ଉତ୍ତରପ୍ରଦେଶର ବାରାଣସୀର କାଶୀ ବିଦ୍ୟାପୀଠ ବ୍ଲକ୍ ଅନ୍ତର୍ଗତ ଊଞ୍ଚ ଗାଁର ନୀତୁ ସିଂହଙ୍କ କାହାଣୀ ଆଧୁନିକ କୃଷି ଓ ମହିଳା ସଶକ୍ତିକରଣର ଏକ ଉଦାହରଣ ପାଲଟିଛି। ଚାଷ ଜମିରେ ଡ୍ରୋନ୍ ମାଧ୍ୟମରେ ସାର ଓ କୀଟନାଶକ ଛିଞ୍ଚିବା କାମ କରି ସେ ଏବେ ‘ନମୋ ଡ୍ରୋନ୍ ଦିଦି’ ଭାବେ ପରିଚିତ।

ନୀତୁଙ୍କ ଜନ୍ମ ମିର୍ଜାପୁରରେ ହୋଇଥିବାବେଳେ ତାଙ୍କ ପିଲାଦିନ ଓ ପାଠପଢ଼ା ମୁମ୍ବାଇରେ କଟିଥିଲା। ବିବାହ ପରେ ସେ ଗାଁକୁ ଆସି ଏକ ସ୍ୱୟଂ ସହାୟକ ଗୋଷ୍ଠୀ ସହ ଯୋଡ଼ି ହୋଇଥିଲେ। ୨୦୨୪ ଜାନୁଆରୀରେ ସେ ‘ସଖୀ ଡ୍ରୋନ୍’ ଯୋଜନା ସମ୍ପର୍କରେ ଜାଣି ଆବେଦନ କରିଥିଲେ। ପ୍ରୟାଗରାଜର ଫୁଲପୁରରେ ସେ ଡ୍ରୋନ୍ ଚଳାଇବା, ଯାନ ଚଳାଇବା ଓ ଏହାର ବୈଷୟିକ ଦିଗ ସମ୍ପର୍କରେ ପ୍ରଶିକ୍ଷଣ ନେଇଥିଲେ।

୨୦୨୪ ମେ’ରେ ସରକାରଙ୍କ ପକ୍ଷରୁ ନୀତୁଙ୍କୁ ଏକ ଡ୍ରୋନ୍, ତିନିଚକିଆ ଇଲେକ୍ଟ୍ରିକ୍ ଯାନ ଏବଂ ଜେନେରେଟର ମିଳିଥିଲା। ଏହି ସାମଗ୍ରୀର ଆନୁମାନିକ ମୂଲ୍ୟ ପ୍ରାୟ ୧୫ ଲକ୍ଷ ଟଙ୍କା ଥିଲା। ତେବେ ଡ୍ରୋନ୍ ପାଇବା ପରେ ସବୁଠାରୁ ବଡ଼ ଚ୍ୟାଲେଞ୍ଜ ଥିଲା କୃଷକଙ୍କ ଭରସା ଜିତିବା।

ଆରମ୍ଭରେ ଅନେକ କୃଷକ ଡ୍ରୋନ୍ ଦ୍ୱାରା ଜମିରେ ସାର ଓ ଔଷଧ ଛିଞ୍ଚିବା ନେଇ ସନ୍ଦେହ କରୁଥିଲେ। ନୀତୁ ପ୍ରାୟ ୨୦ରୁ ୨୫ ଏକର ଜମିରେ ମାଗଣାରେ ଛିଞ୍ଚନ କରି ଏହାର ପ୍ରଭାବ ଦେଖାଇଥିଲେ। ଫସଲ ଭଲ ହେବା ପରେ କୃଷକମାନେ ତାଙ୍କୁ ପୁଣି ଡାକିବା ଆରମ୍ଭ କରିଥିଲେ।

ଧୀରେ ଧୀରେ ନୀତୁଙ୍କ କାମ ବାରାଣସୀର ଅନ୍ୟ ଅଞ୍ଚଳକୁ ବ୍ୟାପିଥିଲା। ଜୌନପୁର, ଆଜମଗଡ଼, ମିର୍ଜାପୁର, ସୋନଭଦ୍ର ଓ ଚନ୍ଦୌଲି ଭଳି ଜିଲ୍ଲାରୁ ମଧ୍ୟ ତାଙ୍କୁ ଡାକରା ଆସିବାକୁ ଲାଗିଲା। ଏପରିକି ବିହାରରୁ ମଧ୍ୟ ତାଙ୍କ ସେବା ପାଇଁ ଅନୁରୋଧ ଆସୁଛି।

ଡ୍ରୋନ୍ ମାଧ୍ୟମରେ ଏକ ଏକର ଜମିରେ ୟୁରିଆ ଛିଞ୍ଚିବାକୁ ପ୍ରାୟ ୧୫ ମିନିଟ୍ ସମୟ ଲାଗୁଥିବାବେଳେ ଗୋଟିଏ ଦିନରେ ସେ ପ୍ରାୟ ୧୦ରୁ ୧୫ ଏକର ଜମିରେ କାମ କରିପାରୁଛନ୍ତି। ଡ୍ରୋନ୍ରେ ଥିବା ମ୍ୟାପିଂ ବ୍ୟବସ୍ଥା ଜମିର ନିର୍ଦ୍ଦିଷ୍ଟ ଅଂଶରେ ଛିଞ୍ଚନ କରିବାରେ ସହାୟତା କରେ, ଫଳରେ ସମାନ ସ୍ଥାନରେ ବାରମ୍ବାର ଛିଞ୍ଚନ ହେବାର ସମ୍ଭାବନା କମେ।

ନୀତୁଙ୍କ ଏହି ପ୍ରୟାସ ତାଙ୍କ ଆର୍ଥିକ ଜୀବନକୁ ମଧ୍ୟ ବଦଳାଇ ଦେଇଛି। ତାଙ୍କ କହିବା ଅନୁସାରେ, ପୂର୍ବରୁ ଛୋଟ ଛୋଟ ଖର୍ଚ୍ଚ ପାଇଁ ମଧ୍ୟ ତାଙ୍କୁ ଅନ୍ୟଙ୍କ ଉପରେ ନିର୍ଭର କରିବାକୁ ପଡ଼ୁଥିଲା। ଏବେ ଡ୍ରୋନ୍ ଚଳାଇ ସେ କାମ ଅନୁଯାୟୀ ଦିନକୁ ପ୍ରାୟ ୨,୦୦୦ ଟଙ୍କା ପର୍ଯ୍ୟନ୍ତ ଆୟ କରୁଛନ୍ତି। ତାଙ୍କ ସହ ଦୁଇଜଣ ସହାୟକ ମଧ୍ୟ କାମ କରୁଛନ୍ତି।

ନୀତୁଙ୍କ କାମକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମଧ୍ୟ ପ୍ରଶଂସା କରିଛନ୍ତି। ନୀତୁଙ୍କ କହିବା ଅନୁସାରେ, ସେ ଦୁଇଥର ପ୍ରଧାନମନ୍ତ୍ରୀଙ୍କୁ ଭେଟିଛନ୍ତି। ବାରାଣସୀର ଏକ ସଭାରେ ତାଙ୍କୁ ‘ନମୋ ଡ୍ରୋନ୍ ଦିଦି’ ବୋଲି ସମ୍ବୋଧନ କରାଯାଇଥିଲା। ପରେ ପ୍ରାୟ ୨,୦୦୦ ଏକର ଜମିରେ ଛିଞ୍ଚନ କାମ କରିବା ପରେ ତାଙ୍କୁ ଦିଲ୍ଲୀରେ ମଧ୍ୟ ଭେଟିବାର ସୁଯୋଗ ମିଳିଥିଲା।

ନୀତୁ ସିଂହଙ୍କ ଯାତ୍ରା ଦେଖାଉଛି ଯେ ପ୍ରଶିକ୍ଷଣ, ପ୍ରଯୁକ୍ତି ଓ ସଠିକ୍ ସୁଯୋଗ ମିଳିଲେ ଗ୍ରାମୀଣ ମହିଳାମାନେ ମଧ୍ୟ ଆଧୁନିକ କୃଷି ଓ ଟେକ୍ନୋଲୋଜି ଆଧାରିତ ଉଦ୍ୟମରେ ନିଜର ପରିଚୟ ସୃଷ୍ଟି କରିପାରିବେ। ‘ଡ୍ରୋନ୍ ଦିଦି’ ଭାବେ ନୀତୁଙ୍କ ସଫଳତା ତାଙ୍କ ପରିବାରକୁ ଆର୍ଥିକ ସହାୟତା ଦେବା ସହ ଅନ୍ୟମାନଙ୍କ ପାଇଁ ମଧ୍ୟ ରୋଜଗାରର ସୁଯୋଗ ସୃଷ୍ଟି କରିଛି।