ଭଦ୍ରକ ଜିଲ୍ଲାରେ ଭୟଙ୍କର ସଡ଼କ ଦୁର୍ଘଟଣା। ପୋଲିସ ଗାଡ଼ିକୁ ଧକ୍କା ଦେଲା ଟ୍ରେଲର ଟ୍ରକ୍। ଏହି ମର୍ମନ୍ତୁଦ ଦୁର୍ଘଟଣାରେ ୨ ଜଣ ପୋଲିସ କର୍ମଚାରୀଙ୍କ ଜୀବନ ଯାଇଥିବାବେଳେ ଅନ୍ୟ ୨ ଜଣ ଗୁରୁତର ଆହତ ହୋଇଛନ୍ତି। ବାସୁଦେବପୁର-ଧାମରା ରାସ୍ତାର ବିରାସ ଛକ ନିକଟରେ ବିଳମ୍ବିତ ରାତିରେ ଏହି ଦୁର୍ଘଟଣା ଘଟିଛି।

ସୂଚନା ଅନୁସାରେ, ପୁରୀ ଜିଲ୍ଲା ଅସ୍ତରଙ୍ଗ ଥାନାର ୪ ଜଣ ପୋଲିସ କର୍ମଚାରୀ ଏକ ତଦନ୍ତ କାମରେ ଭଦ୍ରକ ଜିଲ୍ଲାକୁ ଆସିଥିଲେ। ନାୟକାଣିଡିହି ଥାନା ଅଞ୍ଚଳରେ ଏକ ମୋବାଇଲ୍ ଫୋନ୍ ଉଦ୍ଧାର ସମ୍ପର୍କିତ ତଦନ୍ତ ସାରି ଫେରୁଥିବା ସମୟରେ ସେମାନଙ୍କ ଗାଡ଼ି ଏକ ଟ୍ରେଲର ଟ୍ରକ୍ ସହ ଧକ୍କା ହୋଇଥିଲା।

ଧକ୍କାରେ ଚୁରମାର ହେଲା ପୋଲିସ ଗାଡ଼ି

ସୂଚନା ଅନୁସାରେ, ଟ୍ରେଲର ଟ୍ରକ୍‌ଟି ଧାମରା ଅଭିମୁଖେ ଯାଉଥିବାବେଳେ ପୋଲିସ ଗାଡ଼ିକୁ ଧକ୍କା ଦେଇଥିଲା। ଧକ୍କା ଏତେ ଜୋରଦାର ଥିଲା ଯେ ପୋଲିସ ଗାଡ଼ିଟି ଗୁରୁତର ଭାବେ କ୍ଷତିଗ୍ରସ୍ତ ହୋଇଥିଲା। ଗାଡ଼ିରେ ଥିବା ପୋଲିସ କର୍ମଚାରୀମାନେ ରାସ୍ତା ଉପରକୁ ଛିଟିକି ପଡ଼ିଥିଲେ।

ଘଟଣାସ୍ଥଳରେ ହିଁ ଜଣେ ପୋଲିସ କର୍ମଚାରୀଙ୍କ ମୃତ୍ୟୁ ହୋଇଥିଲା। ଅନ୍ୟ ୩ ଜଣ ଗୁରୁତର ଆହତ ହୋଇଥିଲେ। ସ୍ଥାନୀୟ ଲୋକେ ତୁରନ୍ତ ଘଟଣାସ୍ଥଳରେ ପହଞ୍ଚି ଅଗ୍ନିଶମ ବିଭାଗକୁ ଖବର ଦେଇଥିଲେ। ପରେ ଆହତଙ୍କୁ ଉଦ୍ଧାର କରି ଭଦ୍ରକ ଜିଲ୍ଲା ମୁଖ୍ୟ ଚିକିତ୍ସାଳୟ (DHH)କୁ ନିଆଯାଇଥିଲା।

ଚିକିତ୍ସାଧୀନ ଅବସ୍ଥାରେ ଆଉ ଜଣଙ୍କ ମୃତ୍ୟୁ

ଭଦ୍ରକ ମେଡିକାଲରେ ଆହତଙ୍କ ଅବସ୍ଥା ଗୁରୁତର ଥିବାରୁ ସେମାନଙ୍କୁ ଅଧିକ ଚିକିତ୍ସା ପାଇଁ କଟକ SCB ମେଡିକାଲ କଲେଜ ଓ ହସ୍ପିଟାଲକୁ ରେଫର୍ କରାଯାଇଥିଲା।

ଭଦ୍ରକ ମେଡିକାଲର ଡାକ୍ତର ବିଦ୍ୟାସାବିତ୍ରୀ ନାୟକଙ୍କ ସୂଚନା ଅନୁସାରେ, ୩ ଜଣଙ୍କ ଅବସ୍ଥା ଗୁରୁତର ଥିଲା ଏବଂ ଜଣଙ୍କୁ ମୃତ ଅବସ୍ଥାରେ ହସ୍ପିଟାଲକୁ ଅଣାଯାଇଥିଲା। ଚାରିଜଣ ଯାକ ପୋଲିସ ୟୁନିଫର୍ମ ପିନ୍ଧିଥିଲେ। ସେମାନଙ୍କ ମଧ୍ୟରୁ ୩ ଜଣଙ୍କ ପରିଚୟ ଜଣାପଡ଼ିଥିବାବେଳେ ଅନ୍ୟ ଜଣଙ୍କ ପରିଚୟ ସେତେବେଳେ ମିଳିନଥିଲା।

ତେବେ କଟକ SCBରେ ଚିକିତ୍ସାଧୀନ ଅବସ୍ଥାରେ ଆଉ ଜଣେ ପୋଲିସ କର୍ମଚାରୀଙ୍କ ମୃତ୍ୟୁ ହେବାରୁ ମୃତକଙ୍କ ସଂଖ୍ୟା ୨କୁ ବୃଦ୍ଧି ପାଇଛି।

ଦୁର୍ଘଟଣାର କାରଣ ଖୋଜୁଛି ପୋଲିସ

ଏହି ଦୁର୍ଘଟଣାକୁ ନେଇ ଭଦ୍ରକ ସଦର SDPO ବିଚିତ୍ରାନନ୍ଦ ସେଠୀ କହିଛନ୍ତି ଯେ, ପୁରୀ ଜିଲ୍ଲାରୁ ଅସ୍ତରଙ୍ଗ ଥାନାର ୪ ଜଣ ପୋଲିସ କର୍ମଚାରୀ ଏକ ମୋବାଇଲ୍ ଫୋନ୍ ଉଦ୍ଧାର ସମ୍ପର୍କିତ ତଦନ୍ତ ପାଇଁ ଭଦ୍ରକ ଆସିଥିଲେ। ନାୟକାଣିଡିହି ଥାନା ଅଞ୍ଚଳର ବିରାସ ଛକ ନିକଟରେ ସେମାନଙ୍କ ଗାଡ଼ି ଟ୍ରେଲର ସହ ଧକ୍କା ହୋଇଥିଲା।

ଘଟଣାରେ ଜଣେ ପୋଲିସ କର୍ମଚାରୀଙ୍କ ମୃତ୍ୟୁ ହୋଇଥିବାବେଳେ ଅନ୍ୟ ୩ ଜଣ ଗୁରୁତର ଆହତ ହୋଇଥିଲେ। ସେମାନଙ୍କୁ ଭଦ୍ରକ ମେଡିକାଲରୁ କଟକ SCBକୁ ପଠାଯାଇଥିଲା। ଏବେ ଦୁର୍ଘଟଣାରେ ଦୁଇ ଜଣ ପୋଲିସ କର୍ମଚାରୀଙ୍କ ଜୀବନ ଯାଇଛି। ଦୁର୍ଘଟଣା କିପରି ଘଟିଲା, ସେନେଇ ପୋଲିସ ପକ୍ଷରୁ ତଦନ୍ତ ଜାରି ରହିଛି।