ମଧ୍ୟପ୍ରାଚ୍ୟରେ ଜାରି ରହିଥିବା ଯୁଦ୍ଧ ଓ ଉତ୍ତେଜନା ମଧ୍ୟରେ ଭାରତ ପାଇଁ ଆସିଛି ଏକ ଆଶ୍ୱସ୍ତିକର ଖବର। ହର୍ମୁଜ୍‌ ପ୍ରଣାଳୀ ଦେଇ ଜାହାଜ ଚଳାଚଳକୁ ନେଇ ଲାଗିଥିବା କଟକଣାରୁ ଭାରତୀୟ ଜାହାଜକୁ ଛାଡ଼ ଦିଆଯାଇଥିବା ଇରାନର ଜଣେ ବରିଷ୍ଠ ସାଂସଦୀୟ ନେତା କହିଛନ୍ତି। ଏହି ନିଷ୍ପତ୍ତି ଭାରତର ସାମୁଦ୍ରିକ ବାଣିଜ୍ୟ ଓ ଶକ୍ତି ଯୋଗାଣ କ୍ଷେତ୍ରରେ କିଛିଟା ଆଶ୍ୱସ୍ତି ଆଣିପାରେ।

ଭାରତ ସମେତ ୪ ଦେଶକୁ ଛାଡ଼

ଇରାନ ସଂସଦର ଜାତୀୟ ସୁରକ୍ଷା ଓ ବୈଦେଶିକ ନୀତି କମିଟିର ଉପାଧ୍ୟକ୍ଷ ଅମିର ହାୟାତ୍‌-ମୋଘାଦ୍ଦମ୍‌ଙ୍କ କହିବା ଅନୁସାରେ, ଭାରତ, ଚୀନ୍‌, ଇରାକ୍‌ ଓ କତାରର ଜାହାଜକୁ ହର୍ମୁଜ୍‌ ପ୍ରଣାଳୀ ଦେଇ ଯାତାୟାତ ପାଇଁ କଟକଣାରୁ ଛାଡ଼ ଦିଆଯାଇଛି। ଏହି ଦେଶଗୁଡ଼ିକର ଜାହାଜ ଏହି ଜଳପଥ ଦେଇ ଯାତାୟାତ କରିପାରିବେ ବୋଲି ସେ କହିଛନ୍ତି।

ଭାରତକୁ କାହିଁକି ଦିଆଗଲା ଛାଡ଼?

ଇରାନୀ ନେତାଙ୍କ ମତରେ, ଭାରତୀୟ ଜାହାଜକୁ ଏହି ଛାଡ଼ ଦେବା ପଛରେ ଇରାନର ଔଷଧ ଆମଦାନି ସମ୍ବନ୍ଧୀୟ ଆବଶ୍ୟକତା ରହିଛି। ଅର୍ଥାତ୍‌, ଭାରତରୁ ଜରୁରୀ ଔଷଧ ଆଣିବା ପାଇଁ ଏହି ବ୍ୟବସ୍ଥା ସହାୟକ ହେବ ବୋଲି ସେ ସୂଚାଇଛନ୍ତି। ସେହିପରି ଚୀନ୍‌ର ଜାହାଜକୁ ଛାଡ଼ ଦେବା ପଛରେ ବେଜିଂର ରାଜନୈତିକ ସମର୍ଥନ ହାସଲ କରିବା ଉଦ୍ଦେଶ୍ୟ ଥିବା ସେ କହିଛନ୍ତି।

ଭାରତ ପାଇଁ କାହିଁକି ଗୁରୁତ୍ୱପୂର୍ଣ୍ଣ ହର୍ମୁଜ୍‌ ପ୍ରଣାଳୀ?

ହର୍ମୁଜ୍‌ ପ୍ରଣାଳୀ ବିଶ୍ୱର ସବୁଠାରୁ ଗୁରୁତ୍ୱପୂର୍ଣ୍ଣ ତୈଳ ପରିବହନ ଜଳପଥ ମଧ୍ୟରୁ ଅନ୍ୟତମ। ଭାରତ ନିଜର ଅଶୋଧିତ ତୈଳ ଆବଶ୍ୟକତାର ପ୍ରାୟ ୯୦ ପ୍ରତିଶତ ଆମଦାନି କରେ। ଏହା ସହ ଭାରତର ତୈଳ ଆମଦାନିର ଏକ ବଡ଼ ଅଂଶ ଏହି ଜଳପଥ ଦେଇ ଆସିଥାଏ। ଏହି ରାସ୍ତାରେ ଜାହାଜ ଚଳାଚଳ ବାଧାପ୍ରାପ୍ତ ହେଲେ ତୈଳ, ଏଲ୍‌ପିଜି ଓ ଏଲ୍‌ଏନ୍‌ଜି ଯୋଗାଣ ଉପରେ ପ୍ରଭାବ ପଡ଼ିପାରେ।

ତଥାପି ରହିଛି ସୁରକ୍ଷା ଚିନ୍ତା

ଭାରତୀୟ ଜାହାଜକୁ କଟକଣାରୁ ଛାଡ଼ ମିଳିବା ଏକ ଆଶ୍ୱସ୍ତିକର ଖବର ହୋଇଥିଲେ ମଧ୍ୟ ଏହାର ଅର୍ଥ ଜଳପଥ ସମ୍ପୂର୍ଣ୍ଣ ବିପଦମୁକ୍ତ ହୋଇଗଲା ନୁହେଁ। ଅଞ୍ଚଳରେ ସାମରିକ ଉତ୍ତେଜନା ଓ ବାଣିଜ୍ୟିକ ଜାହାଜର ସୁରକ୍ଷାକୁ ନେଇ ଚିନ୍ତା ଜାରି ରହିଛି। ତେଣୁ ଏହି ଛାଡ଼ର ପ୍ରାକ୍ତିକ ପ୍ରଭାବ ଓ ଜାହାଜ ଚଳାଚଳ କେତେ ସ୍ୱାଭାବିକ ହେଉଛି, ତାହା ଉପରେ ନଜର ରହିବ।

ଇରାନର ଏହି ଘୋଷଣା ଭାରତ ପାଇଁ ଆଶ୍ୱସ୍ତି ଆଣିଥିବା ବେଳେ ଏହା ଦେଶର ତୈଳ ଓ ଗ୍ୟାସ୍‌ ଯୋଗାଣକୁ କେତେ ମାତ୍ରାରେ ସହାୟତା କରୁଛି, ତାହା ଆଗାମୀ ଦିନରେ ସ୍ପଷ୍ଟ ହେବ।