ୟୁରୋପ: ୟୁରୋପରେ ବିମାନ ଯାତ୍ରାକୁ ନେଇ ଦେଖାଦେଇଛି ଆତଙ୍କ। ବିଭିନ୍ନ ଦେଶରେ ଯାତ୍ରୀବାହୀ ବିମାନକୁ ବୋମା ଧମକ ମିଳିବା ପରେ ଏକାଧିକ ବିମାନର ଗତିପଥ ବଦଳାଇ ଦିଆଯାଇଛି। ଗୁରୁବାର ଏହି ଘଟଣାକୁ ନେଇ ୟୁରୋପର ବିମାନବନ୍ଦରଗୁଡ଼ିକରେ ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯାଇଛି।

ରିପୋର୍ଟ ଅନୁସାରେ, ଡବଲିନ୍‌ରୁ ରୋମ୍ ଯାଉଥିବା ଏର୍ ଲିଙ୍ଗସ୍‌ର ଏକ ବିମାନକୁ ବୋମା ଧମକ ମିଳିବା ପରେ ଫ୍ରାନ୍ସର ଏଭ୍ରେଉକ୍ସ ସାମରିକ ବିମାନଘାଟିରେ ଅବତରଣ କରାଯାଇଥିଲା। ବିମାନରେ ୧୫୧ ଜଣ ଯାତ୍ରୀ ଓ ୬ ଜଣ କ୍ରୁ ସଦସ୍ୟ ଥିଲେ। ସମସ୍ତେ ସୁରକ୍ଷିତ ଥିବା ଜଣାପଡ଼ିଛି। ବୋମା ନିଷ୍କ୍ରିୟକାରୀ ଦଳ ବିମାନରେ ଯାଞ୍ଚ କରୁଛନ୍ତି।

ସେହିପରି ହେଲସିଙ୍କିରୁ ରୋମ୍ ଯାଉଥିବା ଫିନ୍‌ଏୟାରର ଏକ ବିମାନକୁ ମଧ୍ୟ ବୋମା ଧମକ ମିଳିଥିଲା। ତେବେ ବିମାନଟି ନିର୍ଦ୍ଧାରିତ ଗନ୍ତବ୍ୟସ୍ଥଳ ରୋମ୍‌ରେ ସୁରକ୍ଷିତ ଭାବେ ଅବତରଣ କରିଥିଲା। ଯାଞ୍ଚ ପରେ କୌଣସି ସନ୍ଦେହଜନକ ବସ୍ତୁ ମିଳିନଥିବା ସୂଚନା ମିଳିଛି।

ଅନ୍ୟପଟେ ବୁଲଗେରିଆର ସୋଫିଆ ଅଭିମୁଖେ ଯାଉଥିବା ରାୟାନଏୟାରର ତିନୋଟି ବିମାନକୁ ମଧ୍ୟ ଧମକ ମିଳିଥିଲା। ଡେନମାର୍କର କୋପେନହେଗେନ୍ ଓ ସ୍ପେନ୍‌ର ମାଡ୍ରିଡ୍‌ରୁ ଆସୁଥିବା ଦୁଇଟି ବିମାନ ସୋଫିଆରେ ସୁରକ୍ଷିତ ଅବତରଣ କରିଥିବା ବେଳେ ଲଣ୍ଡନରୁ ଆସୁଥିବା ଅନ୍ୟ ଏକ ବିମାନ ପ୍ଲୋଭଡିଭ୍ ବିମାନବନ୍ଦରରେ ଅବତରଣ କରିଥିଲା।

ଏହାଛଡ଼ା ୱିଜ୍ ଏୟାରର ଏକ ବିମାନକୁ ମଧ୍ୟ ବୋମା ଧମକ ପରେ ଅନ୍ୟ ବିମାନବନ୍ଦରକୁ ପଠାଯାଇଥିବା ସୂଚନା ମିଳିଛି। ଏହି ଘଟଣାଗୁଡ଼ିକ ପରେ ବିଭିନ୍ନ ବିମାନବନ୍ଦରରେ ଯାତ୍ରୀ ଓ ବିମାନର ସୁରକ୍ଷା ଯାଞ୍ଚ କରାଯାଇଛି।

ଉଲ୍ଲେଖଯୋଗ୍ୟ ଯେ, ଚଳିତ ସପ୍ତାହର ଆରମ୍ଭରେ ମଧ୍ୟ ୟୁରୋପର ଅନେକ ବିମାନକୁ ଏଭଳି ଧମକ ମିଳିଥିଲା। ଏହି ଘଟଣାଗୁଡ଼ିକ ମଧ୍ୟରୁ କିଛି ଧମକ ମିଥ୍ୟା ବୋଲି ଜଣାପଡ଼ିଥିଲା ଏବଂ ଯାଞ୍ଚରେ ବିସ୍ଫୋରକ ମିଳିନଥିଲା। ତେବେ ଗୁରୁବାରର ନୂଆ ଧମକଗୁଡ଼ିକ ପଛରେ କାହାର ହାତ ରହିଛି, ସେନେଇ ତଦନ୍ତ ଜାରି ରହିଛି।