ଭୁବନେଶ୍ୱର: ଦେଶରେ ବିମୁଦ୍ରୀକରଣ ବା ନୋଟବନ୍ଦୀକୁ ୧୦ ବର୍ଷ ପୂରିଛି। ୨୦୧୬ ନଭେମ୍ବର ୮ ତାରିଖରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ୫୦୦ ଓ ୧୦୦୦ ଟଙ୍କିଆ ପୁରୁଣା ନୋଟ୍‌କୁ ଅଚଳ ଘୋଷଣା କରିଥିଲେ। ଏହି ନିଷ୍ପତ୍ତିର ଏକ ଦଶନ୍ଧି ପରେ ଏହାର ସଫଳତା ଓ ଦୀର୍ଘମିଆଦୀ ପ୍ରଭାବର ହିସାବ ରଖିଛି ଓଡ଼ିଶା ବିଜେପି।

ଏନେଇ ଦଳ ପକ୍ଷରୁ ଏକ ରିପୋର୍ଟ ଉପସ୍ଥାପନ କରାଯାଇଛି। ବିଜେପି ମୁଖପାତ୍ର ସତ୍ୟବ୍ରତ ପଣ୍ଡା କହିଛନ୍ତି ଯେ, ବିମୁଦ୍ରୀକରଣ ପରେ ଭାରତୀୟ ଅର୍ଥନୀତି ଅଧିକ ସୁଦୃଢ଼ ହୋଇଛି। କଳାଧନ ଓ ଜାଲ୍ ନୋଟ୍ କାରବାର ଉପରେ ନିୟନ୍ତ୍ରଣ ସହ ମାଓବାଦୀ ଓ ଆତଙ୍କବାଦୀଙ୍କ ଆର୍ଥିକ ନେଟୱର୍କକୁ ମଧ୍ୟ ବଡ଼ ଧକ୍କା ଲାଗିଛି ବୋଲି ଦଳ ଦାବି କରିଛି।

ମାଓବାଦୀ ଓ ଆତଙ୍କବାଦୀ ହିଂସା ହ୍ରାସ ପାଇଥିବା ଦାବି

ବିଜେପିର ରିପୋର୍ଟ ଅନୁସାରେ, ଦେଶରେ ମାଓବାଦୀ ହିଂସା ହ୍ରାସ ପାଇଛି। ଚଳିତ ବର୍ଷ ମାର୍ଚ୍ଚ-ଏପ୍ରିଲ୍ ସୁଦ୍ଧା ଦେଶରେ କୌଣସି ଜିଲ୍ଲା ମାଓପ୍ରବଣ ରହିବ ନାହିଁ ବୋଲି ଦଳ ପକ୍ଷରୁ ଆଶା ପ୍ରକାଶ କରାଯାଇଛି।

ସେହିପରି ଜମ୍ମୁ-କଶ୍ମୀରରେ ୨୦୧୮ ତୁଳନାରେ ଆତଙ୍କବାଦୀ ହିଂସା ୯୫ ପ୍ରତିଶତ ହ୍ରାସ ପାଇଥିବା ଏବଂ ଜାଲ୍ ନୋଟ୍‌ର ସଂଖ୍ୟା ୭୦ ପ୍ରତିଶତ କମିଥିବା ବିଜେପି ଦାବି କରିଛି।

ଜନଧନ ଖାତା ଓ ଡିଜିଟାଲ୍ କାରବାରରେ ବୃଦ୍ଧି

ବିମୁଦ୍ରୀକରଣ ପରବର୍ତ୍ତୀ ସମୟରେ ଦେଶରେ ଆର୍ଥିକ କାରବାରର ଢାଞ୍ଚା ବଦଳିଥିବା କଥା ନିଜ ରିପୋର୍ଟରେ ଉଲ୍ଲେଖ କରିଛି ବିଜେପି।

ଦଳର ଦାବି ଅନୁସାରେ:

• ଟିକସ ଆଦାୟରେ ୧୮ ପ୍ରତିଶତ ବୃଦ୍ଧି ହୋଇଛି।

• ବିମୁଦ୍ରୀକରଣର ୧୧ ମାସ ମଧ୍ୟରେ ୫ କୋଟି ଜନଧନ ଖାତା ଖୋଲାଯାଇଥିଲା।

• ଡିଜିଟାଲ୍ ଆର୍ଥିକ କାରବାରରେ ବଡ଼ ପରିବର୍ତ୍ତନ ଆସିଛି।

• ଅର୍ଥନୀତିକୁ ଅଧିକ ଔପଚାରିକ ଓ ସ୍ୱଚ୍ଛ କରିବା ଦିଗରେ ପଦକ୍ଷେପ ନିଆଯାଇଛି।

ବିମୁଦ୍ରୀକରଣର ପ୍ରଭାବକୁ ନେଇ ଏବେ ବି ରହିଛି ଭିନ୍ନ ମତ

ଅନ୍ୟପଟେ, ବିମୁଦ୍ରୀକରଣର ଦୀର୍ଘମିଆଦୀ ଆର୍ଥିକ ପ୍ରଭାବକୁ ନେଇ ଅର୍ଥନୀତି ବିଶେଷଜ୍ଞଙ୍କ ମଧ୍ୟରେ ଭିନ୍ନ ଭିନ୍ନ ମତ ରହିଛି।

ଏହି ପ୍ରସଙ୍ଗରେ ୨୦୨୩ରେ ସଂସଦରେ ସରକାରଙ୍କ ପକ୍ଷରୁ ବିମୁଦ୍ରୀକରଣର ପ୍ରଭାବ ଉପରେ କୌଣସି ସମ୍ପୂର୍ଣ୍ଣ ଅଧ୍ୟୟନ ପ୍ରକାଶ ପାଇନଥିବା କୁହାଯାଇଥିଲା।

ସେହିପରି ୧୦ ବର୍ଷ ପରେ ମଧ୍ୟ ଦେଶରେ ନଗଦ ଟଙ୍କାର ବ୍ୟବହାର ରହିଛି। ନଭେମ୍ବର ୨୦୧୬ରେ ବିମୁଦ୍ରୀକରଣ ସମୟରେ ବ୍ୟାଙ୍କକୁ ଫେରିଥିଲା ପ୍ରାୟ ୯୯.୩ ପ୍ରତିଶତ ଅଚଳ ନୋଟ୍। ଅନ୍ୟପଟେ ଡିଜିଟାଲ୍ ପେମେଣ୍ଟ୍‌ରେ ମଧ୍ୟ ବ୍ୟାପକ ବୃଦ୍ଧି ହୋଇଛି। ତେଣୁ ବିମୁଦ୍ରୀକରଣର ପ୍ରକୃତ ସଫଳତାକୁ ନେଇ ଆଲୋଚନା ଜାରି ରହିଛି।