ଭୁବନେଶ୍ୱର: ଚାଷୀଙ୍କ ପାଇଁ ବଡ଼ ଆଶ୍ୱସ୍ତି। ଧାନ ପଞ୍ଜୀକରଣର ସମୟସୀମାକୁ ଆଉ ୭ ଦିନ ବଢ଼ାଇଛନ୍ତି ଓଡ଼ିଶା ସରକାର। ସର୍ଭର ଓ ନେଟୱର୍କ ସମସ୍ୟା ସହ ବିଭିନ୍ନ ଅଞ୍ଚଳରେ ବନ୍ୟା ଓ ବର୍ଷା ଯୋଗୁଁ ଅନେକ ଚାଷୀ ପଞ୍ଜୀକରଣ କରିପାରିନଥିବା ଅଭିଯୋଗ ହୋଇଥିଲା। ଏହାକୁ ଦୃଷ୍ଟିରେ ରଖି ସରକାର ସମୟସୀମା ବଢ଼ାଇଛନ୍ତି।
୨୦୨୬-୨୭ ଖରିଫ ଋତୁ ପାଇଁ ଧାନ ପଞ୍ଜୀକରଣ ପ୍ରକ୍ରିୟା ଅଗଷ୍ଟ ୬ ତାରିଖରୁ ଆରମ୍ଭ ହୋଇଥିଲା। ଏପର୍ଯ୍ୟନ୍ତ ରାଜ୍ୟରେ ୧୭ ଲକ୍ଷରୁ ଅଧିକ ଚାଷୀ ପଞ୍ଜୀକରଣ ସମ୍ପୂର୍ଣ୍ଣ କରିଛନ୍ତି। ଗତବର୍ଷ ଏହି ସଂଖ୍ୟା ୧୯.୬୭ ଲକ୍ଷ ଥିଲା।
ଧାନ ପଞ୍ଜୀକରଣ ପାଇଁ ବିଭିନ୍ନ ଜିଲ୍ଲାର LAMPS, PACS ଓ ସମବାୟ ସମିତି ସମ୍ମୁଖରେ ଦୀର୍ଘ ଧାଡ଼ି ଲାଗିଥିବା ଦେଖିବାକୁ ମିଳିଥିଲା। ଅନେକ ସ୍ଥାନରେ ଚାଷୀମାନେ ଘଣ୍ଟା ଘଣ୍ଟା ଅପେକ୍ଷା କରିଥିବାବେଳେ କେତେକ ଅଞ୍ଚଳରେ ଲଗାତାର କିଛି ଦିନ ଧରି ପଞ୍ଜୀକରଣ କେନ୍ଦ୍ରକୁ ଆସିବାକୁ ପଡ଼ିଥିବା ଅଭିଯୋଗ ହୋଇଛି।
ମୟୂରଭଞ୍ଜ ଜିଲ୍ଲାର ଖୁଣ୍ଟା ବ୍ଲକ୍ର ବାସିପିଠା LAMPSରେ ୫ଟି ପଞ୍ଚାୟତର ୨,୫୦୦ରୁ ଅଧିକ ଚାଷୀ ପଞ୍ଜୀକରଣ ପାଇଁ ଏକାଠି ହୋଇଥିଲେ। ସେହିପରି ଆଠଗଡ଼, ଉମରକୋଟ, ବୌଦ୍ଧ ଓ ସମ୍ବଲପୁରରେ ମଧ୍ୟ ସମାନ ଦୃଶ୍ୟ ଦେଖିବାକୁ ମିଳିଥିଲା।
ବୌଦ୍ଧର କିଛି ଚାଷୀଙ୍କ ଅଭିଯୋଗ ଅନୁସାରେ, ସର୍ଭର ସମସ୍ୟା ଯୋଗୁଁ ଘଣ୍ଟାକୁ ମାତ୍ର ୭ରୁ ୮ଟି ପଞ୍ଜୀକରଣ ହେଉଥିଲା। କୁଚିଣ୍ଡାର ପରୁଆଭାଡ଼ି LAMPSରେ ମଧ୍ୟ ଶତାଧିକ ଚାଷୀ ପଞ୍ଜୀକରଣ ପାଇଁ ଅପେକ୍ଷା କରିଥିଲେ।
ଅନେକ ଅଞ୍ଚଳରେ ପ୍ରବଳ ବର୍ଷା ଓ ବନ୍ୟା ପରିସ୍ଥିତି ଯୋଗୁଁ ଚାଷୀମାନେ ପଞ୍ଜୀକରଣ କେନ୍ଦ୍ରକୁ ପହଞ୍ଚିବାରେ ସମସ୍ୟା ଭୋଗିଥିଲେ। କେତେକ ସ୍ଥାନରେ ଚାଷୀମାନେ ବର୍ଷାରେ ଭିଜି ଧାଡ଼ିରେ ଠିଆ ହୋଇଥିବାବେଳେ ଆଉ କେତେକ ସ୍ଥାନରେ ରାତି ପର୍ଯ୍ୟନ୍ତ ଅପେକ୍ଷା କରିଥିଲେ।
ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ମନ୍ତ୍ରୀ କୃଷ୍ଣଚନ୍ଦ୍ର ପାତ୍ର ସର୍ଭର ସମସ୍ୟାକୁ ସ୍ୱୀକାର କରିଛନ୍ତି। ସମସ୍ୟାର ସମାଧାନ ପାଇଁ ଟେକ୍ନିକାଲ୍ ଟିମ୍ କାମ କରୁଥିବା ସେ କହିଛନ୍ତି।
ମନ୍ତ୍ରୀଙ୍କ କହିବା ଅନୁସାରେ, କେତେକ ଜିଲ୍ଲାରେ ଏପର୍ଯ୍ୟନ୍ତ ମାତ୍ର ୬୦ରୁ ୭୫ ପ୍ରତିଶତ ପଞ୍ଜୀକରଣ ଶେଷ ହୋଇଛି। ବର୍ଷା ଓ ବନ୍ୟା କାରଣରୁ ଅନେକ ଚାଷୀ ପଞ୍ଜୀକରଣରୁ ବାଦ ପଡ଼ିଥିବାରୁ ସମୟସୀମା ବଢ଼ାଯାଇଛି।
ସର୍ଭରର କ୍ଷମତା ବଢ଼ାଇବା ନେଇ ମଧ୍ୟ ସରକାର ବିଚାର କରୁଥିବା ମନ୍ତ୍ରୀ କହିଛନ୍ତି।
ଏପଟେ ବିଜେଡି ଅତିକମରେ ୨୦ ଦିନ ସମୟ ବଢ଼ାଇବାକୁ ଦାବି କରିଥିବାବେଳେ କଂଗ୍ରେସ ପଞ୍ଜୀକରଣ ପ୍ରକ୍ରିୟାକୁ ସରଳ କରିବା ସହ ନେଟୱର୍କ ସମସ୍ୟାର ତୁରନ୍ତ ସମାଧାନ ଦାବି କରିଛି।
ନୂଆଦିଲ୍ଲୀ:ଭାରତୀୟ ବାୟୁସେନା (IAF) ନିଜର ପରିବହନ ବିମାନ...
ଫ୍ରାନ୍ସର ଦକ୍ଷିଣ-ପଶ୍ଚିମ ଅଞ୍ଚଳରେ ଭୟଙ୍କର ଟର୍ନାଡୋ ତାଣ୍...
‘୧୦୦%’ ଦାବିକୁ ନେଇ ITC Limited ଏବଂ ଭାରତ...
ଗ୍ରୀନଲ୍ୟାଣ୍ଡରେ ଜଳବାୟୁ ପରିବର୍ତ୍ତନର ଆଉ ଏକ ବଡ଼ ପ୍ରଭାବ...
ନୂଆଦିଲ୍ଲୀ:ଜନଗଣନା ୨୦୨୭ ପାଇଁ କେନ୍ଦ୍ର ସରକାର ପ୍ରଶ୍ନପତ୍...
ଭାରତରେ ଚିପ୍ସ, ମିଠା ପାନୀୟ ଓ ଅନ୍ୟାନ୍ୟ ପ୍ୟାକେଜ୍ଡ ଖାଦ୍...
ନେପାଳର ରାସୁୱା ଜିଲ୍ଲାରେ ଅଗଷ୍ଟ ୨୬ରେ ଘଟିଥିବା ଭୟଙ୍କର ଆ...
ତିବ୍ବତର ଗ୍ୟିରୋଙ୍ଗ ବନ୍ଦରରେ ହୋଇଥିବା ଭୟଙ୍କର ଆକସ୍ମିକ ବ...
ଆଲାର୍ମ ବାଜିବା ପୂର୍ବରୁ ସ୍ୱାଭାବିକ ଭାବେ ଉଠିବା ଅନେକଙ୍କ...
