ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ପୁଣିଥରେ ଭାରତ-ପାକିସ୍ତାନ ସାମରିକ ସଂଘର୍ଷ ବନ୍ଦ କରିବାର ଶ୍ରେୟ ନେଇଛନ୍ତି। ଫ୍ଲୋରିଡାରେ ଏକ ନିର୍ବାଚନୀ ରାଲିକୁ ସମ୍ବୋଧିତ କରି ସେ କହିଛନ୍ତି ଯେ, ଭାରତ ଓ ପାକିସ୍ତାନ ମଧ୍ୟରେ ଲଢ଼େଇ ଜାରି ରହିଲେ ଉଭୟ ଦେଶ ଉପରେ ୨୫୦ ପ୍ରତିଶତ ଶୁଳ୍କ ଲାଗୁ କରାଯିବ ବୋଲି ସେ ଚେତାବନୀ ଦେଇଥିଲେ।

ଟ୍ରମ୍ପଙ୍କ ଦାବି ଅନୁସାରେ, ଏହି ଧମକ ପରେ ଉଭୟ ଦେଶ ଅସନ୍ତୁଷ୍ଟ ହୋଇଥିଲେ ମଧ୍ୟ ଶେଷରେ ଗୁଳିଚାଳନା ବନ୍ଦ କରିଥିଲେ ଏବଂ ସଂଘର୍ଷ ଶେଷ ହୋଇଥିଲା। ସେ ଏହା ମଧ୍ୟ ଦାବି କରିଛନ୍ତି ଯେ ସଂଘର୍ଷ ସମୟରେ ୧୧ଟି ବିମାନ ଖସାଯାଇଥିଲା ଏବଂ ସେ ଅନେକ ଯୁଦ୍ଧ ବନ୍ଦ କରିବାରେ ଭୂମିକା ନେଇଛନ୍ତି।

ତେବେ ଟ୍ରମ୍ପଙ୍କ ଏହି ଦାବି ସହ ଭାରତର ଅବସ୍ଥାନ ଭିନ୍ନ। ଭାରତ ପୂର୍ବରୁ ସ୍ପଷ୍ଟ କରିଛି ଯେ, ଅପରେସନ ସିନ୍ଦୂର ସମୟରେ ଅସ୍ତ୍ରବିରତି ପାଇଁ କୌଣସି ତୃତୀୟ ପକ୍ଷର ମଧ୍ୟସ୍ଥତା ହୋଇନଥିଲା। ଭାରତୀୟ ପକ୍ଷ ଅନୁସାରେ, ମେ’ ୧୦ ତାରିଖରେ ପାକିସ୍ତାନର ଡିଜିଏମଓ ତାଙ୍କ ଭାରତୀୟ ପ୍ରତିପକ୍ଷଙ୍କ ସହ ଯୋଗାଯୋଗ କରି ସାମରିକ କାର୍ଯ୍ୟାନୁଷ୍ଠାନ ବନ୍ଦ କରିବାକୁ ଅନୁରୋଧ କରିଥିଲେ।

ପହଲଗାମ ଆତଙ୍କବାଦୀ ଆକ୍ରମଣ ପରେ ଭାରତ ମେ’ ୭ ତାରିଖରେ ଅପରେସନ ସିନ୍ଦୂର ଆରମ୍ଭ କରିଥିଲା। ଏଥିରେ ପାକିସ୍ତାନ ଓ ପାକ୍-ଅଧିକୃତ କାଶ୍ମୀରରେ ଥିବା ଆତଙ୍କବାଦୀ ଢାଞ୍ଚାକୁ ଟାର୍ଗେଟ କରାଯାଇଥିଲା। ଏହା ପରେ ଉଭୟ ଦେଶ ମଧ୍ୟରେ ସାମରିକ ଉତ୍ତେଜନା ବଢ଼ିଥିଲା।

ଟ୍ରମ୍ପ ଏହି ଘଟଣାକୁ ନିଜର କୂଟନୈତିକ ସଫଳତା ବୋଲି ବାରମ୍ବାର ଦାବି କରୁଥିବା ବେଳେ, ଭାରତ ତାଙ୍କ ଦାବିକୁ ଖଣ୍ଡନ କରିଆସୁଛି।