ବିଶ୍ୱ ବଜାରରେ ଅଶୋଧିତ ତୈଳ ଦରକୁ ନେଇ ଆସିଛି ବଡ଼ ଖବର। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଇରାନ ଉପରେ ତତ୍କାଳ ସାମରିକ ଆକ୍ରମଣର ଆବଶ୍ୟକତା ନଥିବା ସଙ୍କେତ ଦେବା ପରେ ଅନ୍ତର୍ଜାତୀୟ ବଜାରରେ ଅଶୋଧିତ ତୈଳ ଦର ହ୍ରାସ ପାଇଛି। ମଧ୍ୟପ୍ରାଚ୍ୟରୁ ତୈଳ ଯୋଗାଣ ବାଧାପ୍ରାପ୍ତ ହେବା ନେଇ ରହିଥିବା ଆଶଙ୍କା କମିବାରୁ ଲଗାତାର ଦ୍ୱିତୀୟ ଦିନ ପାଇଁ ତୈଳ ଦର ତଳମୁହାଁ ହୋଇଛି।

ମଙ୍ଗଳବାର ସକାଳ ୦୧:୦୨ GMT ସୁଦ୍ଧା ବ୍ରେଣ୍ଟ କ୍ରୁଡ୍ ଫ୍ୟୁଚର୍ସ ବ୍ୟାରେଲ୍ ପିଛା ୨୪ ସେଣ୍ଟ୍ ବା ୦.୨୩ ପ୍ରତିଶତ ହ୍ରାସ ପାଇ ୯୨.୩୩ ଡଲାରରେ ପହଞ୍ଚିଛି। ସେହିପରି ଆମେରିକୀୟ ୱେଷ୍ଟ ଟେକ୍ସାସ୍ ଇଣ୍ଟରମିଡିଏଟ୍ (WTI) ତୈଳ ଦର ୩୫ ସେଣ୍ଟ୍ ବା ୦.୪୦ ପ୍ରତିଶତ ହ୍ରାସ ପାଇ ବ୍ୟାରେଲ୍ ପିଛା ୮୬.୫୦ ଡଲାର ହୋଇଛି ।

ସୋମବାର ମଧ୍ୟ ବ୍ରେଣ୍ଟ କ୍ରୁଡ୍ ଦରରେ ୫.୮୫ ପ୍ରତିଶତ ହ୍ରାସ ଘଟିଥିଲା। ଏହା ଅଗଷ୍ଟ ୩୧ ପରଠାରୁ ସର୍ବନିମ୍ନ ସ୍ତରକୁ ଖସିଥିଲା ।

ଟ୍ରମ୍ପଙ୍କ ସଙ୍କେତ ପରେ ତୈଳ ବଜାରରେ ଆଶ୍ୱସ୍ତି

ସୋମବାର ଟ୍ରମ୍ପ କହିଥିଲେ ଯେ ବର୍ତ୍ତମାନ ପାଇଁ ଇରାନ ଉପରେ ନୂଆ ସାମରିକ ଆକ୍ରମଣ କରିବାର ଆବଶ୍ୟକତା ନାହିଁ। ମଧ୍ୟପ୍ରାଚ୍ୟର କିଛି ଦେଶର ଅନୁରୋଧ ପରେ ସେ ଏହି ନିଷ୍ପତ୍ତି ନେଇଥିବା କହିଛନ୍ତି। ଏଥିରେ ହ୍ୱାଇଟ୍ ହାଉସ୍‌ରେ ଆଲୋଚନା ସମୟରେ କତାର ପ୍ରଧାନମନ୍ତ୍ରୀଙ୍କ ଅନୁରୋଧ ମଧ୍ୟ ସାମିଲ ଥିଲା । 

ତେବେ ଇରାନ ସହ ଉତ୍ତେଜନା କମାଇବାର ସଙ୍କେତ ଦେଇଥିଲେ ମଧ୍ୟ ହର୍ମୁଜ୍ ପ୍ରଣାଳୀରେ ଆମେରିକାର ନୌସେନା ଅବରୋଧ ଜାରି ରହିବ ବୋଲି ଟ୍ରମ୍ପ ସ୍ପଷ୍ଟ କରିଛନ୍ତି ।

KCM Tradeର ମୁଖ୍ୟ ବଜାର ବିଶ୍ଳେଷକ ଟିମ୍ ୱାଟରରଙ୍କ ମତରେ, ଇରାନ ପ୍ରତି ଟ୍ରମ୍ପଙ୍କ ନରମ ଆଭିମୁଖ୍ୟକୁ ବଜାର ସକାରାତ୍ମକ ଭାବେ ଗ୍ରହଣ କରିଛି। ତେବେ ହର୍ମୁଜ୍ ପ୍ରଣାଳୀ ନିକଟରେ ଜାହାଜ ଉପରେ ଆକ୍ରମଣ ଜାରି ରହିଥିବା ସତ୍ତ୍ୱେ ପରିସ୍ଥିତି ଏତେ ଖରାପ ହୋଇନାହିଁ ଯେ ତୈଳ ଦରରେ ପୁଣି ବଡ଼ ଅତିରିକ୍ତ ବୃଦ୍ଧି ଘଟିବ ।

ଶାନ୍ତି ଆଲୋଚନା ନେଇ ଏବେ ବି ଅନିଶ୍ଚିତତା

ଆମେରିକା ଓ ଇରାନ ମଧ୍ୟରେ ଖୁବ୍‌ଶୀଘ୍ର ଶାନ୍ତି ଚୁକ୍ତି ହେବା ନେଇ ଆମେରିକା ଓ ଉପସାଗରୀୟ ଦେଶଗୁଡ଼ିକର କିଛି ବରିଷ୍ଠ ଅଧିକାରୀ ସନ୍ଦେହ ପ୍ରକାଶ କରିଛନ୍ତି ।

ଇରାନର ସୁରକ୍ଷା ପରିଷଦ ମୁଖ୍ୟ ମୋହସେନ୍ ରେଜାଇ ଆଲୋଚନା ଚାଲିଥିବା ଖବରକୁ ଖଣ୍ଡନ କରିଛନ୍ତି । ଆମେରିକା କାଳ୍ପନିକ ଆଲୋଚନା ସମ୍ପର୍କରେ ମିଥ୍ୟା ଖବର ପ୍ରଚାର ବନ୍ଦ କରୁ ବୋଲି ସେ କହିଛନ୍ତି। ଏଥିସହ ଇରାନ ପୂର୍ବରୁ ରଖିଥିବା ସାତଟି ସର୍ତ୍ତ ମାନିବାକୁ ଆମେରିକାକୁ ଆହ୍ୱାନ ଦେଇଛନ୍ତି ।

ଅକ୍ଟୋବରରେ ବଢ଼ିଲା OPECର ତୈଳ ଉତ୍ପାଦନ

ଅନ୍ୟପଟେ ତୈଳ ଯୋଗାଣ କ୍ଷେତ୍ରରେ OPECର ଉତ୍ପାଦନ ଅକ୍ଟୋବର ମାସରେ ବୃଦ୍ଧି ପାଇଛି। ରଏଟର୍ସର ଏକ ସର୍ଭେ ଅନୁସାରେ ସାଉଦି ଆରବ, କୁଏତ୍ ଓ ଇରାକ୍‌ରେ ଅଧିକ ଉତ୍ପାଦନ ଯୋଗୁଁ ଏହି ବୃଦ୍ଧି ହୋଇଛି। ତେବେ ରପ୍ତାନି କ୍ଷେତ୍ରରେ ଏବେ ବି କିଛି ପ୍ରତିବନ୍ଧକ ରହିଛି ।

ଏହା ସହିତ ରୁଷିଆ ଓ ୟୁକ୍ରେନ୍ ମଧ୍ୟରେ ଆମେରିକାର ମଧ୍ୟସ୍ଥତାରେ ମଙ୍ଗଳବାରଠାରୁ ଦୁଇ ଦିନିଆ ଆଲୋଚନା ହେବାର କାର୍ଯ୍ୟକ୍ରମ ରହିଛି। ଫେବୃଆରୀ ପରେ ଏହା ଉଭୟ ଦେଶ ମଧ୍ୟରେ ପ୍ରଥମ ଆଲୋଚନା ହେବ। ଏହି ଆଲୋଚନାରେ ୟୁରୋପର ସୁରକ୍ଷା ପ୍ରସଙ୍ଗ ମଧ୍ୟ ସାମିଲ ହୋଇପାରେ ।

ତେଣୁ ମଧ୍ୟପ୍ରାଚ୍ୟର ରାଜନୈତିକ ପରିସ୍ଥିତି ଓ ଅନ୍ତର୍ଜାତୀୟ ଶାନ୍ତି ଆଲୋଚନା ଉପରେ ଏବେ ବିଶ୍ୱ ତୈଳ ବଜାରର ନଜର ରହିଛି ।