ନୂଆଦିଲ୍ଲୀ: ଅନ୍ତର୍ଜାତୀୟ ବଜାରରେ ଅଶୋଧିତ ତୈଳ ଦର ବଢ଼ିବା ଯୋଗୁଁ ଦେଶରେ ଡିଜେଲ ଦର ଉପରେ ପଡ଼ିପାରୁଥିବା ବଡ଼ ପ୍ରଭାବକୁ ନେଇ ମୁହଁ ଖୋଲିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ। ଚାଷୀ ଓ ସାଧାରଣ ଗ୍ରାହକଙ୍କୁ ଆର୍ଥିକ ବୋଝରୁ ରକ୍ଷା କରିବା ପାଇଁ ସରକାର ଡିଜେଲ ଦର ବୃଦ୍ଧିର ଏକ ବଡ଼ ଅଂଶ ନିଜେ ବହନ କରିଥିବା ସେ କହିଛନ୍ତି।

ନଭେମ୍ବର ୧୨ ତାରିଖରେ ନୂଆଦିଲ୍ଲୀର ଭାରତ ମଣ୍ଡପମ୍‌ରେ ଆୟୋଜିତ 'କିସାନ ତକ୍ ଭାରତ ଏଗ୍ରିକଲଚର କନଫରେନ୍ସ ୨୦୨୬'ରେ ଯୋଗଦେଇ ମୋଦୀ ଏହି ସୂଚନା ଦେଇଛନ୍ତି।

ଲିଟର ପିଛା ୫୦ ଟଙ୍କା ବଢ଼ିବାର ଥିଲା ଡିଜେଲ ଦର!

ପ୍ରଧାନମନ୍ତ୍ରୀଙ୍କ କହିବା ଅନୁସାରେ, ପଶ୍ଚିମ ଏସିଆରେ ଯୁଦ୍ଧ ଓ ଅଶାନ୍ତି ଯୋଗୁଁ ଅନ୍ତର୍ଜାତୀୟ ବଜାରରେ ଅଶୋଧିତ ତୈଳ ଦର ବ୍ୟାରେଲ ପିଛା ୭୦ ଡଲାରରୁ ବଢ଼ି ୧୨୨ ଡଲାରରେ ପହଞ୍ଚିଥିଲା। ଏହାର ପ୍ରଭାବରେ ଡିଜେଲ ଦର ଲିଟର ପିଛା ୫୦ ଟଙ୍କା ପର୍ଯ୍ୟନ୍ତ ବଢ଼ାଇବାର ଆବଶ୍ୟକତା ରହିଥିଲା।

କିନ୍ତୁ ସରକାର ଏହି ସମ୍ପୂର୍ଣ୍ଣ ବୋଝ ଗ୍ରାହକଙ୍କ ଉପରେ ଲଦିନଥିଲେ। କେବଳ ୭ ଟଙ୍କାର ବୃଦ୍ଧି ଗ୍ରାହକଙ୍କ ଉପରେ ପଡ଼ିଥିବାବେଳେ ବାକି ୪୩ ଟଙ୍କାର ଆର୍ଥିକ ବୋଝ ସରକାର ନିଜେ ବହନ କରିଥିବା ମୋଦୀ କହିଛନ୍ତି।

ପ୍ରତି ମାସରେ ୧୪ ହଜାର କୋଟିର ଆର୍ଥିକ ବୋଝ

ମୋଦୀଙ୍କ ଦାବି ଅନୁସାରେ, ଚାଷୀ ଓ ଗ୍ରାହକଙ୍କୁ ଅଧିକ ଇନ୍ଧନ ଦରର ପ୍ରଭାବରୁ ରକ୍ଷା କରିବା ପାଇଁ ସରକାର ପ୍ରତି ମାସରେ ପ୍ରାୟ ୧୪ ହଜାର କୋଟି ଟଙ୍କାର ଆର୍ଥିକ ବୋଝ ବହନ କରୁଛନ୍ତି।

ପଡ଼ୋଶୀ ଦେଶଗୁଡ଼ିକରେ ଏହି ସମୟ ମଧ୍ୟରେ ଇନ୍ଧନ ଦର ୪୦ରୁ ୫୦ ପ୍ରତିଶତ ପର୍ଯ୍ୟନ୍ତ ବଢ଼ିଥିବାବେଳେ ଭାରତରେ ଏହାର ପ୍ରଭାବକୁ ସୀମିତ ରଖିବାକୁ ସରକାର ଉଦ୍ୟମ କରିଥିବା ସେ କହିଛନ୍ତି।

ସାର ଦରକୁ ନେଇ ମଧ୍ୟ ବଡ଼ ଘୋଷଣା

କେବଳ ଡିଜେଲ ନୁହେଁ, ଚାଷୀଙ୍କୁ ସୁଲଭ ମୂଲ୍ୟରେ ସାର ଯୋଗାଇବା ପାଇଁ ଗତ ୧୨ ବର୍ଷରେ ସରକାର ୧୬ ଲକ୍ଷ କୋଟି ଟଙ୍କା ଖର୍ଚ୍ଚ କରିଥିବା ମୋଦୀ କହିଛନ୍ତି।

ତାଙ୍କ ଅନୁସାରେ, ଅନ୍ତର୍ଜାତୀୟ ବଜାରରେ ପ୍ରାୟ ୫ ହଜାର ଟଙ୍କା ମୂଲ୍ୟର ଏକ DAP ବସ୍ତା ଭାରତୀୟ ଚାଷୀଙ୍କୁ ୧୩୦୦ ଟଙ୍କାରେ ଯୋଗାଇ ଦିଆଯାଉଛି। ସେହିପରି ଅନ୍ତର୍ଜାତୀୟ ବଜାରରେ ପ୍ରାୟ ୩ ହଜାର ଟଙ୍କା ମୂଲ୍ୟର ୟୁରିଆ ବସ୍ତା ଚାଷୀଙ୍କୁ ୩୦୦ ଟଙ୍କାରୁ କମ୍ ମୂଲ୍ୟରେ ମିଳୁଛି।

ଚାଷର ଖର୍ଚ୍ଚ କମାଇବା, ଚାଷୀଙ୍କ ଆୟ ବଢ଼ାଇବା ଏବଂ କୃଷି କ୍ଷେତ୍ରକୁ ଆହୁରି ମଜଭୁତ କରିବା ସରକାରଙ୍କ ପ୍ରାଥମିକତା ବୋଲି ମୋଦୀ କହିଛନ୍ତି।