୧୩୦ ସାଇକ୍ଲୋନ୍ ସେଲ୍ଟରରେ ମହଜୁଦ ରହିବ ଜରୁରୀ ସାମଗ୍ରୀ

ବାତ୍ୟାର ପ୍ରଭାବ ପଡ଼ିଲେ ତଳିଆ ଓ ବିପଦପ୍ରବଣ ଅଞ୍ଚଳର ଲୋକଙ୍କୁ ଆବଶ୍ୟକତା ଅନୁଯାୟୀ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯିବ। ଏଥିପାଇଁ ଜିଲ୍ଲାର ୧୩୦ଟି ସାଇକ୍ଲୋନ୍ ସେଲ୍ଟରକୁ ପ୍ରସ୍ତୁତ ଓ କାର୍ଯ୍ୟକ୍ଷମ ରଖାଯାଇଛି।

ସେଲ୍ଟରଗୁଡ଼ିକରେ ପାନୀୟ ଜଳ, ଶୁଖିଲା ଖାଦ୍ୟ, ଜୀବନରକ୍ଷକ ଔଷଧ ଓ ଅନ୍ୟାନ୍ୟ ଆବଶ୍ୟକ ସାମଗ୍ରୀ ମହଜୁଦ ରଖାଯାଇଥିବା ଜଣାପଡ଼ିଛି। ଜରୁରୀ ପରିସ୍ଥିତିରେ ଲୋକଙ୍କୁ ଶୀଘ୍ର ଆଶ୍ରୟ ଦେବା ଓ ଉଦ୍ଧାର କାର୍ଯ୍ୟକୁ ସୁଗମ କରିବା ଏହି ପ୍ରସ୍ତୁତିର ମୁଖ୍ୟ ଉଦ୍ଦେଶ୍ୟ।

୩୭୩ ସମ୍ବେଦନଶୀଳ ସ୍ଥାନ ଚିହ୍ନଟ

ସମ୍ଭାବ୍ୟ ବାତ୍ୟାକୁ ଦୃଷ୍ଟିରେ ରଖି କେନ୍ଦ୍ରାପଡ଼ା ଜିଲ୍ଲାର ୧୧୩ଟି ପଞ୍ଚାୟତ ଅଧୀନରେ ୩୭୩ଟି ସମ୍ବେଦନଶୀଳ ସ୍ଥାନ ଚିହ୍ନଟ କରାଯାଇଛି। ଏହି ଅଞ୍ଚଳର ଲୋକଙ୍କୁ ଆବଶ୍ୟକ ହେଲେ ଆଗୁଆ ସୁରକ୍ଷିତ ସ୍ଥାନକୁ ନେବା ପାଇଁ ପ୍ରଶାସନ ପକ୍ଷରୁ ଯୋଜନା ପ୍ରସ୍ତୁତ ରହିଛି।

ରାଜ୍ୟ ସ୍ତରରେ ମଧ୍ୟ ଜିଲ୍ଲାପାଳମାନଙ୍କୁ contingency plan ପ୍ରସ୍ତୁତ ରଖିବା, ତଳିଆ ଅଞ୍ଚଳର ଲୋକଙ୍କୁ ଚିହ୍ନଟ କରିବା ଓ ଆବଶ୍ୟକ ସମୟରେ ଆଶ୍ରୟସ୍ଥଳକୁ ସ୍ଥାନାନ୍ତର କରିବାକୁ ନିର୍ଦ୍ଦେଶ ଦିଆଯାଇଛି।

ସରକାରୀ କର୍ମଚାରୀଙ୍କ ଛୁଟି ବାତିଲ

ବାତ୍ୟା ପ୍ରସ୍ତୁତିକୁ ଅଧିକ ଗୁରୁତ୍ୱ ଦେଇ କେନ୍ଦ୍ରାପଡ଼ା ଜିଲ୍ଲା ପ୍ରଶାସନ ଆସନ୍ତା ସପ୍ତାହ ପାଇଁ ସରକାରୀ କର୍ମଚାରୀଙ୍କ ଛୁଟି ବାତିଲ କରିଛି। ଛୁଟିରେ ଥିବା କର୍ମଚାରୀମାନେ କାର୍ଯ୍ୟସ୍ଥଳକୁ ଫେରି ପ୍ରସ୍ତୁତି କାର୍ଯ୍ୟରେ ସାମିଲ ହେବାକୁ କୁହାଯାଇଛି। ଜରୁରୀ ସମୟରେ ପ୍ରଶାସନିକ ପ୍ରତିକ୍ରିୟା ଓ ଉଦ୍ଧାର କାର୍ଯ୍ୟରେ ଯେପରି ବିଳମ୍ବ ନହୁଏ, ସେଥିପାଇଁ ଏହି ପଦକ୍ଷେପ ନିଆଯାଇଛି।

ଗଜଲକ୍ଷ୍ମୀ ପୂଜାକୁ ନେଇ ମଧ୍ୟ ସତର୍କତା

କେନ୍ଦ୍ରାପଡ଼ାରେ ଏବେ ଗଜଲକ୍ଷ୍ମୀ ପୂଜା ଚାଲିଥିବାରୁ ପୂଜା କମିଟିଗୁଡ଼ିକୁ ମଧ୍ୟ ପ୍ରଶାସନ ପକ୍ଷରୁ ସତର୍କ କରାଯାଇଛି। ସମ୍ଭାବ୍ୟ ବାତ୍ୟାରେ ଜୋର ପବନ ଯୋଗୁଁ କୌଣସି ଅଘଟଣ ନଘଟିବା ପାଇଁ ପୂଜା ତୋରଣ ହଟାଇବାକୁ କୁହାଯାଇଛି। ପୂଜା ମଣ୍ଡପଗୁଡ଼ିକର ସୁରକ୍ଷା ବ୍ୟବସ୍ଥାକୁ ମଧ୍ୟ ମଜବୁତ କରାଯାଇଛି।

ବାତ୍ୟା ନେଇ ରାଜ୍ୟରେ ହାଇଆଲର୍ଟ

ବଙ୍ଗୋପସାଗରରେ ଥିବା ଲଘୁଚାପ ଅକ୍ଟୋବର ୨୪ରେ ଅବପାତ ଏବଂ ୨୫ରେ ଗଭୀର ଅବପାତରେ ପରିଣତ ହୋଇ ୨୬ ତାରିଖ ସକାଳ ସୁଦ୍ଧା ସାଇକ୍ଲୋନିକ୍ ଷ୍ଟର୍ମରେ ପରିଣତ ହେବାର ଜୋରଦାର ସମ୍ଭାବନା ରହିଛି ବୋଲି IMD କହିଛି। ଏହା ପରେ ଏହା ଉତ୍ତର ଆନ୍ଧ୍ରପ୍ରଦେଶ ଓ ସଂଲଗ୍ନ ଦକ୍ଷିଣ ଓଡ଼ିଶା ଉପକୂଳ ଆଡ଼କୁ ଗତି କରିପାରେ।

ଅକ୍ଟୋବର ୨୬ରୁ ଓଡ଼ିଶାରେ ବର୍ଷା ଆରମ୍ଭ ହେବା ସହ ୨୬ରୁ ୨୮ ମଧ୍ୟରେ ବିଭିନ୍ନ ଜିଲ୍ଲାରେ ପ୍ରବଳରୁ ଅତି ପ୍ରବଳ ବର୍ଷାର ଆଶଙ୍କା ରହିଛି। କେନ୍ଦ୍ରାପଡ଼ା ସମେତ ଅନେକ ଜିଲ୍ଲାକୁ ସତର୍କତା ଜାରି କରାଯାଇଛି।

ଲୋକଙ୍କୁ ସତର୍କ ରହିବାକୁ ପରାମର୍ଶ

ରାଜ୍ୟ ସରକାର ‘ଜିରୋ କାଜୁଆଲିଟି’ ନୀତିକୁ ଗୁରୁତ୍ୱ ଦେଇ ପ୍ରସ୍ତୁତି ଚଳାଇଛନ୍ତି। NDRF, ODRAF ଓ ଅଗ୍ନିଶମ ବାହିନୀକୁ ମଧ୍ୟ ପ୍ରସ୍ତୁତ ରଖାଯାଇଛି। ସମୁଦ୍ରକୁ ଯାଇଥିବା ମତ୍ସ୍ୟଜୀବୀଙ୍କୁ ତୁରନ୍ତ ଫେରିଆସିବାକୁ ପରାମର୍ଶ ଦିଆଯାଇଛି।

ପ୍ରଶାସନ ପକ୍ଷରୁ ଲୋକଙ୍କୁ ଆତଙ୍କିତ ନହୋଇ ସରକାରୀ ସୂଚନା ଓ IMDର ଅପଡେଟ୍‌ ଉପରେ ଭରସା କରିବାକୁ କୁହାଯାଇଛି। ବାତ୍ୟାର ତୀବ୍ରତା ଓ ଗତିପଥ ସମ୍ପର୍କରେ ଆଗାମୀ ପାଣିପାଗ ବୁଲେଟିନ୍‌ ଅନୁଯାୟୀ ପରିସ୍ଥିତି ଆହୁରି ସ୍ପଷ୍ଟ ହେବ।