ଆମେରିକା-ଇରାନ ମଧ୍ୟରେ ତିକ୍ତତା ପୁଣି ବଢ଼ିବାର ସଙ୍କେତ ମିଳିଛି। ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଇରାନ ବିରୋଧରେ ପୁଣି ଏକ ସାମରିକ ଅଭିଯାନ ଆରମ୍ଭ ହୋଇପାରେ ବୋଲି ସଙ୍କେତ ଦେଇଛନ୍ତି। ଫ୍ଲୋରିଡାରେ ଏକ ସଭାରେ ସେ ଆମେରିକା ପୁଣି ଏକ ସାମରିକ ଅଭିଯାନ କରିପାରେ ବୋଲି କହିଥିଲେ।

ଟ୍ରମ୍ପଙ୍କ ଏହି ବୟାନ ପରେ ଇରାନ ପକ୍ଷରୁ ମଧ୍ୟ କଠୋର ପ୍ରତିକ୍ରିୟା ଆସିଛି। ଦୁଇଜଣ ଇରାନୀ ସୁରକ୍ଷା ଅଧିକାରୀଙ୍କ ସୂଚନା ଅନୁସାରେ, ଆମେରିକା ଓ ଇସ୍ରାଏଲ୍ ପୁଣି ଇରାନ ଉପରେ ଆକ୍ରମଣ କଲେ ଗଲ୍ଫ ଅଞ୍ଚଳର ସମୁଦ୍ରତଳ ଯୋଗାଯୋଗ କେବୁଲ୍‌କୁ ଟାର୍ଗେଟ କରିବା ପାଇଁ ତେହରାନ୍ ପକ୍ଷରୁ ଯୋଜନା ପ୍ରସ୍ତୁତ ରହିଛି।

ବିଶେଷକରି ହର୍ମୁଜ୍ ପ୍ରଣାଳୀ ତଳେ ଯାଇଥିବା ଅନେକ ମୁଖ୍ୟ ସମୁଦ୍ରତଳ ଇଣ୍ଟରନେଟ୍ କେବୁଲ୍‌କୁ ଟାର୍ଗେଟ କରାଯାଇପାରେ ବୋଲି ଇରାନୀ ରିଭଲ୍ୟୁସନାରୀ ଗାର୍ଡ୍ସର ଅଧିକାରୀ ୟାଦୋଲ୍ଲା ଜାଭାନୀଙ୍କ ପକ୍ଷରୁ ଚେତାବନୀ ଦିଆଯାଇଛି। ରିପୋର୍ଟ ଅନୁସାରେ, କେବୁଲ୍ କଟିଲେ ମରାମତିକୁ ମଧ୍ୟ ବାଧା ଦେବା ଉଦ୍ଦେଶ୍ୟ ଥାଇପାରେ।

ସମୁଦ୍ରତଳ କେବୁଲ୍ ବିଶ୍ୱର ଇଣ୍ଟରନେଟ୍ ଓ ଡିଜିଟାଲ୍ ଯୋଗାଯୋଗ ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ତେବେ ହର୍ମୁଜ୍ ପ୍ରଣାଳୀ ଦେଇ ଆନ୍ତର୍ଜାତୀୟ ବ୍ୟାଣ୍ଡୱିଡ୍‌ଥର ଏକ ଛୋଟ ଅଂଶ ଯାଉଥିବାରୁ କେବୁଲ୍‌ରେ କ୍ଷତି ହେଲେ ତାହାର ପ୍ରଭାବ ବିଶ୍ୱବ୍ୟାପୀ ଇଣ୍ଟରନେଟ୍ ବନ୍ଦ ଭଳି ହେବା ଆବଶ୍ୟକ ନୁହେଁ। ତଥାପି ଏକାଧିକ କେବୁଲ୍ କଟିଲେ ଅଞ୍ଚଳୀୟ ଇଣ୍ଟରନେଟ୍ ସେବା, ଅନଲାଇନ୍ ଆର୍ଥିକ କାରବାର, ଇ-କମର୍ସ ଓ କ୍ଲାଉଡ୍ ସେବା ପ୍ରଭାବିତ ହୋଇପାରେ।

ଏପରି ସମ୍ଭାବ୍ୟ ସାମରିକ ଉତ୍ତେଜନାକୁ ନେଇ ଫ୍ରାନ୍ସ, ତୁର୍କୀ ଓ ଅନ୍ୟ କିଛି ଦେଶ ମଧ୍ୟ ଚିନ୍ତା ପ୍ରକାଶ କରିଛନ୍ତି। ନୂଆ ଆକ୍ରମଣ ହେଲେ ଯୁଦ୍ଧ ଆହୁରି ବ୍ୟାପକ ହୋଇପାରେ ଏବଂ ତୈଳ ମୂଲ୍ୟ ସହିତ ବିଶ୍ୱ ଅର୍ଥନୀତି ଉପରେ ମଧ୍ୟ ପ୍ରଭାବ ପଡ଼ିପାରେ ବୋଲି ଚେତାବନୀ ଦିଆଯାଇଛି।

ବର୍ତ୍ତମାନ ପରିସ୍ଥିତିରେ ଆମେରିକାର ପରବର୍ତ୍ତୀ ପଦକ୍ଷେପ ଏବଂ ଇରାନର ପ୍ରତିକ୍ରିୟା ଉପରେ ମଧ୍ୟପ୍ରାଚ୍ୟ ସହିତ ସାରା ବିଶ୍ୱର ନଜର ରହିଛି।