ନୂଆଦିଲ୍ଲୀ: ଅନ୍ତର୍ଜାତୀୟ ବଜାରରେ ଅଶୋଧିତ ତୈଳ ଦର ହ୍ରାସ ପାଇଛି। ସୋମବାର କାରବାର ଆରମ୍ଭରୁ ବ୍ରେଣ୍ଟ କ୍ରୁଡ୍ ଅଏଲ୍ ଦର ବ୍ୟାରେଲ ପିଛା ୧ ଡଲାରରୁ ଅଧିକ ଖସିଥିଲା। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଇରାନ ବିରୋଧରେ ନୂଆ ସାମରିକ ଆକ୍ରମଣର ସମ୍ଭାବନା କମ୍ ଥିବା ସଙ୍କେତ ଦେବା ପରେ ତୈଳ ବଜାରରେ ଏହାର ପ୍ରଭାବ ଦେଖାଯାଇଛି।

ବ୍ରେଣ୍ଟ କ୍ରୁଡ୍ ଅଏଲ୍ ଫ୍ୟୁଚର୍ସ ୫୨ ସେଣ୍ଟ ବା ୦.୫୩ ପ୍ରତିଶତ ହ୍ରାସ ପାଇ ବ୍ୟାରେଲ ପିଛା ୯୭.୮୦ ଡଲାରରେ ପହଞ୍ଚିଥିଲା। ସେହିପରି ଆମେରିକାର ୱେଷ୍ଟ ଟେକ୍ସାସ୍ ଇଣ୍ଟରମିଡିଏଟ୍ (WTI) ଅଶୋଧିତ ତୈଳ ଦର ୧୫ ସେଣ୍ଟ ବା ୦.୧୭ ପ୍ରତିଶତ ହ୍ରାସ ପାଇ ବ୍ୟାରେଲ ପିଛା ୯୦.୬୮ ଡଲାରରେ କାରବାର କରିଥିଲା।

ଇରାନ ସହ ଚୁକ୍ତି ହେଲେ ଆକ୍ରମଣର ସମ୍ଭାବନା କମ୍: ଟ୍ରମ୍ପ

CNNକୁ ଦେଇଥିବା ଏକ ଟେଲିଫୋନ୍ ସାକ୍ଷାତକାରରେ ଡୋନାଲ୍ଡ ଟ୍ରମ୍ପ କହିଛନ୍ତି ଯେ, ଇରାନ ସହ ଏକ ଦୃଢ଼ ଚୁକ୍ତି ହେଲେ ଆମେରିକା ପକ୍ଷରୁ ପୁଣିଥରେ ସାମରିକ ଆକ୍ରମଣର ଆବଶ୍ୟକତା ଅତି କମ୍ ରହିବ। ଇରାନର ପରମାଣୁ କାର୍ଯ୍ୟକ୍ରମ ଏବଂ ହର୍ମୁଜ୍ ପ୍ରଣାଳୀ ଖୋଲିବା ପ୍ରସଙ୍ଗରେ ଆଲୋଚନାରେ ଠୋସ୍ ଅଗ୍ରଗତି ହେବା ଉପରେ ସେ ଗୁରୁତ୍ୱ ଦେଇଛନ୍ତି।

ତେବେ ଆବଶ୍ୟକ ପଡ଼ିଲେ ଆମେରିକା ଏକ ଘଣ୍ଟା ମଧ୍ୟରେ ଇରାନର ୩୮ଟି ସେତୁ ଧ୍ୱଂସ କରିପାରିବ ବୋଲି ଟ୍ରମ୍ପ ଚେତାବନୀ ମଧ୍ୟ ଦେଇଛନ୍ତି।

ହର୍ମୁଜ୍ ପ୍ରଣାଳୀରେ ଜାରି ରହିଛି ଅଶାନ୍ତି

ହର୍ମୁଜ୍ ପ୍ରଣାଳୀ ଦେଇ ଅଶୋଧିତ ତୈଳ ଯୋଗାଣରେ ବାଧା ଦୀର୍ଘ ଆଠ ମାସରୁ ଅଧିକ ସମୟ ଧରି ଜାରି ରହିଛି। ଏହି ଜଳପଥରେ ଜାହାଜ ଉପରେ ଆକ୍ରମଣ ହେବା ଖବର ଯୋଗୁଁ ବିଶ୍ୱ ତୈଳ ଯୋଗାଣକୁ ନେଇ ଚିନ୍ତା ବଢ଼ିଛି।

ଆମେରିକାର ଏନର୍ଜି ଇନଫରମେସନ୍ ଆଡମିନିଷ୍ଟ୍ରେସନ୍ (EIA) ତଥ୍ୟ ଅନୁସାରେ, ୨୦୨୬ର ଦ୍ୱିତୀୟ ତ୍ରୈମାସିକରେ ମଧ୍ୟପ୍ରାଚ୍ୟ ସଂଘର୍ଷ ଯୋଗୁଁ ବିଶ୍ୱର ରିଫାଇନେରୀ କାର୍ଯ୍ୟକଳାପରେ ତୀବ୍ର ହ୍ରାସ ଘଟିଥିଲା।

ଆହୁରି ପଢନ୍ତୁ: ଡଲାର ତୁଳନାରେ ଶକ୍ତିଶାଳୀ ହେଲା ଟଙ୍କା! ୯୪ ତଳକୁ ଖସିଲା ଡଲାର ଦର

Kpler ତଥ୍ୟ ଅନୁସାରେ, ଏପ୍ରିଲରୁ ଜୁନ୍ ମଧ୍ୟରେ ବିଶ୍ୱର ରିଫାଇନେରୀଗୁଡ଼ିକର ଦୈନିକ ତୈଳ ପ୍ରକ୍ରିୟାକରଣ ୪୮ ଲକ୍ଷ ବ୍ୟାରେଲ୍ ବା ୬ ପ୍ରତିଶତ ହ୍ରାସ ପାଇଥିଲା। ଏହାର ପ୍ରଭାବ ଚୀନ୍, ଭାରତ, ଦକ୍ଷିଣ କୋରିଆ ଓ ଜାପାନ ଭଳି ଦେଶ ଉପରେ ପଡ଼ିଥିଲା।

ତେବେ ପରବର୍ତ୍ତୀ ତ୍ରୈମାସିକରେ ବିକଳ୍ପ ଯୋଗାଣ ମାର୍ଗ ଏବଂ ବାଣିଜ୍ୟ ପ୍ରବାହରେ ପରିବର୍ତ୍ତନ ଯୋଗୁଁ ଦୈନିକ ୧୮ ଲକ୍ଷ ବ୍ୟାରେଲ୍ ପର୍ଯ୍ୟନ୍ତ ରିଫାଇନେରୀ କାର୍ଯ୍ୟକଳାପରେ ସୁଧାର ଆସିଥିଲା।