ଭୁବନେଶ୍ୱର: ବାଲିପାଟଣା ବଜାରରେ ଘଟିଥିବା ଅକ୍ଷୟ କୁମାର ମାଝୀ ହତ୍ୟା ମାମଲାରେ ଭୁବନେଶ୍ୱର କୋର୍ଟ ଗୁରୁତ୍ୱପୂର୍ଣ୍ଣ ରାୟ ଶୁଣାଇଛନ୍ତି। ମୁଖ୍ୟ ଅଭିଯୁକ୍ତ ଦିଲ୍ଲୁ କୁମାର ଭୋଇଙ୍କ ସମେତ ମୋଟ ୯ ଜଣଙ୍କୁ ଆଜୀବନ କାରାଦଣ୍ଡ ଦିଆଯାଇଛି। ପ୍ରତ୍ୟେକଙ୍କ ଉପରେ ୨୦ ହଜାର ଟଙ୍କା ଲେଖାଏଁ ଜରିମାନା ହୋଇଥିବା ବେଳେ ଜରିମାନା ନଦେଲେ ଅତିରିକ୍ତ ୬ ମାସ କଠୋର କାରାଦଣ୍ଡ ଭୋଗିବାକୁ ପଡ଼ିବ।

ଘଟଣାଟି ୨୦୨୪ ମାର୍ଚ୍ଚ ୨୩ ତାରିଖ ସନ୍ଧ୍ୟାରେ ଘଟିଥିଲା। ଅକ୍ଷୟ କୁମାର ମାଝୀ ବାଲିପାଟଣା ବଜାରକୁ ପରିବା କିଣିବାକୁ ଯାଇଥିବା ସମୟରେ ତାଙ୍କୁ ଏକ ଗୋଷ୍ଠୀ ଆକ୍ରମଣ କରିଥିଲା। ଗୁରୁତର ଆହତ ଅକ୍ଷୟଙ୍କୁ ପ୍ରଥମେ ଅଠାନ୍ତର ଚିକିତ୍ସାଳୟ ଏବଂ ପରେ ଭୁବନେଶ୍ୱରର ହାଇଟେକ୍ ହସ୍ପିଟାଲକୁ ନିଆଯାଇଥିଲା। ଚିକିତ୍ସାଧୀନ ଅବସ୍ଥାରେ ସେହି ରାତିରେ ତାଙ୍କର ମୃତ୍ୟୁ ହୋଇଥିଲା।

ମାମଲାରେ ଦିଲ୍ଲୁ କୁମାର ଭୋଇ ଏବଂ ତାଙ୍କର ୮ ଜଣ ସହଯୋଗୀଙ୍କ ବିରୋଧରେ ହତ୍ୟା ଓ ଅପରାଧିକ ଷଡ଼ଯନ୍ତ୍ର ସମେତ ବିଭିନ୍ନ ଧାରାରେ ମାମଲା ରୁଜୁ ହୋଇଥିଲା। ପୋଲିସ ତଦନ୍ତ ପରେ ଅଭିଯୁକ୍ତମାନଙ୍କ ବିରୋଧରେ ଚାର୍ଜସିଟ୍ ଦାଖଲ କରିଥିଲା।

ବିଚାର ସମୟରେ ଅଭିଯୋଗ ପକ୍ଷ ପକ୍ଷରୁ୧୦ ଜଣ ଗୁରୁତ୍ୱପୂର୍ଣ୍ଣ ସାକ୍ଷୀଙ୍କ ବୟାନଏବଂ ଅନ୍ୟାନ୍ୟ ପ୍ରମାଣ ଉପସ୍ଥାପନ କରାଯାଇଥିଲା। ଏହା ଆଧାରରେ କୋର୍ଟ ଅଭିଯୁକ୍ତମାନଙ୍କୁ ଦୋଷୀ ସାବ୍ୟସ୍ତ କରି ଆଜୀବନ କାରାଦଣ୍ଡ ଶୁଣାଇଛନ୍ତି।

ମାମଲାର ପୃଷ୍ଠଭୂମିରେ ପୂର୍ବ ଶତ୍ରୁତା ଏବଂ ଜମିଜମା ବିବାଦ ଥିବା ନେଇ ଅଭିଯୋଗ ରହିଥିଲା। ଅଭିଯୋଗ ଅନୁସାରେ, ଅକ୍ଷୟଙ୍କୁ ଗୋଷ୍ଠୀଗତ ଭାବେ ଆକ୍ରମଣ କରାଯାଇଥିଲା। ରାୟ ପରେ ସମସ୍ତ ୯ ଦୋଷୀଙ୍କୁ ଜେଲ୍କୁ ପଠାଯାଇଛି।