ଓଡ଼ିଶାକୁ ବଡ଼ ବିଦେଶୀ ନିବେଶର ଗନ୍ତବ୍ୟସ୍ଥଳ କରିବା ଲକ୍ଷ୍ୟରେ ରାଜ୍ୟ ସରକାରଙ୍କ ନିବେଶ ଅଭିଯାନ ଜାରି ରହିଛି। ଏହି କ୍ରମରେମୁଖ୍ୟମନ୍ତ୍ରୀ ମୋହନ ଚରଣ ମାଝୀ ମଙ୍ଗଳବାରଠାରୁ ୫ ଦିନିଆ ୟୁନାଇଟେଡ୍ ଆରବ ଏମିରେଟ୍ସ (UAE) ଗସ୍ତରେ ଯାଉଛନ୍ତି।

ଏହି ଗସ୍ତର ମୁଖ୍ୟ ଉଦ୍ଦେଶ୍ୟ ହେଉଛି ୟୁଏଇ ସମେତ ବିଭିନ୍ନ ଦେଶର ନିବେଶକ, ଶିଳ୍ପପତି ଓ ବ୍ୟବସାୟିକ ନେତାଙ୍କୁ ଓଡ଼ିଶାର ନିବେଶ ସୁଯୋଗ ସମ୍ପର୍କରେ ଅବଗତ କରାଇବା ଏବଂ ରାଜ୍ୟକୁ ନୂଆ ନିବେଶ ଆଣିବା।

ମୁଖ୍ୟମନ୍ତ୍ରୀ ପ୍ରଥମେ ନୂଆଦିଲ୍ଲୀ ଯିବେ। ସେଠାରୁ ଆବୁଧାବି ଯାତ୍ରା କରିବେ। ଗସ୍ତ ସମୟରେ ବିଭିନ୍ନ ପ୍ରମୁଖ କମ୍ପାନୀ ଓ ନିବେଶକଙ୍କ ପ୍ରତିନିଧିଙ୍କ ସହ ଏକାଧିକ ବୈଠକ କରି ଓଡ଼ିଶାର ଶିଳ୍ପ ଓ ନିବେଶ ସମ୍ଭାବନା ଉପସ୍ଥାପନ କରିବେ।

🇦🇪 ୟୁଏଇ ନେତୃତ୍ୱ ସହ ଆଲୋଚନା

ସେପ୍ଟେମ୍ବର ୯ରେ ମୁଖ୍ୟମନ୍ତ୍ରୀ IHC, Indian Business and Professional Group ଏବଂ ଏକ ପ୍ରମୁଖ ପେଟ୍ରୋକେମିକାଲ୍ କମ୍ପାନୀର ବରିଷ୍ଠ ପ୍ରତିନିଧିଙ୍କ ସହ ଆଲୋଚନା କରିବେ।

ସେହିଦିନ ଦୁବାଇରେ‘One District One Product’ (ODOP)ଅଭିଯାନ ଅଧୀନରେ ଓଡ଼ିଶାର ବିଭିନ୍ନ ଉତ୍ପାଦକୁ ନେଇ ଆୟୋଜିତ ପ୍ରଦର୍ଶନୀର ଉଦ୍ଘାଟନ କରିବେ।

ସେପ୍ଟେମ୍ବର ୧୦ରେ ୟୁଏଇର ଅର୍ଥନୀତି ଓ ପର୍ଯ୍ୟଟନ ମନ୍ତ୍ରୀଅବଦୁଲ୍ଲା ବିନ୍ ତୌକ୍ ଅଲ୍ ମାରିଙ୍କ ସହ ମୁଖ୍ୟମନ୍ତ୍ରୀ ଆଲୋଚନା କରିବେ। ଏହା ସହ Indian Business and Professional Council ଏବଂ Emirates Global Aluminiumର ନେତୃତ୍ୱ ସହ ମଧ୍ୟ ଆଲୋଚନା ହେବ।

ରିସାଇକ୍ଲିଂ କ୍ଷେତ୍ରରେ ନିବେଶ ନେଇ Middle East Recycling Association ସହ ଏକ round-table ବୈଠକ ମଧ୍ୟ ଅନୁଷ୍ଠିତ ହେବ।

💼 ଦୁବାଇରେ ‘ଓଡ଼ିଶା ଇନଭେଷ୍ଟର୍ସ ମିଟ୍’

ମୁଖ୍ୟମନ୍ତ୍ରୀଙ୍କ ୟୁଏଇ ଗସ୍ତର ଅନ୍ୟତମ ପ୍ରମୁଖ ଆକର୍ଷଣ ହେବସେପ୍ଟେମ୍ବର ୧୧ରେ ଦୁବାଇରେ ଆୟୋଜିତ ‘ଓଡ଼ିଶା ଇନଭେଷ୍ଟର୍ସ ମିଟ୍’।

ଏଥିରେ ଦେଶ ଓ ବିଦେଶର ଉଦ୍ୟୋଗୀ ଏବଂ ନିବେଶକଙ୍କ ସହ ମୁଖ୍ୟମନ୍ତ୍ରୀ ଆଲୋଚନା କରିବେ। ଓଡ଼ିଶାରେ ଉପଲବ୍ଧ ବିଭିନ୍ନ ଶିଳ୍ପ ଓ ନିବେଶ ସୁଯୋଗ ବିଷୟରେ ସେମାନଙ୍କୁ ଅବଗତ କରାଯିବ।

ବିଭିନ୍ନ କ୍ଷେତ୍ରରେ ନୂଆ ନିବେଶ ଆକୃଷ୍ଟ କରିବା ସହ ଆନ୍ତର୍ଜାତିକ ବ୍ୟବସାୟିକ ସହଭାଗିତାକୁ ମଜବୁତ କରିବା ଏହି ବୈଠକର ମୁଖ୍ୟ ଉଦ୍ଦେଶ୍ୟ।

👥 ଓଡ଼ିଆ ପ୍ରବାସୀଙ୍କ ସହ ଆଲୋଚନା

ୟୁଏଇରେ ରହୁଥିବାଓଡ଼ିଆ ପ୍ରବାସୀଙ୍କ ସହ ମଧ୍ୟ ମୁଖ୍ୟମନ୍ତ୍ରୀ ଆଲୋଚନା କରିବେ।ଏହି ସମୟରେ ପ୍ରବାସୀ ଓଡ଼ିଆ ସମୁଦାୟର ସଦସ୍ୟମାନଙ୍କ ସହ ଭାବ ବିନିମୟ କରିବେ।

ଓଡ଼ିଶାକୁ ଏକ ପ୍ରମୁଖ ଶିଳ୍ପ ଓ ନିବେଶ କେନ୍ଦ୍ର ଭାବେ ଗଢ଼ି ତୋଳିବା ପାଇଁ ରାଜ୍ୟ ସରକାର ଲଗାତାର ନିବେଶ ଅଭିଯାନ ଚଳାଇଛନ୍ତି। ଏହା ପୂର୍ବରୁ ସିଙ୍ଗାପୁର ସମେତ ଅନ୍ୟାନ୍ୟ ସ୍ଥାନରେ ମଧ୍ୟ ନିବେଶକଙ୍କ ସହ ଆଲୋଚନା ହୋଇଛି।

ମୁଖ୍ୟମନ୍ତ୍ରୀଙ୍କ ୟୁଏଇ ଗସ୍ତ ମାଧ୍ୟମରେବଡ଼ ମାପର ନିବେଶ ଆସିବା ସହ ରାଜ୍ୟର ଶିଳ୍ପ ବିକାଶ ଓ ନୂଆ ନିଯୁକ୍ତି ସୁଯୋଗ ବଢ଼ିବାର ଆଶା କରାଯାଉଛି।