ବଙ୍ଗୋପସାଗରରେ ସୃଷ୍ଟି ହୋଇଥିବା ସୁସ୍ପଷ୍ଟ ଲଘୁଚାପ କ୍ରମଶଃ ଶକ୍ତିଶାଳୀ ହେଉଛି। ଭାରତୀୟ ପାଣିପାଗ ବିଭାଗ (IMD)ର ବର୍ତ୍ତମାନର ଆକଳନ ଅନୁଯାୟୀ, ଏହା ୨୪ ଅକ୍ଟୋବରରେ ଅବପାତରେ, ୨୫ ଅକ୍ଟୋବରରେ ଗଭୀର ଅବପାତରେ ଏବଂ ୨୬ ଅକ୍ଟୋବର ସକାଳ ସୁଦ୍ଧା ବାତ୍ୟାରେ ପରିଣତ ହୋଇପାରେ। ଏହା ପରେ ଏହା ପଶ୍ଚିମ-ଉତ୍ତରପଶ୍ଚିମ ଦିଗକୁ ଗତି କରି ୨୮ ତାରିଖ ସକାଳ ସୁଦ୍ଧା ଆନ୍ଧ୍ରପ୍ରଦେଶ ଉପକୂଳ ନିକଟରେ ପହଞ୍ଚିବାର ସମ୍ଭାବନା ରହିଛି।

ତେବେ ଏହି ସମ୍ଭାବ୍ୟ ବାତ୍ୟାରଠିକ୍ ଗତିପଥ ଓ ସ୍ଥଳଭାଗ ଛୁଇଁବାର ସ୍ଥାନ ଏବେ ବି ସ୍ପଷ୍ଟ ନୁହେଁ। ବିଭିନ୍ନ ଆନ୍ତର୍ଜାତୀୟ ଓ ଜାତୀୟ ପାଣିପାଗ ମଡେଲ୍ ଭିନ୍ନ ଭିନ୍ନ ଆକଳନ ଦେଉଥିବାରୁ ଆନ୍ଧ୍ର ଉପକୂଳ ଓ ଦକ୍ଷିଣ ଓଡ଼ିଶାକୁ ନେଇ ନଜର ରହିଛି।

କେଉଁ ମଡେଲ୍ କ'ଣ କହୁଛି?

ପାଣିପାଗ ମଡେଲ୍ଗୁଡ଼ିକର ଆକଳନରେ ଏବେ ମଧ୍ୟ ଭିନ୍ନତା ଦେଖାଯାଉଛି। ECMWF ମଡେଲ୍ ସମ୍ଭାବ୍ୟ ସିଷ୍ଟମ୍କୁ ଆନ୍ଧ୍ରପ୍ରଦେଶ ଉପକୂଳ ଆଡ଼କୁ ନେଇଯାଉଥିବା ଦର୍ଶାଉଛି। କିଛି ଆକଳନରେ କାକିନାଡ଼ା ନିକଟରେ ସ୍ଥଳଭାଗ ଛୁଇଁବାର ସମ୍ଭାବନା ଦର୍ଶାଯାଇଥିବା ବେଳେ, ଅନ୍ୟ ମଡେଲ୍ଗୁଡ଼ିକ ଆନ୍ଧ୍ର ଉପକୂଳର ଅନ୍ୟ ଅଞ୍ଚଳକୁ ସମ୍ଭାବ୍ୟ ଗତିପଥ ଭାବେ ଦେଖାଉଛନ୍ତି।

ECMWF ଆକଳନରେ ସ୍ଥଳଭାଗ ଛୁଇଁବା ସମୟରେ ପବନର ବେଗ୧୪୦ କିମି ପ୍ରତିଘଣ୍ଟାରୁ ଅଧିକହୋଇପାରେ ବୋଲି ପ୍ରକାଶିତ ରିପୋର୍ଟରେ ଦର୍ଶାଯାଇଛି। ଅନ୍ୟପକ୍ଷରେ GFS ଓ ICON ଭଳି ମଡେଲ୍ଗୁଡ଼ିକ ମଧ୍ୟ ସିଷ୍ଟମ୍ର ତୀବ୍ରତା ବଢ଼ିବାର ସମ୍ଭାବନା ଦେଖାଉଛନ୍ତି।

ତେବେ ଏସବୁମଡେଲ୍ ଆକଳନ, ଚୂଡ଼ାନ୍ତ ପୂର୍ବାନୁମାନ ନୁହେଁ। ସିଷ୍ଟମ୍ଟି ଅଧିକ ସଂଗଠିତ ହେବା ପରେ ଏହାର ଗତିପଥ ଓ ତୀବ୍ରତା ସମ୍ପର୍କରେ ଅଧିକ ସ୍ପଷ୍ଟତା ଆସିବ।

ଓଡ଼ିଶା ପାଇଁ କେତେ ବଡ଼ ବିପଦ?

ବର୍ତ୍ତମାନର ଆକଳନରେ ସିଧାସଳଖ ସ୍ଥଳଭାଗ ଛୁଇଁବାର ସମ୍ଭାବନା ଆନ୍ଧ୍ରପ୍ରଦେଶ ଉପକୂଳ ଆଡ଼କୁ ଅଧିକ ଦେଖାଯାଉଛି। ଯଦି ସିଷ୍ଟମ୍ ଆନ୍ଧ୍ର ଉପକୂଳରେ ସ୍ଥଳଭାଗ ଛୁଏ, ତେବେ ଓଡ଼ିଶା ଉପରେ ସିଧାସଳଖ ବାତ୍ୟା ମାଡ଼ର ଆଶଙ୍କା କମିପାରେ। କିନ୍ତୁ ଏହାର ଅର୍ଥ ଓଡ଼ିଶା ସମ୍ପୂର୍ଣ୍ଣ ପ୍ରଭାବମୁକ୍ତ ରହିବ ନାହିଁ।

ବିଶେଷକରି ଦକ୍ଷିଣ ଓଡ଼ିଶାରଗଞ୍ଜାମ, ଗଜପତି ଓ ଅନ୍ୟ ଉପକୂଳବର୍ତ୍ତୀ ଅଞ୍ଚଳରେପ୍ରବଳ ବର୍ଷା ଓ ଝଡ଼ ପବନର ପ୍ରଭାବ ରହିପାରେ। IMD ମଧ୍ୟ ଆସନ୍ତା ଦିନଗୁଡ଼ିକରେ ଓଡ଼ିଶାର ବିଭିନ୍ନ ଜିଲ୍ଲାରେ ବର୍ଷା ଓ ଜୋର୍ ପବନର ସମ୍ଭାବନା ଦର୍ଶାଇଛି।

୨୬ରୁ ସମୁଦ୍ର ଅଶାନ୍ତ, ମତ୍ସ୍ୟଜୀବୀଙ୍କୁ ସତର୍କତା

IMD ଅନୁଯାୟୀ, ୨୬ ଅକ୍ଟୋବରରୁ ପଶ୍ଚିମ-କେନ୍ଦ୍ରୀୟ ଓ ସଂଲଗ୍ନ ପୂର୍ବ-କେନ୍ଦ୍ରୀୟ ବଙ୍ଗୋପସାଗରରେ ଝଡ଼ ପବନର ବେଗ ୭୦–୮୦ କିମି ପ୍ରତିଘଣ୍ଟା ଏବଂ ଝଟକାରେ ୯୦ କିମି ପ୍ରତିଘଣ୍ଟା ଯାଏଁ ପହଞ୍ଚିପାରେ। ଏହି କାରଣରୁ ୨୬ରୁ ୨୮ ଅକ୍ଟୋବର ମଧ୍ୟରେ ସମୁଦ୍ରକୁ ନଯିବା ପାଇଁ ମତ୍ସ୍ୟଜୀବୀଙ୍କୁ ସତର୍କ କରାଯାଇଛି।

ଚୂଡ଼ାନ୍ତ ଗତିପଥ ପାଇଁ ଆଉ କିଛି ସମୟ

ବର୍ତ୍ତମାନ ସବୁଠାରୁ ବଡ଼ ପ୍ରଶ୍ନ ହେଉଛି—ସମ୍ଭାବ୍ୟ ବାତ୍ୟା କେଉଁଠି ସ୍ଥଳଭାଗ ଛୁଇଁବ? ମଡେଲ୍ଗୁଡ଼ିକ ଆନ୍ଧ୍ର ଉପକୂଳକୁ ଅଧିକ ସମ୍ଭାବ୍ୟ ଅଞ୍ଚଳ ଭାବେ ଦେଖାଉଥିଲେ ମଧ୍ୟ ଗତିପଥ ଏବେ ଚୂଡ଼ାନ୍ତ ହୋଇନାହିଁ।

ସିଷ୍ଟମ୍ ଅବପାତ ଓ ପରବର୍ତ୍ତୀ ପର୍ଯ୍ୟାୟରେ ଅଧିକ ଶକ୍ତିଶାଳୀ ହେବା ପରେ ଏହାର ଗତି, ଦିଗ ଓ ତୀବ୍ରତା ସମ୍ପର୍କରେ ଅଧିକ ସ୍ପଷ୍ଟ ଚିତ୍ର ମିଳିବ। ତେଣୁ ଲୋକଙ୍କୁ ବିଭିନ୍ନ ମଡେଲ୍ର ଅନୁମାନ ନେଇ ଆତଙ୍କିତ ନହୋଇIMD ଓ ସରକାରୀ ସତର୍କତାକୁ ଅନୁସରଣ କରିବାକୁପରାମର୍ଶ ଦିଆଯାଉଛି।