ଭୁବନେଶ୍ୱର: ରାଜଧାନୀ କଲେଜରେ ୨୦୨୬-୨୭ ଶିକ୍ଷାବର୍ଷ ପାଇଁ ଛାତ୍ର ସଂସଦ ନିର୍ବାଚନର ପ୍ରସ୍ତୁତି ଆରମ୍ଭ ହୋଇଛି। କଲେଜର ପ୍ରିନ୍ସିପାଲଙ୍କ ପକ୍ଷରୁ ଅକ୍ଟୋବର ୭ ତାରିଖରେ ଜାରି ନିର୍ବାଚନ ନୋଟିସ୍ରେ ବିଭିନ୍ନ ପଦବୀ ଓ ନିର୍ବାଚନ ପ୍ରକ୍ରିୟାର ସମୟସୂଚୀ ପ୍ରକାଶ କରାଯାଇଛି।

କେଉଁ ପଦବୀ ପାଇଁ ହେବ ନିର୍ବାଚନ?

ଛାତ୍ର ସଂସଦରେ ନିମ୍ନଲିଖିତ ପଦବୀ ପାଇଁ ନିର୍ବାଚନ ହେବ—

• ସଭାପତି

• ଉପସଭାପତି

• ସମ୍ପାଦକ

• ସହକାରୀ ସମ୍ପାଦକ

• ପ୍ରତ୍ୟେକ ଶ୍ରେଣୀରୁ ଜଣେ କ୍ଲାସ୍ ପ୍ରତିନିଧି

ଏହା ସହିତ ଡ୍ରାମା କ୍ଲବ୍, ଆଥଲେଟିକ୍ ଆସୋସିଏସନ୍, ଡେ ସ୍କଲାର୍ସ ଆସୋସିଏସନ୍, ସୋସିଆଲ୍ ସର୍ଭିସ୍ ଗିଲ୍ଡ ଏବଂ ଛାତ୍ର କମନ୍ ରୁମ୍ (ବାଳକ ଓ ବାଳିକା) ପାଇଁ ମଧ୍ୟ ବିଭିନ୍ନ ପଦବୀରେ ନିର୍ବାଚନ ହେବ।

ନୋଟିସ୍ ଅନୁସାରେ ଡେ ସ୍କଲାର୍ସ ଆସୋସିଏସନ୍ରେ ହଷ୍ଟେଲରେ ରହୁଥିବା ଛାତ୍ରଛାତ୍ରୀ ପ୍ରାର୍ଥୀ ହୋଇପାରିବେ ନାହିଁ କିମ୍ବା ଭୋଟ ଦେଇପାରିବେ ନାହିଁ।

ଅକ୍ଟୋବର ୯ରେ ନାମାଙ୍କନ

ରାଜଧାନୀ କଲେଜର ନିର୍ବାଚନ ସୂଚୀ ଅନୁସାରେ ଅକ୍ଟୋବର ୯ ତାରିଖ ସକାଳ ୧୦ଟାରୁ ଦିନ ୧ଟା ପର୍ଯ୍ୟନ୍ତ ନାମାଙ୍କନ ଦାଖଲ କରାଯିବ। ସେହିଦିନ ଦିନ ୨ଟାରୁ ୪ଟା ପର୍ଯ୍ୟନ୍ତ ନାମାଙ୍କନପତ୍ର ଯାଞ୍ଚ ହେବ। ସନ୍ଧ୍ୟା ୫ଟାରେ ବୈଧ ନାମାଙ୍କନ ତାଲିକା ପ୍ରକାଶ ପାଇବ।

ଅକ୍ଟୋବର ୧୦ ତାରିଖ ସକାଳ ୧୦ଟାରୁ ଦିନ ୧ଟା ପର୍ଯ୍ୟନ୍ତ ପ୍ରାର୍ଥୀମାନେ ନାମାଙ୍କନ ପ୍ରତ୍ୟାହାର କରିପାରିବେ। ସେହିଦିନ ଅପରାହ୍ନ ୩ଟାରେ ଚୂଡ଼ାନ୍ତ ପ୍ରାର୍ଥୀ ତାଲିକା ପ୍ରକାଶ ହେବ।

୧୪ରେ ‘Why I Stand For’, ୧୫ରେ ଭୋଟ

ଅକ୍ଟୋବର ୧୪ ତାରିଖ ସକାଳ ୧୦ଟାରେ ପ୍ରାର୍ଥୀମାନଙ୍କ ‘Why I Stand For’ ବୈଠକ ହେବ। ଏହା ପରେ ଅପରାହ୍ନ ୨ଟାରୁ ନିର୍ବାଚନ ପ୍ରଚାର ସମ୍ପର୍କିତ ପ୍ରକ୍ରିୟା ରହିଛି।

ଅକ୍ଟୋବର ୧୫ ତାରିଖ ସକାଳ ୮ଟାରୁ ଦିନ ୨ଟା ପର୍ଯ୍ୟନ୍ତ ମତଦାନ ହେବ। ମତଦାନ ଶେଷ ହେବା ପରେ ଅପରାହ୍ନ ୨ଟାରୁ ଭୋଟ ଗଣତି ଆରମ୍ଭ ହୋଇ ଫଳାଫଳ ଘୋଷଣା ହେବ।

ଅକ୍ଟୋବର ୧୬ ତାରିଖ ସକାଳ ୧୧ଟାରେ ନିର୍ବାଚିତ ପ୍ରତିନିଧିମାନଙ୍କ ଶପଥ ଗ୍ରହଣ ସମାରୋହ ଅନୁଷ୍ଠିତ ହେବ।

ରାଜ୍ୟରେ ୮ ବର୍ଷ ପରେ ଛାତ୍ର ନିର୍ବାଚନ

ରାଜଧାନୀ କଲେଜ ସହ ଓଡ଼ିଶାର ବିଭିନ୍ନ ସରକାରୀ, ସରକାରୀ ସହାୟତାପ୍ରାପ୍ତ କଲେଜ ଓ ରାଜ୍ୟର ସରକାରୀ ବିଶ୍ୱବିଦ୍ୟାଳୟରେ ଅକ୍ଟୋବର ୧୫ରେ ଛାତ୍ର ସଂସଦ ନିର୍ବାଚନ ହେବ। ଦୀର୍ଘ ୮ ବର୍ଷ ପରେ କ୍ୟାମ୍ପସ୍ ନିର୍ବାଚନ ଫେରୁଥିବାରୁ ବିଭିନ୍ନ କଲେଜରେ ଛାତ୍ରନେତା ଓ ଆଶାୟୀ ପ୍ରାର୍ଥୀମାନେ ଛାତ୍ରଛାତ୍ରୀଙ୍କ ସହ ଯୋଗାଯୋଗ ବଢ଼ାଇଛନ୍ତି।

ରାଜ୍ୟ ସରକାରଙ୍କ ନିର୍ଦ୍ଧାରିତ ସୂଚୀ ଅନୁସାରେ ଅକ୍ଟୋବର ୭ରେ ନିର୍ବାଚନ ନୋଟିସ୍, ୯ରେ ନାମାଙ୍କନ, ୧୦ରେ ଚୂଡ଼ାନ୍ତ ପ୍ରାର୍ଥୀ ତାଲିକା, ୧୪ରେ ‘Why I Stand For’ ବୈଠକ ଏବଂ ୧୫ରେ ମତଦାନ ଓ ଫଳାଫଳ ଘୋଷଣା କରାଯିବ।

ରାଜଧାନୀ କଲେଜରେ ମଧ୍ୟ ଏହି ନିର୍ବାଚନୀ ପ୍ରକ୍ରିୟାକୁ ନୋଟିସ୍ ଅନୁସାରେ କାର୍ଯ୍ୟକାରୀ କରାଯାଉଛି। ଏବେ ପ୍ରାର୍ଥୀ ଚୟନ ଓ ନିର୍ବାଚନୀ ପ୍ରସ୍ତୁତିକୁ ନେଇ କଲେଜ ପରିସରରେ ଚଳଚଞ୍ଚଳତା ବଢ଼ିବା ଆଶା କରାଯାଉଛି।