ଭାରତୀୟ ମହିଳା କ୍ରିକେଟ୍‌ରେ ଆସିଛି ଏକ ବଡ଼ ଖବର। ଭାରତୀୟ ବ୍ୟାଟର ସବ୍ବିନେନି ମେଘନା ୩୦ ବର୍ଷ ବୟସରେ ସମସ୍ତ ଫର୍ମାଟ୍‌ରୁ କ୍ରିକେଟ୍‌ ଅବସର ଘୋଷଣା କରିଛନ୍ତି। ସୋସିଆଲ୍ ମିଡିଆ ପୋଷ୍ଟ ମାଧ୍ୟମରେ ସେ ନିଜ ନିଷ୍ପତ୍ତି ବିଷୟରେ ଜଣାଇଛନ୍ତି।

ମେଘନା ୨୦୧୬ ମସିହାରେ ୱେଷ୍ଟଇଣ୍ଡିଜ୍‌ ବିପକ୍ଷରେ T20I ଡେବ୍ୟୁ କରିଥିଲେ। ୨୦୨୨ରେ ନ୍ୟୁଜିଲାଣ୍ଡ ବିପକ୍ଷରେ ସେ ଦିନିକିଆ (ODI) ଡେବ୍ୟୁ କରିଥିଲେ। ଭାରତ ପାଇଁ ସେ ୩ଟି ODIରେ ୧୧୪ ରନ୍‌ ଏବଂ ୧୭ଟି T20Iରେ ୨୫୮ ରନ୍‌ କରିଛନ୍ତି।

ତାଙ୍କ କ୍ୟାରିୟରର ଏକ ବଡ଼ ସଫଳତା ଥିଲା ୨୦୨୨ Commonwealth Games। ବର୍ମିଂହାମ୍‌ରେ ମହିଳା କ୍ରିକେଟ୍‌ ପ୍ରଥମଥର ପାଇଁ Commonwealth Gamesରେ ସାମିଲ ହୋଇଥିବା ବେଳେ ଭାରତ ଫାଇନାଲ୍‌ରେ ପହଞ୍ଚି ରୌପ୍ୟ ପଦକ ଜିତିଥିଲା। ମେଘନା ସେହି ଦଳର ଅଂଶ ଥିଲେ।

ଘରୋଇ କ୍ରିକେଟ୍‌ରେ ମଧ୍ୟ ମେଘନାଙ୍କ ରେକର୍ଡ ଉଲ୍ଲେଖନୀୟ। ୨୦୨୧-୨୨ Women's Senior One Day Trophyରେ ସେ ୩୮୮ ରନ୍‌ କରି ଟୁର୍ଣ୍ଣାମେଣ୍ଟର ସର୍ବାଧିକ ରନ୍‌ ସ୍କୋରର ହୋଇଥିଲେ। ଏଥିରେ ଗୋଟିଏ ଶତକ ଓ ଦୁଇଟି ଅର୍ଦ୍ଧଶତକ ରହିଥିଲା।

Women's Premier Leagueରେ ମଧ୍ୟ ମେଘନା ଖେଳିଛନ୍ତି। ୨୦୨୩ରେ ସେ Gujarat Giants ପକ୍ଷରୁ ଖେଳିଥିବା ବେଳେ ୨୦୨୪ରେ Royal Challengers Bengaluruରେ ସାମିଲ ହୋଇଥିଲେ। RCBର ଐତିହାସିକ ପ୍ରଥମ WPL ଟାଇଟଲ୍‌ ବିଜୟୀ ଦଳରେ ମଧ୍ୟ ସେ ଥିଲେ।

ଅବସର ଘୋଷଣା କରି ମେଘନା କହିଛନ୍ତି ଯେ ଖେଳାଳି ଭାବେ ତାଙ୍କ ଯାତ୍ରା ଶେଷ ହେଉଥିଲେ ମଧ୍ୟ କ୍ରିକେଟ୍‌ ସହ ତାଙ୍କ ସମ୍ପର୍କ କେବେ ଶେଷ ହେବ ନାହିଁ। ଆଗାମୀ ପିଢ଼ିର ଖେଳାଳିଙ୍କୁ ମେଣ୍ଟର କରିବା ଏବଂ କ୍ରିକେଟ୍‌ ପାଇଁ ନିଜ ଅଭିଜ୍ଞତା ଦେବାକୁ ସେ ଇଚ୍ଛା ପ୍ରକାଶ କରିଛନ୍ତି।