ଭାରତ-ପାକିସ୍ତାନ କ୍ରିକେଟ୍ ମ୍ୟାଚ୍ ସବୁବେଳେ କ୍ରୀଡ଼ାପ୍ରେମୀଙ୍କ ମଧ୍ୟରେ ବିଶେଷ ଉତ୍ସାହ ସୃଷ୍ଟି କରିଥାଏ। ଦୁଇ ଦେଶ ମଧ୍ୟରେ ଦ୍ୱିପାକ୍ଷିକ ସିରିଜ୍ ଦୀର୍ଘଦିନ ଧରି ହେଉନଥିବାରୁ ଏସିଆ କପ୍ ଓ ଆଇସିସି ଟୁର୍ଣ୍ଣାମେଣ୍ଟ ପରି ବଡ଼ ମଞ୍ଚରେ ହିଁ ଦୁଇ ଦଳକୁ ମୁହାଁମୁହିଁ ଦେଖିବାକୁ ମିଳୁଛି।

୨୦୨୬ ଏସିଆନ୍ ଗେମ୍ସରେ ମଧ୍ୟ ଭାରତ-ପାକିସ୍ତାନ କ୍ରିକେଟ୍ ମୁକାବିଲାର ସମ୍ଭାବନା ରହିଛି। ଏସିଆନ୍ ଗେମ୍ସ ସେପ୍ଟେମ୍ବର ୧୯ରୁ ଅକ୍ଟୋବର ୪ ପର୍ଯ୍ୟନ୍ତ ହେବାକୁ ଥିବା ବେଳେ କ୍ରିକେଟ୍ ଇଭେଣ୍ଟ ସେପ୍ଟେମ୍ବର ୧୭ରୁ ଅକ୍ଟୋବର ୩ ପର୍ଯ୍ୟନ୍ତ ଚାଲିବ।

ପ୍ରଥମେ ମହିଳା କ୍ରିକେଟ୍ ଇଭେଣ୍ଟ ହେବ ଏବଂ ଏହାର ଫାଇନାଲ୍ ସେପ୍ଟେମ୍ବର ୨୨ରେ ଖେଳାଯିବ। ଏହାପରେ ପୁରୁଷ କ୍ରିକେଟ୍ ପ୍ରତିଯୋଗିତା ଆରମ୍ଭ ହେବ। ପୁରୁଷ ବିଭାଗରେ ୧୦ଟି ଦଳ ଏବଂ ମହିଳା ବିଭାଗରେ ୮ଟି ଦଳ ଅଂଶଗ୍ରହଣ କରିବେ।

ଆଇସିସି ରାଙ୍କିଙ୍ଗ୍ ଆଧାରରେ ଭାରତ, ପାକିସ୍ତାନ, ବାଂଲାଦେଶ ଓ ଶ୍ରୀଲଙ୍କା ସିଧାସଳଖ କ୍ୱାର୍ଟର ଫାଇନାଲ୍ ପର୍ଯ୍ୟାୟକୁ ପ୍ରବେଶ କରିଛନ୍ତି। ଅନ୍ୟ ଦଳଗୁଡ଼ିକ ଗ୍ରୁପ୍/ଲିଗ୍ ପର୍ଯ୍ୟାୟ ଖେଳି କ୍ୱାର୍ଟର ଫାଇନାଲ୍‌କୁ ଯିବେ।

ସେଡ୍ୟୁଲ୍ ଅନୁଯାୟୀ, ଗୁରୁତ୍ୱପୂର୍ଣ୍ଣ କ୍ୱାର୍ଟର ଫାଇନାଲ୍‌ଗୁଡ଼ିକ ସେପ୍ଟେମ୍ବର ୨୮ରେ ଖେଳାଯିବ। ଏହାପରେ ଅକ୍ଟୋବର ୧ରେ ସେମିଫାଇନାଲ୍ ଅନୁଷ୍ଠିତ ହେବ।

ଭାରତ ଓ ପାକିସ୍ତାନର ସମ୍ଭାବ୍ୟ ମୁକାବିଲା ଲିଗ୍ କିମ୍ବା କ୍ୱାର୍ଟର ଫାଇନାଲ୍‌ରେ ନୁହେଁ, ବରଂ ଅକ୍ଟୋବର ୩ରେ ହେବାକୁ ଥିବା ପଦକ ମ୍ୟାଚ୍‌ରେ ହୋଇପାରେ। ଉଭୟ ଦଳ ଯଦି ସ୍ୱର୍ଣ୍ଣ ପଦକ ମ୍ୟାଚ୍ ପାଇଁ ଯୋଗ୍ୟତା ହାସଲ କରନ୍ତି, ତେବେ ଫାଇନାଲ୍‌ରେ ଦୁଇ ଚିରପ୍ରତିଦ୍ୱନ୍ଦ୍ୱୀଙ୍କ ମହାମୁକାବିଲା ଦେଖିବାକୁ ମିଳିପାରେ। ନଚେତ୍ ତୃତୀୟ ସ୍ଥାନ ପ୍ଲେ-ଅଫ୍‌ରେ ମଧ୍ୟ ଦୁଇ ଦଳ ମୁହାଁମୁହିଁ ହେବାର ସମ୍ଭାବନା ରହିଛି।