ପେନ୍‌ସନ୍‌ଭୋଗୀଙ୍କ ପାଇଁ ଜରୁରୀ ଖବର। ଯଦି ଆପଣ ପେନ୍‌ସନ୍‌ ପାଉଛନ୍ତି, ତେବେ ୨୦୨୬ ମସିହାର ଜୀବନ ପ୍ରମାଣପତ୍ର ବା ଲାଇଫ୍ ସାର୍ଟିଫିକେଟ୍‌ ନଭେମ୍ବର ୩୦ ତାରିଖ ସୁଦ୍ଧା ଦାଖଲ କରିଦିଅନ୍ତୁ। ଧାର୍ଯ୍ୟ ସମୟ ମଧ୍ୟରେ ଏହା ଦାଖଲ ନକଲେ ପେନ୍‌ସନ୍‌ ଟଙ୍କା ପାଇବାରେ ବାଧା ସୃଷ୍ଟି ହୋଇପାରେ।

କ’ଣ ଏହି ଜୀବନ ପ୍ରମାଣପତ୍ର?

ଜୀବନ ପ୍ରମାଣ ବା Jeevan Pramaan ହେଉଛି ଆଧାର ଆଧାରିତ ଏକ ଡିଜିଟାଲ୍ ଲାଇଫ୍ ସାର୍ଟିଫିକେଟ୍‌। ପେନ୍‌ସନ୍‌ଭୋଗୀ ଜୀବିତ ଥିବାର ପ୍ରମାଣ ଭାବେ ଏହା କାମ କରେ। ଏହା ଦ୍ୱାରା ପେନ୍‌ସନ୍‌ ଦେଉଥିବା ବ୍ୟାଙ୍କ ବା ସଂସ୍ଥା ପେନ୍‌ସନ୍‌ଭୋଗୀଙ୍କ ଜୀବିତ ଥିବା ସମ୍ପର୍କରେ ନିଶ୍ଚିତ ହୋଇପାରେ।

ଘରେ ବସି କେମିତି ଦାଖଲ କରିବେ?

ପେନ୍‌ସନ୍‌ଭୋଗୀମାନେ UMANG ଆପ୍‌ରେ ଫେସ୍ ଅଥେଣ୍ଟିକେସନ୍‌ ମାଧ୍ୟମରେ ଡିଜିଟାଲ୍ ଲାଇଫ୍ ସାର୍ଟିଫିକେଟ୍‌ ଦାଖଲ କରିପାରିବେ। ଏହା ବ୍ୟତୀତ ନିକଟସ୍ଥ EPFO କାର୍ଯ୍ୟାଳୟ କିମ୍ବା କମନ୍ ସର୍ଭିସ୍ ସେଣ୍ଟର (CSC)କୁ ଯାଇ ମଧ୍ୟ ଏହି ପ୍ରକ୍ରିୟା ପୂରଣ କରିହେବ। ଇଣ୍ଡିଆ ପୋଷ୍ଟ ପେମେଣ୍ଟସ୍ ବ୍ୟାଙ୍କ (IPPB) ମାଧ୍ୟମରେ ମାଗଣା ଡୋରଷ୍ଟେପ୍‌ ସେବାର ସୁବିଧା ମଧ୍ୟ ରହିଛି।

କେଉଁ କାଗଜପତ୍ର ଦରକାର?

• ସକ୍ରିୟ ଆଧାର ନମ୍ବର

• ପେନ୍‌ସନ୍ ପେମେଣ୍ଟ ଅର୍ଡର (PPO) ନମ୍ବର

• ପେନ୍‌ସନ୍‌ ଦେଉଥିବା ବ୍ୟାଙ୍କ କିମ୍ବା ଡାକଘରର ବିବରଣୀ

• OTP ପାଇଁ ସକ୍ରିୟ ମୋବାଇଲ୍ ନମ୍ବର

ପେନ୍‌ସନ୍‌ଭୋଗୀଙ୍କ ଆଧାର ନମ୍ବର ପେନ୍‌ସନ୍‌ ଆକାଉଣ୍ଟ ସହ ଲିଙ୍କ୍ ଥିବା ଆବଶ୍ୟକ। ତେଣୁ ଶେଷ ତାରିଖକୁ ଅପେକ୍ଷା ନକରି ଆଗୁଆ ଏହି ପ୍ରକ୍ରିୟା ପୂରଣ କରିବାକୁ ପରାମର୍ଶ ଦିଆଯାଇଛି।

କେବେଠାରୁ ଦାଖଲ କରିପାରିବେ?

୮୦ ବର୍ଷ କିମ୍ବା ତା’ଠାରୁ ଅଧିକ ବୟସର ପେନ୍‌ସନ୍‌ଭୋଗୀ ଅକ୍ଟୋବର ୧ରୁ ଏହା ଦାଖଲ କରିପାରୁଛନ୍ତି। ଅନ୍ୟ ପେନ୍‌ସନ୍‌ଭୋଗୀଙ୍କ ପାଇଁ ନଭେମ୍ବର ୧ରୁ ଦାଖଲ ପ୍ରକ୍ରିୟା ଆରମ୍ଭ ହୋଇଛି। ସମସ୍ତଙ୍କ ପାଇଁ ଶେଷ ତାରିଖ ନଭେମ୍ବର ୩୦, ୨୦୨୬।

ସେହିପରି ପେନ୍‌ସନ୍‌ ଟଙ୍କା ନିରବଚ୍ଛିନ୍ନ ଭାବେ ପାଇବା ପାଇଁ ଧାର୍ଯ୍ୟ ସମୟ ମଧ୍ୟରେ ଜୀବନ ପ୍ରମାଣପତ୍ର ଦାଖଲ କରିବା ସହ ଏହା ସଫଳତାର ସହ ଗ୍ରହଣ ହୋଇଛି କି ନାହିଁ ତାହା ମଧ୍ୟ ଯାଞ୍ଚ କରିନିଅନ୍ତୁ।