ଓଡ଼ିଆ ଖାଦ୍ୟର ସ୍ୱତନ୍ତ୍ର ପରିଚୟକୁ ଦେଶବ୍ୟାପୀ ଭାବେ ପହଞ୍ଚାଇବା ଏବଂ ପାରମ୍ପରିକ ଖାଦ୍ୟ ସଂସ୍କୃତିକୁ ଅଧିକ ଲୋକପ୍ରିୟ କରିବା ଉଦ୍ଦେଶ୍ୟରେ ଓଡ଼ିଶା ସରକାର ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ନେଇଛନ୍ତି। ଓଡ଼ିଶା ପର୍ଯ୍ୟଟନ (ସଂଶୋଧନ) ନୀତି-୨୦୨୬ ଅନୁଯାୟୀ ଓଡ଼ିଆ ଖାଦ୍ୟ ପରିବେଷଣ କରୁଥିବା ରେଷ୍ଟୁରାଣ୍ଟଗୁଡ଼ିକୁ ଆର୍ଥିକ ପ୍ରୋତ୍ସାହନ ପ୍ରଦାନ ପାଇଁ ପର୍ଯ୍ୟଟନ ବିଭାଗ ବିସ୍ତୃତ ନିର୍ଦ୍ଦେଶାବଳୀ ଜାରି କରିଛି।
ଏହି ଯୋଜନା ଅନୁଯାୟୀ ରେଷ୍ଟୁରାଣ୍ଟଗୁଡ଼ିକୁ ପ୍ରୋତ୍ସାହନ ପାଇବାକୁ ୮ଟି ପ୍ରମୁଖ ସର୍ତ୍ତ ପୂରଣ କରିବାକୁ ହେବ। ଏଥିରେ ଜମିର ସ୍ପଷ୍ଟ ମାଲିକାନା କିମ୍ବା ବୈଧ ଲିଜ୍ ଚୁକ୍ତି, ଅତି କମରେ ୨୫ ଜଣ ଅତିଥିଙ୍କ ବସିବା ବ୍ୟବସ୍ଥା, ପରିଷ୍କାର ଓ ସୁସଜ୍ଜିତ ରୋଷେଇଘର ଏବଂ ଜମି ଓ କୋଠା ଖର୍ଚ୍ଚକୁ ବାଦ ଦେଇ ଅତି କମରେ ୨୦ ଲକ୍ଷ ଟଙ୍କାର ପୁଞ୍ଜି ବିନିଯୋଗ ରହିଛି।
ଏହାଛଡ଼ା ପାରମ୍ପରିକ ଓଡ଼ିଆ ଖାଦ୍ୟ ପ୍ରସ୍ତୁତିରେ ଅଭିଜ୍ଞ ଓ ପ୍ରଶିକ୍ଷିତ କର୍ମଚାରୀ ନିଯୁକ୍ତି, ସ୍ୱଚ୍ଛ ସାର୍ବଜନିକ ଶୌଚାଳୟ, ପର୍ଯ୍ୟାପ୍ତ ପାର୍କିଂ ସୁବିଧା ଏବଂ ମେନୁ କାର୍ଡରେ ଓଡ଼ିଆ ଓ ଇଂରାଜୀ ଭାଷାରେ ଓଡ଼ିଆ ଖାଦ୍ୟର ନାମ ପ୍ରଦର୍ଶନ କରିବା ବାଧ୍ୟତାମୂଳକ କରାଯାଇଛି।
ନୀତି ଅନୁଯାୟୀ ରେଷ୍ଟୁରାଣ୍ଟଗୁଡ଼ିକୁ ପୁଞ୍ଜିଗତ ବ୍ୟୟ (CAPEX) ଏବଂ ପରିଚାଳନାଗତ ବ୍ୟୟ (OPEX) ଉଭୟ କ୍ଷେତ୍ରରେ ସହାୟତା ମିଳିବ। CAPEX ଅଧୀନରେ ଯୋଗ୍ୟ ପ୍ରକଳ୍ପ ବ୍ୟୟର ୩୦ ପ୍ରତିଶତ ପର୍ଯ୍ୟନ୍ତ ଫେରସ୍ତ ସୁବିଧା ମିଳିବ, ଯାହାର ସର୍ବାଧିକ ସୀମା ୫ କୋଟି ଟଙ୍କା ରଖାଯାଇଛି। ଏହି ରାଶି ରେଷ୍ଟୁରାଣ୍ଟ ଚାଲୁ ହେବା ପରେ ତିନି ବର୍ଷ ଧରି ପର୍ଯ୍ୟାୟକ୍ରମେ ପ୍ରଦାନ କରାଯିବ।
ଓଡ଼ିଶା ମଧ୍ୟରେ ଥିବା ରେଷ୍ଟୁରାଣ୍ଟଗୁଡ଼ିକ ପାଇଁ ଆଭ୍ୟନ୍ତରୀଣ ସଜାବଟ, ଆସବାବପତ୍ର, ରୋଷେଇ ଉପକରଣ, ନବୀକରଣ ଓ ସିଭିଲ କାର୍ଯ୍ୟର ଖର୍ଚ୍ଚ ଏହି ସୁବିଧାରେ ସାମିଲ ହେବ। ରାଜ୍ୟ ବାହାରେ ଥିବା ରେଷ୍ଟୁରାଣ୍ଟ ପାଇଁ ଆସବାବପତ୍ର, ଇଣ୍ଟେରିୟର ଏବଂ ରୋଷେଇ ଉପକରଣ ଖର୍ଚ୍ଚ ଯୋଗ୍ୟ ବ୍ୟୟ ଭାବେ ଗଣନା କରାଯିବ।
ସେହିପରି ପରିଚାଳନା ଖର୍ଚ୍ଚ କମାଇବା ପାଇଁ OPEX ସହାୟତା ମଧ୍ୟ ଘୋଷଣା କରାଯାଇଛି। ଓଡ଼ିଶାରେ ଥିବା ରେଷ୍ଟୁରାଣ୍ଟଗୁଡ଼ିକ ପ୍ରଥମ ବର୍ଷରେ ମାସିକ ବିଦ୍ୟୁତ ବିଲର ଦୁଇଗୁଣ ପର୍ଯ୍ୟନ୍ତ ଫେରସ୍ତ ପାଇବେ। ଦ୍ୱିତୀୟ ଓ ତୃତୀୟ ବର୍ଷରେ ବିଦ୍ୟୁତ ବିଲ ଏବଂ ରାଜ୍ୟ ଜିଏସଟି ରାଶି ଫେରସ୍ତ କରାଯିବ। ରାଜ୍ୟ ବାହାରେ ଥିବା ରେଷ୍ଟୁରାଣ୍ଟଗୁଡ଼ିକୁ ତିନି ବର୍ଷ ପର୍ଯ୍ୟନ୍ତ ମାସିକ ବିଦ୍ୟୁତ ଖର୍ଚ୍ଚର ଦୁଇଗୁଣ ସହାୟତା ମିଳିବ। ତେବେ ପ୍ରତି ମାସରେ ଏହି ସୁବିଧାର ସର୍ବାଧିକ ସୀମା ୨ ଲକ୍ଷ ଟଙ୍କା ରହିଛି।
ଏହି ଯୋଜନା ଅଧୀନରେ ଓଡ଼ିଶାର ଘୋଷିତ ପର୍ଯ୍ୟଟନସ୍ଥଳୀ ସହିତ ଦେଶର ପ୍ରମୁଖ ସହର ଓ ପର୍ଯ୍ୟଟନ କେନ୍ଦ୍ରଗୁଡ଼ିକରେ ଥିବା ଓଡ଼ିଆ ଖାଦ୍ୟ ରେଷ୍ଟୁରାଣ୍ଟମାନେ ଲାଭ ପାଇପାରିବେ। ମୁମ୍ବାଇ, ଦିଲ୍ଲୀ, ବେଙ୍ଗାଲୁରୁ, ଚେନ୍ନାଇ ଓ କୋଲକାତାରେ ପ୍ରତି ସହରର ସର୍ବାଧିକ ୫ଟି ରେଷ୍ଟୁରାଣ୍ଟ ଏହି ସୁବିଧା ପାଇବେ। ସେହିପରି ଆଗ୍ରା, ବାରାଣସୀ, ଗୋଆ, କୋଚି ଏବଂ ଜୟପୁର ଭଳି ପର୍ଯ୍ୟଟନ ସ୍ଥଳୀରେ ସର୍ବାଧିକ ୨ଟି ରେଷ୍ଟୁରାଣ୍ଟକୁ ଏହି ସୁବିଧା ମିଳିବ।
ପର୍ଯ୍ୟଟନ ବିଭାଗ ଗଠନ କରିଥିବା ‘ଓଡ଼ିଆ କୁଲିନାରୀ କମିଟି’ ସମସ୍ତ ଆବେଦନ ଓ ଦାବିର ଯାଞ୍ଚ କରିବା ପରେ ପ୍ରୋତ୍ସାହନ ଅନୁମୋଦନ କରିବ।
ଓଡ଼ିଶାରେ ସୁନା ଦରରେ ଲଗାତାର ଦ୍ୱିତୀୟ ଦିନ ପାଇଁ ବଡ଼ ଧରଣ...
ଭୁବନେଶ୍ୱରର ନଖରା-ସୁନ୍ଦରପୁର ମୁଖ୍ୟ ରାସ୍ତା ନିକଟସ୍ଥ ଏକ...
ସାଇବର ନିର୍ଯାତନା ଏବଂ ମର୍ଫଡ୍ ଫଟୋ ଭାଇରାଲ୍ ଘଟଣାରେ ଭରତପ...
ନବରଙ୍ଗପୁର ଜିଲ୍ଲାର ଜଣେ ମହିଳା ଜଜଙ୍କୁ କେନ୍ଦ୍ର କରି ଆସି...
ରାଜ୍ୟରେ ପ୍ରାକ୍-ମୌସୁମୀ ବର୍ଷାର ପ୍ରଭାବ ଜାରି ରହିଥିବା ବ...
ଏମ୍ବିବିଏସ୍ ଛାତ୍ରୀ ଚନ୍ଦ୍ରିକା ହେମ୍ବ୍ରମଙ୍କ ରହସ୍ୟଜନକ ମ...
ରାଜ୍ୟରେ ଲାଗି ରହିଥିବା କାଳବୈଶାଖୀଜନିତ ବର୍ଷା, ଘଡ଼ଘଡ଼ି...
କେନ୍ଦୁଝର ଜିଲ୍ଲାର ଟେଲକୋଇ ବ୍ଲକ୍ ପ୍ରତିବର୍ଷ ହଜାର ହଜାର...
ଓଡ଼ିଶାର ଗଣପର୍ବ ରଜ ଆସିଲେ ଘରେ ଘରେ ଦୋଳି ଖେଳର ଉତ୍ସାହ ଦ...
ଦେଶରେ ପୁନର୍ବାର ପେଟ୍ରୋଲ ଓ ଡିଜେଲ ଦର ବୃଦ୍ଧି ପାଇଛି। ପେ...
ଗୁରୁବାର ରାତିରେ ଦକ୍ଷିଣ ଓଡ଼ିଶାର ବିଭିନ୍ନ ଅଞ୍ଚଳରେ ହୋଇଥ...
ଅନୁଗୁଳ ଜିଲ୍ଲାରେ କାଳବୈଶାଖୀ ଝଡ଼ ଏକ ଅଘଟଣ ଘଟାଇଛି। ଗୁରୁ...
