ବାରିପଦା: ‘ଗଣତନ୍ତ୍ର ବଞ୍ଚାଅ, ଅରାଜକତା ହଟାଅ’ ଅଭିଯାନକୁ ନେଇ ବିରୋଧୀ ଦଳଗୁଡ଼ିକ ଉପରେ ବର୍ଷିଛନ୍ତି ନଗର ଉନ୍ନୟନ ମନ୍ତ୍ରୀ ଡାକ୍ତର କୃଷ୍ଣଚନ୍ଦ୍ର ମହାପାତ୍ର। ଗଣତନ୍ତ୍ରର ସୁରକ୍ଷା ନାଁରେ ବିରୋଧୀ ଦେଶବାସୀଙ୍କୁ ବିଭ୍ରାନ୍ତ କରୁଥିବା ସେ ଅଭିଯୋଗ କରିଛନ୍ତି।

​​​​​​​ଆହୁରି ପଢନ୍ତୁ : କୋଟିଆରେ ଓଡ଼ିଶା-ଆନ୍ଧ୍ର ବିବାଦ ତେଜିଲା; BJD ହଟାଇଥିବା ତେଲୁଗୁ ନାମଫଳକ ପୁଣି ଲଗାଇଲେ ଆନ୍ଧ୍ର ଅଧିକାରୀ

ବାରିପଦାରେ ମୟୂରଭଞ୍ଜ ଜିଲ୍ଲା ବିଜେପି ପୂର୍ବ ସଂଗଠନ ପକ୍ଷରୁ ଆୟୋଜିତ ସାମ୍ବାଦିକ ସମ୍ମିଳନୀରେ ମନ୍ତ୍ରୀ ଏହି ମତ ରଖିଛନ୍ତି। ମିଥ୍ୟା ତଥ୍ୟ ଓ ଭ୍ରମାତ୍ମକ ପ୍ରଚାର ମାଧ୍ୟମରେ ଜନସାଧାରଣଙ୍କ ମନରେ ଅସନ୍ତୋଷ ସୃଷ୍ଟି କରିବାକୁ ଉଦ୍ୟମ ହେଉଥିବା ସେ କହିଛନ୍ତି।

ବିଦେଶୀ ଶକ୍ତି ଓ ବିରୋଧୀଙ୍କ ଉପରେ ଅଭିଯୋଗ

ମନ୍ତ୍ରୀଙ୍କ ଅଭିଯୋଗ ଅନୁସାରେ, ଦେଶର ଅଗ୍ରଗତିକୁ ସହ୍ୟ କରିପାରୁନଥିବା କିଛି ବିଦେଶୀ ଶକ୍ତି ଓ ସେମାନଙ୍କ ସହ ହାତ ମିଳାଇଥିବା ବିରୋଧୀ ଦଳ ରାଜନୈତିକ ସ୍ୱାର୍ଥ ପାଇଁ ଅପପ୍ରଚାର କରୁଛନ୍ତି।

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ଭାରତ ଆର୍ଥିକ ଓ ପ୍ରତିରକ୍ଷା କ୍ଷେତ୍ରରେ ଆଗକୁ ବଢ଼ୁଥିବା ବେଳେ ‘ମେକ୍ ଇନ୍ ଇଣ୍ଡିଆ’ ଭଳି ଅଭିଯାନ ଦେଶର ବିକାଶକୁ ନୂଆ ଦିଗ ଦେଇଛି ବୋଲି ସେ ମତ ଦେଇଛନ୍ତି। ଏହି ଅଗ୍ରଗତିକୁ ରୋକିବା ପାଇଁ ମିଥ୍ୟା ପ୍ରଚାର କରାଯାଉଥିବା ମନ୍ତ୍ରୀ ଅଭିଯୋଗ କରିଛନ୍ତି।

ଭୋଟ୍ ଚୋରି ଅଭିଯୋଗକୁ ନେଇ ପ୍ରଶ୍ନ

୨୦୨୪ ନିର୍ବାଚନରେ ଭୋଟ୍ ଚୋରି ହୋଇଥିବା ନେଇ ବିରୋଧୀଙ୍କ ଅଭିଯୋଗକୁ ମନ୍ତ୍ରୀ ଖଣ୍ଡନ କରିଛନ୍ତି। ଯଦି ପ୍ରକୃତରେ ଭୋଟ୍ ଚୋରି ହୋଇଥିଲା, ତେବେ ସେତେବେଳେ ବିରୋଧୀ କୋର୍ଟର ଦ୍ୱାରସ୍ଥ କାହିଁକି ହେଲେ ନାହିଁ ଏବଂ ଆନ୍ଦୋଳନ କାହିଁକି କଲେ ନାହିଁ ବୋଲି ସେ ପ୍ରଶ୍ନ କରିଛନ୍ତି।

ନିର୍ବାଚନର ଅଢ଼େଇ ବର୍ଷ ପରେ ଏଭଳି ଅଭିଯୋଗ ଆଣିବା ପଛରେ ରାଜନୈତିକ ଅଭିସନ୍ଧି ଥିବା ମନ୍ତ୍ରୀ ଆକ୍ଷେପ କରିଛନ୍ତି।

SIR ପ୍ରକ୍ରିୟାକୁ ସମର୍ଥନ

ଭୋଟର ତାଲିକା ସଂଶୋଧନ ପ୍ରକ୍ରିୟା (SIR)କୁ ନେଇ ବିରୋଧୀଙ୍କ ଆପତ୍ତିର ମଧ୍ୟ ଜବାବ ରଖିଛନ୍ତି କୃଷ୍ଣଚନ୍ଦ୍ର ମହାପାତ୍ର। ଭୋଟର ତାଲିକାରେ ଥିବା ଅନିୟମିତତା ଦୂର କରିବା ପାଇଁ ଏହି ପ୍ରକ୍ରିୟା ଜରୁରୀ ବୋଲି ସେ କହିଛନ୍ତି।

ବୁଥ୍ ସ୍ତରରେ ବିଭିନ୍ନ ରାଜନୈତିକ ଦଳର ପ୍ରତିନିଧିଙ୍କ ଉପସ୍ଥିତିରେ ଏହି କାର୍ଯ୍ୟ ହେଉଥିବା ସେ ସୂଚନା ଦେଇଛନ୍ତି। ଭୋଟର ତାଲିକାରୁ ନାମ ବାଦ୍ ପଡ଼ିଥିଲେ ନିୟମ ଅନୁଯାୟୀ ଫର୍ମ ନମ୍ବର ୬ ମାଧ୍ୟମରେ ପୁନର୍ବାର ଆବେଦନ କରିହେବ ବୋଲି ସେ ସ୍ପଷ୍ଟ କରିଛନ୍ତି।

ଆଗକୁ ବୁଦ୍ଧିଜୀବୀ ସମ୍ମିଳନୀ କରିବ ବିଜେପି

ସୋସିଆଲ ମିଡିଆ ଓ ସଭାସମିତିରେ ମିଥ୍ୟା ତଥ୍ୟ ପ୍ରଚାର କରି ଲୋକଙ୍କୁ ଭ୍ରମିତ କରୁଥିବା ଶକ୍ତିଙ୍କ ବିରୋଧରେ ବିଜେପି ପକ୍ଷରୁ ବାରିପଦା ସମେତ ବିଭିନ୍ନ ସ୍ଥାନରେ ରାଲି ଓ ସାମ୍ବାଦିକ ସମ୍ମିଳନୀ କରାଯାଉଛି। ଆଗାମୀ ଦିନରେ ବୁଦ୍ଧିଜୀବୀ ସମ୍ମିଳନୀ ମାଧ୍ୟମରେ ଜନସାଧାରଣଙ୍କ ସମ୍ମୁଖରେ ତଥ୍ୟ ଉପସ୍ଥାପନ କରାଯିବ ବୋଲି ମନ୍ତ୍ରୀ କହିଛନ୍ତି।