ପୁରୀ: ମହାପ୍ରଭୁ ଶ୍ରୀଜଗନ୍ନାଥଙ୍କ ମହାପ୍ରସାଦ ହେଉଛି କୋଟି କୋଟି ଓଡ଼ିଆଙ୍କ ଆସ୍ଥା ଓ ବିଶ୍ୱାସର ପ୍ରତୀକ। ଏହି ପବିତ୍ର ମହାପ୍ରସାଦର ବିକ୍ରିକୁ ନେଇ ଏବେ ପୁରୀ ଶ୍ରୀମନ୍ଦିରରେ ଦେଖାଦେଇଛି ନୂଆ ବିବାଦ। ଆନନ୍ଦ ବଜାର ବାହାରେ ଅବଢ଼ା ବିକ୍ରି ହେଉଥିବା ଅଭିଯୋଗ ପରେ ଭକ୍ତ ଓ ସେବାୟତଙ୍କ ମଧ୍ୟରେ ଅସନ୍ତୋଷ ବଢ଼ିଛି।

ସୂଚନା ଅନୁସାରେ, ଶ୍ରୀମନ୍ଦିରର ଉତ୍ତର ଦ୍ୱାର ନିକଟରେ କେତେକ ବ୍ୟକ୍ତି ଶାଳପତ୍ରରେ ମହାପ୍ରସାଦ ବିକ୍ରି କରୁଥିବା ଅଭିଯୋଗ ହୋଇଛି। ଶ୍ରୀମନ୍ଦିର ଭିତରେ ଥିବା ଆନନ୍ଦ ବଜାର ହେଉଛି ମହାପ୍ରସାଦ ବିକ୍ରିର ନିର୍ଦ୍ଦିଷ୍ଟ ସ୍ଥାନ। ଏଠାରେ ସୁଆର ଓ ମହାସୁଆର ନିଯୋଗର ବ୍ୟବସ୍ଥା ଅନୁସାରେ ମହାପ୍ରସାଦ ଉପଲବ୍ଧ ହୋଇଥାଏ।

କିନ୍ତୁ ଆନନ୍ଦ ବଜାର ବାହାରେ ଏଭଳି ବିକ୍ରି କିଏ କରୁଛି ଏବଂ କାହା ଅନୁମତିରେ ଏହା ଚାଲିଛି, ତାହାକୁ ନେଇ ଉଠିଛି ପ୍ରଶ୍ନ। ଏଥିପାଇଁ ଶ୍ରୀମନ୍ଦିର ପ୍ରଶାସନ ଓ ସୁଆର ମହାସୁଆର ନିଯୋଗର ଭୂମିକା ଉପରେ ମଧ୍ୟ ଆଲୋଚନା ଜୋର ଧରିଛି।

ଅନ୍ୟପଟେ କେତେକ ଭକ୍ତ ଅଭିଯୋଗ କରିଛନ୍ତି ଯେ, ଆନନ୍ଦ ବଜାର ବାହାରେ ମହାପ୍ରସାଦ କିଣୁଥିବା ଲୋକଙ୍କଠାରୁ ଅଧିକ ଦାମ୍ ନିଆଯାଉଛି। ଏହାଦ୍ୱାରା ଭକ୍ତମାନେ ଠକାମିର ଶିକାର ହେବାର ଆଶଙ୍କା ରହିଛି।

ଏହି ଘଟଣାକୁ ନେଇ ଜଗନ୍ନାଥପ୍ରେମୀମାନେ ତୁରନ୍ତ ତଦନ୍ତ କରିବା ସହ ଉତ୍ତର ଦ୍ୱାର ଓ ମନ୍ଦିରର ଅନ୍ୟ ପ୍ରବେଶ ପଥ ନିକଟରେ ନଜରଦାରୀ ବଢ଼ାଇବାକୁ ଦାବି କରିଛନ୍ତି। ଏଥିସହ ଅନଧିକୃତ ଭାବେ ମହାପ୍ରସାଦ ବିକ୍ରି କରୁଥିବା ବ୍ୟକ୍ତିଙ୍କ ବିରୋଧରେ ଉଚିତ୍ ପଦକ୍ଷେପ ନେବାକୁ ମଧ୍ୟ ଦାବି ହୋଇଛି।

ମହାପ୍ରଭୁଙ୍କ ମହାପ୍ରସାଦର ମର୍ଯ୍ୟାଦା ଓ ପବିତ୍ରତା ରକ୍ଷା କରିବା ସହ ଭକ୍ତଙ୍କ ସ୍ୱାର୍ଥ ସୁରକ୍ଷା କରିବା ଏବେ ଶ୍ରୀମନ୍ଦିର ପ୍ରଶାସନ ପାଇଁ ଏକ ବଡ଼ ଆହ୍ୱାନ ପାଲଟିଛି।