ଧ ସମାଧାନ କରିଛି।” ତାଙ୍କ ଏହି ଦାବି ନୋବେଲ ଶାନ୍ତି ପୁରସ୍କାର ପାଇଁ ତାଙ୍କର ଚାଲୁଥିବା ଅଭିଯାନର ଏକ ଅଂଶ। 

ଆହୁରି ପଢନ୍ତୁ: ଇରାନ ଉପରେ ଆକ୍ରମଣ ପାଇଁ ଆମେରିକା ସେନାକୁ ପ୍ରସ୍ତୁତ ରହିବାକୁ ପେଣ୍ଟାଗନ୍‌ର ନିର୍ଦ୍ଦେଶ, ଟ୍ରମ୍ପ ନେଇନାହାନ୍ତି ଅନ୍ତିମ ନିଷ୍ପତ୍ତି

୨୦୨୬ ନୋବେଲ ଶାନ୍ତି ପୁରସ୍କାରର ଘୋଷଣା ଅକ୍ଟୋବର ୯ରେ ନରୱେଜିଆନ୍ ନୋବେଲ କମିଟି ପକ୍ଷରୁ କରାଯିବ। ଏହା ପୂର୍ବରୁ ଟ୍ରମ୍ପ କହିଛନ୍ତି ଯେ କମିଟି ତାଙ୍କୁ ପୁରସ୍କାର ଦେବ କି ନାହିଁ, ସେ ନିଶ୍ଚିତ ନୁହନ୍ତି। 

ଟ୍ରମ୍ପ ଏହା ମଧ୍ୟ କହିଛନ୍ତି ଯେ ତାଙ୍କର ଶାନ୍ତି ପ୍ରୟାସ ଏପର୍ଯ୍ୟନ୍ତ ଜାରି ରହିଛି ଏବଂ ଆଉ ଏକ ସଂଘର୍ଷ ସମାଧାନ ଦିଗରେ ସେ କାମ କରୁଛନ୍ତି। ରିପୋର୍ଟ ଅନୁଯାୟୀ, ଏହା ଆମେରିକା-ଇରାନ୍ ସଂଘର୍ଷ ଦିଗରେ ତାଙ୍କ ଇଙ୍ଗିତ ହୋଇପାରେ। 

ଟ୍ରମ୍ପ ନିଜ ଦାବିକୁ ନେଇ କହିଛନ୍ତି ଯେ, ଯଦି ତାଙ୍କୁ ପୁରସ୍କାର ଦିଆ ନଯାଏ, ତେବେ ଏହା ନୋବେଲ କମିଟି ପାଇଁ ଏକ ବଡ଼ ଅସମ୍ମାନ ହେବ। ତେବେ ତାଙ୍କ ଦ୍ୱାରା ଉଲ୍ଲେଖ କରାଯାଇଥିବା ୮ଟି ଯୁଦ୍ଧର ସମ୍ପୂର୍ଣ୍ଣ ତାଲିକା ଏହି ରିପୋର୍ଟଗୁଡ଼ିକରେ ଦିଆଯାଇନାହିଁ।