କୋରାପୁଟ: ଧୀରେ ଧୀରେ ଓଡ଼ିଶାରେ ଶୀତର ପ୍ରକୋପ ବଢ଼ିବା ଆରମ୍ଭ ହୋଇଛି। ବିଶେଷ କରି କୋରାପୁଟ ଜିଲ୍ଲାରେ ଥଣ୍ଡା ସାଙ୍ଗକୁ ଘନ କୁହୁଡ଼ି ଲୋକଙ୍କ ଦୈନନ୍ଦିନ ଜୀବନକୁ ପ୍ରଭାବିତ କରିଛି। ସକାଳୁ ସହର ଓ ଆଖପାଖ ଅଞ୍ଚଳ କୁହୁଡ଼ିର ଚାଦରରେ ଘୋଡ଼ାଇ ହୋଇ ରହୁଛି। ଫଳରେ ରାସ୍ତାରେ ଯାତାୟାତ କରିବା ସମୟରେ ଗାଡ଼ି ଚାଳକମାନେ ବିଶେଷ ଅସୁବିଧାର ସମ୍ମୁଖୀନ ହେଉଛନ୍ତି।

କୁହୁଡ଼ିର ଘନତା ଏତେ ଅଧିକ ରହୁଛି ଯେ, ମାତ୍ର ୧୦ ମିଟର ଦୂରତା ପର୍ଯ୍ୟନ୍ତ ଦେଖିବା ସମ୍ଭବ ହେଉଛି। ଏହା ଯୋଗୁଁ ସକାଳ ସମୟରେ ରାସ୍ତାରେ ଗାଡ଼ି ଚଳାଚଳ ପ୍ରଭାବିତ ହେଉଛି। ଅନ୍ୟପଟେ ତାପମାତ୍ରା ହ୍ରାସ ପାଇବା ସହ ଅଞ୍ଚଳରେ ଶୀତର ଅନୁଭୂତି ଆହୁରି ବଢ଼ିଛି।

ଦାମନଯୋଡ଼ିରେ ପାରଦ ୧୧.୯ ଡିଗ୍ରୀ ସେଲସିୟସ୍କୁ ଖସି ଆସିଛି। ସକାଳୁ ଲୋକମାନେ ଥଣ୍ଡାରୁ ରକ୍ଷା ପାଇବା ପାଇଁ ଗରମ ପୋଷାକ ପିନ୍ଧିବା ସହ ନିଆଁ ପାଖରେ ବସି ଶୀତରୁ ଆଶ୍ୱସ୍ତି ପାଇବାକୁ ଚେଷ୍ଟା କରୁଛନ୍ତି।

ଏପଟେ ରାଜ୍ୟର ଅନ୍ୟ ଅଞ୍ଚଳରେ ମଧ୍ୟ ରାତିର ତାପମାତ୍ରା ହ୍ରାସ ପାଉଛି। ଭାରତୀୟ ପାଣିପାଗ ବିଭାଗ (IMD) ତଥ୍ୟ ଅନୁସାରେ, ସିମିଳିଗୁଡ଼ାରେ ୧୨.୨ ଡିଗ୍ରୀ, ଫୁଲବାଣୀରେ ୧୪ ଡିଗ୍ରୀ ଏବଂ ଦାରିଙ୍ଗବାଡ଼ି ଓ ଭବାନୀପାଟଣାରେ ୧୫ ଡିଗ୍ରୀ ସେଲସିୟସ୍ ତାପମାତ୍ରା ରେକର୍ଡ ହୋଇଛି। ଆଗାମୀ ଦିନରେ ରାଜ୍ୟର କେତେକ ଅଞ୍ଚଳରେ ରାତି ତାପମାତ୍ରା ଆହୁରି କମିବା ନେଇ ପାଣିପାଗ ବିଭାଗ ପୂର୍ବାନୁମାନ କରିଛି।

ତେଣୁ ସକାଳୁ ଘନ କୁହୁଡ଼ି ମଧ୍ୟରେ ଯାତାୟାତ କରୁଥିବା ଲୋକଙ୍କୁ ସତର୍କ ରହିବା ଆବଶ୍ୟକ। ବିଶେଷ କରି ଗାଡ଼ି ଚାଳକମାନେ ଧୀରେ ଗାଡ଼ି ଚଳାଇବା ଓ ଆବଶ୍ୟକ ସତର୍କତା ଅବଲମ୍ବନ କରିବା ଉଚିତ।