‘ବନ୍ଦେ ମାତରମ୍‌’କୁ ନେଇ ଦେଶରେ ଚାଲିଥିବା ଚର୍ଚ୍ଚା ମଧ୍ୟରେ ନିଜ ମତ ରଖିଛନ୍ତି ବରିଷ୍ଠ ଗୀତିକାର ଓ ଲେଖକ ଜାଭେଦ ଅଖତର। ସେ କହିଛନ୍ତି ଯେ ‘ବନ୍ଦେ ମାତରମ୍‌’ କହିବା କିମ୍ବା ଦେଶକୁ ପ୍ରଶଂସା କରିବାରେ ତାଙ୍କର କୌଣସି ସମସ୍ୟା ନାହିଁ। ତେବେ ଏହା ସହ ଧାର୍ମିକ ଭାବନାକୁ ଯୋଡ଼ି ତାଙ୍କୁ କିଛି ପଦ ଗାଇବାକୁ ବାଧ୍ୟ କରାଯିବାକୁ ସେ ବିରୋଧ କରିଛନ୍ତି।

‘Indian Express Hindi’କୁ ଦେଇଥିବା ଏକ ସାକ୍ଷାତକାରରେ ଅଖତର କହିଛନ୍ତି ଯେ ସେ ଜଣେ ନାସ୍ତିକ ଏବଂ ନିଜ ଧାର୍ମିକ ମତ ରଖିବାର ଅଧିକାର ତାଙ୍କର ରହିଛି। ତାଙ୍କ ମତରେ ଦେଶପ୍ରେମ ଓ ଧର୍ମ ଦୁଇଟି ଅଲଗା ବିଷୟ।

ଅଖତର କହିଛନ୍ତି ଯେ ସେ ‘ବନ୍ଦେ ମାତରମ୍‌’ ଶହେ ଥର କହିବାକୁ ମଧ୍ୟ ପ୍ରସ୍ତୁତ, କାରଣ ସେ ନିଜ ଦେଶକୁ ଭଲ ପାଆନ୍ତି। ଏପରିକି ସେ ନିଜେ ମଧ୍ୟ ‘ବନ୍ଦେ ମାତରମ୍‌’ ଶବ୍ଦ ବ୍ୟବହାର କରି ଗୀତ ଲେଖିଥିବା କହିଛନ୍ତି।

ତେବେ ଗୀତର କିଛି ପରବର୍ତ୍ତୀ ପଦରେ ଥିବା ଧାର୍ମିକ ଚିତ୍ରଣକୁ ନେଇ ତାଙ୍କର ଆପତ୍ତି ରହିଛି। ସେ କହିଛନ୍ତି, ଦେଶ ବିଷୟରେ କଥା ହେଲେ ସେ ସମ୍ପୂର୍ଣ୍ଣ ଭାବେ ସାଥୀ ଅଛନ୍ତି, କିନ୍ତୁ ତା’ ସହ ଅନ୍ୟ କାହାର ଧର୍ମକୁ ଯୋଡ଼ାଯିବାକୁ ସେ ଗ୍ରହଣ କରନ୍ତି ନାହିଁ।

ଅଖତରଙ୍କ ଏହି ମନ୍ତବ୍ୟ ଏଭଳି ସମୟରେ ଆସିଛି, ଯେତେବେଳେ ‘ବନ୍ଦେ ମାତରମ୍‌’ର ସମ୍ପୂର୍ଣ୍ଣ ଗାନକୁ ନେଇ ନୂଆ ବିବାଦ ଦେଖାଦେଇଛି। ଗୀତର ପ୍ରଥମ ଦୁଇଟି ପଦରେ ମାତୃଭୂମିର ସୌନ୍ଦର୍ଯ୍ୟ ଓ ଦେଶପ୍ରେମକୁ ଗୁରୁତ୍ୱ ଦିଆଯାଇଥିବାବେଳେ ପରବର୍ତ୍ତୀ ପଦଗୁଡ଼ିକରେ ଧାର୍ମିକ ଚିତ୍ରଣ ରହିଛି।

ଏହି ପରିପ୍ରେକ୍ଷୀରେ କିଛି ମୁସଲିମ ସଂଗଠନ ଆପତ୍ତି ଜଣାଇଥିବାବେଳେ, ସରକାରୀ କାର୍ଯ୍ୟକ୍ରମରେ ‘ବନ୍ଦେ ମାତରମ୍‌’ର ସମ୍ପୂର୍ଣ୍ଣ ଛଅଟି ପଦ ଗାଇବାକୁ ନେଇ ମଧ୍ୟ ଚର୍ଚ୍ଚା ଜୋର ଧରିଛି।

ଜାଭେଦ ଅଖତରଙ୍କ ମତ ଅନୁସାରେ, ଦେଶକୁ ସମ୍ମାନ କରିବା ଓ ଦେଶପ୍ରେମ ପ୍ରକାଶ କରିବାରେ ତାଙ୍କର କୌଣସି ଦ୍ୱିଧା ନାହିଁ। ତାଙ୍କ ଆପତ୍ତି କେବଳ ଏତିକି ଯେ ଦେଶପ୍ରେମ ପ୍ରକାଶ କରିବା ସମୟରେ ଧାର୍ମିକ ବିଶ୍ୱାସକୁ ତାଙ୍କ ଉପରେ ଥୋପାଯିବା ଉଚିତ ନୁହେଁ।