ନୂଆଦିଲ୍ଲୀ: ଦୀପାବଳି ପରେ ଦିଲ୍ଲୀ-NCRରେ ବାୟୁ ପ୍ରଦୂଷଣ ସ୍ଥିତି ଭୟଙ୍କର ରୂପ ନେବାରେ ଲାଗିଛି। ବିଷାକ୍ତ ଧୂଆଁ ଓ ଘନ କୁହୁଡ଼ିରେ ଅଣନିଃଶ୍ୱାସୀ ହୋଇପଡ଼ିଛନ୍ତି ଲୋକେ। ବାୟୁ ଗୁଣବତ୍ତା ସୂଚକାଙ୍କ (AQI) ୪୦୦ ନିକଟରେ ପହଞ୍ଚିବା ପରେ ଅଭିଭାବକଙ୍କ ମଧ୍ୟରେ ପିଲାଙ୍କ ସ୍ୱାସ୍ଥ୍ୟ ଓ ସ୍କୁଲ ଖୋଲା ରହିବାକୁ ନେଇ ଚିନ୍ତା ବଢ଼ିଛି।

ସ୍କୁଲ ବନ୍ଦ ହେବ ନା ଅନଲାଇନ୍ରେ ହେବ ପାଠପଢ଼ା?

ବଢ଼ୁଥିବା ପ୍ରଦୂଷଣକୁ ଦୃଷ୍ଟିରେ ରଖି ଦିଲ୍ଲୀ ସରକାର ପଞ୍ଚମ ଶ୍ରେଣୀ ପର୍ଯ୍ୟନ୍ତ ପିଲାଙ୍କ ପାଇଁ ହାଇବ୍ରିଡ୍ ଶିକ୍ଷା ବ୍ୟବସ୍ଥା ଲାଗୁ କରିଛନ୍ତି। ଏହି ବ୍ୟବସ୍ଥାରେ ଛାତ୍ରଛାତ୍ରୀ ଚାହିଁଲେ ସ୍କୁଲକୁ ଯାଇ ପାଠ ପଢ଼ିପାରିବେ କିମ୍ବା ଅନଲାଇନ୍ରେ କ୍ଲାସ୍ କରିପାରିବେ।

ଦିଲ୍ଲୀ ସମେତ ନୋଏଡା, ଗାଜିଆବାଦ, ଗୁରୁଗ୍ରାମ ଓ ଫରିଦାବାଦ ଭଳି NCR ଅଞ୍ଚଳରେ ମଧ୍ୟ ଛୋଟ ପିଲାଙ୍କ ପାଇଁ ଏହି ବ୍ୟବସ୍ଥା ଲାଗୁ କରାଯାଇଛି।

ତେବେ ଏହାର ଅର୍ଥ ସମସ୍ତ ସ୍କୁଲ ବନ୍ଦ ହେବା ନୁହେଁ। ଏପର୍ଯ୍ୟନ୍ତ ସମସ୍ତ ସ୍କୁଲ ବନ୍ଦ ରଖିବା ନେଇ କୌଣସି ସାଧାରଣ ସରକାରୀ ନିର୍ଦ୍ଦେଶ ଆସିନାହିଁ। ଷଷ୍ଠରୁ ଦ୍ୱାଦଶ ଶ୍ରେଣୀ ପାଇଁ ମଧ୍ୟ ଏହି ନିର୍ଦ୍ଦେଶ ଲାଗୁ ହୋଇନାହିଁ।

କେତେ ରହିଛି ଦିଲ୍ଲୀର AQI?

ନଭେମ୍ବର ୮ ରାତି ୧୧ଟା ୫ ମିନିଟ୍ ସମୟରେ ଦିଲ୍ଲୀର ସାମଗ୍ରିକ AQI ୩୭୩ ରେକର୍ଡ ହୋଇଥିଲା। ଏହା 'ଅତି ଖରାପ' ବର୍ଗରେ ରହିଥିଲା। ଅନ୍ୟପଟେ ନଭେମ୍ବର ୯ ଭୋର ପ୍ରାୟ ୪ଟା ୨୦ ମିନିଟ୍ରେ ଦିଲ୍ଲୀର ITO ଅଞ୍ଚଳର AQI ୪୦୬ ରେକର୍ଡ ହୋଇଥିଲା, ଯାହା 'ଗମ୍ଭୀର' ବର୍ଗରେ ଆସୁଛି।

ଗାଜିଆବାଦରେ AQI ୩୬୦, ନୋଏଡାରେ ୩୧୯, ଫରିଦାବାଦରେ ୨୯୭ ଏବଂ ଗୁରୁଗ୍ରାମରେ ୨୮୦ ରେକର୍ଡ ହୋଇଥିବା ରିପୋର୍ଟ ରହିଛି।

କାହିଁକି ବଢ଼ୁଛି ପ୍ରଦୂଷଣ?

ଦୀପାବଳିରେ ବାଣ ଫୁଟାଇବା ଯୋଗୁଁ ବାୟୁରେ ଧୂଆଁ ଓ କ୍ଷତିକାରକ କଣିକାର ମାତ୍ରା ବଢ଼ିଛି। ଏହା ସହିତ ଗାଡ଼ିମୋଟରର ଧୂଆଁ, ନିର୍ମାଣ କାର୍ଯ୍ୟରୁ ସୃଷ୍ଟି ହେଉଥିବା ଧୂଳି ଏବଂ ପଡ଼ୋଶୀ ରାଜ୍ୟରେ ନଡ଼ା ଜଳାଇବା ମଧ୍ୟ ପ୍ରଦୂଷଣର ପ୍ରମୁଖ କାରଣ ପାଲଟିଛି।

ଏହା ସହିତ ପବନର ବେଗ କମ୍ ରହିବା ଏବଂ ପାଣିପାଗ ଅନୁକୂଳ ନ ହେବାରୁ ବାୟୁମଣ୍ଡଳରେ ପ୍ରଦୂଷିତ କଣିକା ଜମା ହୋଇ ରହୁଛି।

GRAP-3 ଲାଗୁ, ଅନେକ କଟକଣା ଜାରି

ପ୍ରଦୂଷଣ ନିୟନ୍ତ୍ରଣ ପାଇଁ ଦିଲ୍ଲୀ-NCRରେ GRAP-3 କଟକଣା ଲାଗୁ କରାଯାଇଛି। ଏହା ଅନୁସାରେ ଧୂଳି ସୃଷ୍ଟି କରୁଥିବା ଅନେକ ନିର୍ମାଣ ଓ ଭଙ୍ଗା କାର୍ଯ୍ୟ ଉପରେ ରୋକ୍ ଲଗାଯାଇଛି। ଏହାସହିତ ନିର୍ଦ୍ଦିଷ୍ଟ ଅଞ୍ଚଳରେ BS-III ପେଟ୍ରୋଲ ଏବଂ BS-IV ଡିଜେଲ୍ ଚାରିଚକିଆ ଗାଡ଼ି ଚଳାଚଳ ଉପରେ ମଧ୍ୟ କଟକଣା ଲାଗିଛି।

ତେଣୁ ଅଭିଭାବକମାନେ ସ୍କୁଲ ପକ୍ଷରୁ ଆସୁଥିବା ନୂଆ ନିର୍ଦ୍ଦେଶ ଉପରେ ନଜର ରଖିବା ସହ ପିଲାଙ୍କ ସ୍ୱାସ୍ଥ୍ୟ ପ୍ରତି ସତର୍କ ରହିବା ଆବଶ୍ୟକ।