ଗ୍ରୀନଲ୍ୟାଣ୍ଡରେ ଜଳବାୟୁ ପରିବର୍ତ୍ତନର ଆଉ ଏକ ବଡ଼ ପ୍ରଭାବ ସାମ୍ନାକୁ ଆସିଛି। ପୂର୍ବ ଗ୍ରୀନଲ୍ୟାଣ୍ଡର ସମୁଦ୍ର ବରଫ ତରଳିବାରୁ ବିଶାଳ ତିମିମାନେ ପୂର୍ବରୁ ଅପହଞ୍ଚ ଥିବା ସମୁଦ୍ର ଅଞ୍ଚଳକୁ ଚାଲିଆସୁଛନ୍ତି। ଦଶନ୍ଧି ଧରି ଚାଲିଥିବା ଏକ ବୈଜ୍ଞାନିକ ଅଧ୍ୟୟନରେ ଏହି ପରିବର୍ତ୍ତନର ପ୍ରମାଣ ମିଳିଛି।

ଗବେଷକମାନେ ଶହ ଶହ ବିଶାଳ ତିମିଙ୍କୁ ରେକର୍ଡ ଏବଂ ଭିଡିଓ କରିଛନ୍ତି। ଏଥିରେ ହମ୍ପବ୍ୟାକ୍, ଫିନ୍ ଓ ମିଙ୍କେ ତିମି ସାମିଲ ଅଛନ୍ତି। ଗ୍ରୀଷ୍ମ ଋତୁରେ ବରଫମୁକ୍ତ ସମୁଦ୍ରରେ ଏହି ତିମିମାନେ ଖାଦ୍ୟ ଖୋଜୁଥିବା ଦେଖାଯାଇଛି।

ପୂର୍ବରୁ ଏହି ସମୁଦ୍ର ଅଞ୍ଚଳ ବରଫରେ ଆବୃତ ରହୁଥିବାରୁ ଏହି ସାମୁଦ୍ରିକ ପ୍ରାଣୀମାନେ ଏଠାକୁ ଆସିପାରୁନଥିଲେ। କିନ୍ତୁ ଜଳବାୟୁ ପରିବର୍ତ୍ତନ ଯୋଗୁଁ ସମୁଦ୍ରର ତାପମାତ୍ରା ବଢ଼ିବା ଏବଂ ବରଫ ତରଳିବା ପରେ ସେମାନେ ନୂଆ ଅଞ୍ଚଳକୁ ଅନୁକୂଳିତ ହେଉଛନ୍ତି।

ବୈଜ୍ଞାନିକମାନେ ଏହାକୁ ଋତୁକାଳୀନ ‘ଆର୍କଟିକ୍ ଫିଡିଂ ଫ୍ରେଞ୍ଜି’ ବୋଲି ବର୍ଣ୍ଣନା କରିଛନ୍ତି। ଏହା ପୂର୍ବ ଗ୍ରୀନଲ୍ୟାଣ୍ଡର ସମୁଦ୍ର ପରିବେଶରେ ଏକ ବଡ଼ ପରିବେଶଗତ ପରିବର୍ତ୍ତନର ସଙ୍କେତ ବୋଲି ଗବେଷକମାନେ କହିଛନ୍ତି।

ଅଧ୍ୟୟନ ଅନୁଯାୟୀ, ୨୦୦୬ ପୂର୍ବରୁ ଏହି ଅଞ୍ଚଳରେ ଗୋଟିଏ ମଧ୍ୟ ହମ୍ପବ୍ୟାକ୍ ତିମି ଦେଖାଯାଇନଥିଲା। ୨୦୦୭ରେ ୭ଟି ହମ୍ପବ୍ୟାକ୍ ଦେଖାଯାଇଥିବା ବେଳେ ୨୦୨୪ ସୁଦ୍ଧା ଜାହାଜ ମାଧ୍ୟମରେ ହୋଇଥିବା ସର୍ଭେରେ ୧୫୦ଟି ହମ୍ପବ୍ୟାକ୍ ତିମି ଦେଖାଯାଇଥିଲା।

ଗବେଷକମାନେ ୨୦୧୫ ଓ ୨୦୨୪ ଗ୍ରୀଷ୍ମ ଋତୁରେ ପୂର୍ବ ଗ୍ରୀନଲ୍ୟାଣ୍ଡ ଉପକୂଳରେ ବାଲିନ୍ ତିମିଙ୍କ ଉପରେ ପ୍ରଥମ ବ୍ୟବସ୍ଥିତ ଆକାଶମାର୍ଗ ସର୍ଭେ କରିଥିଲେ। ଏହା ସହ ୧୫ଟି ସାଟେଲାଇଟ୍-ଟ୍ୟାଗ୍ ଲଗାଯାଇଥିବା ତିମିଙ୍କ ଗତିବିଧି ଏବଂ ଇନୁଇଟ୍ ଶିକାରୀମାନଙ୍କ ତଥ୍ୟକୁ ମଧ୍ୟ ଅଧ୍ୟୟନରେ ସାମିଲ କରାଯାଇଥିଲା।

ଗ୍ରୀନଲ୍ୟାଣ୍ଡ ଇନ୍‌ଷ୍ଟିଚ୍ୟୁଟ୍ ଅଫ୍ ନ୍ୟାଚୁରାଲ୍ ରିସୋର୍ସେସ୍‌ର ପ୍ରଫେସର ମାଡ୍ସ ପିଟର ହାଇଡେ-ଜୋର୍ଗେନସେନ୍ ଏହି ପରିବର୍ତ୍ତନକୁ ଉପ-ଆର୍କଟିକ୍ ଅଞ୍ଚଳରେ ଦେଖାଯାଉଥିବା ସବୁଠାରୁ ବଡ଼ ପରିବେଶଗତ ପରିବର୍ତ୍ତନଗୁଡ଼ିକ ମଧ୍ୟରୁ ଗୋଟିଏ ବୋଲି କହିଛନ୍ତି।

ଆକଳନ ଅନୁଯାୟୀ, ୨୦୨୪ ଗ୍ରୀଷ୍ମରେ ପ୍ରାୟ ୪,୦୦୦ ହମ୍ପବ୍ୟାକ୍, ୬,୦୦୦ ଫିନ୍ ଏବଂ ୬,୦୦୦ ମିଙ୍କେ ତିମି ଗ୍ରୀନଲ୍ୟାଣ୍ଡ ସାଗରକୁ ଆସିଥିଲେ। ଏହି ତିନି ପ୍ରଜାତି ମିଶି ଗୋଟିଏ ଗ୍ରୀଷ୍ମ ଋତୁରେ ଅତିକମ୍‌ରେ ୮ ଲକ୍ଷ ଟନ୍ ମାଛ ଓ କ୍ରିଲ୍ ଖାଇପାରନ୍ତି ବୋଲି ଗବେଷକମାନେ ଆକଳନ କରିଛନ୍ତି।

ସମୁଦ୍ରର ତାପମାତ୍ରା ବୃଦ୍ଧି ସହ ନୂଆ ମାଛ ପ୍ରଜାତି ଏହି ଉଷ୍ମ ଜଳକୁ ଆସୁଥିବାରୁ ତିମିମାନେ ଏଠାରେ ପ୍ରଚୁର ଖାଦ୍ୟ ପାଉଥିବା ଜଣାପଡ଼ିଛି। ତେବେ ଏହି ତିମିଙ୍କ ସଂଖ୍ୟା ସାରା ବିଶ୍ୱରେ ବଢ଼ିଛି ନା ଅନ୍ୟ ଅଞ୍ଚଳରୁ ସେମାନେ ଏଠାକୁ ସ୍ଥାନାନ୍ତରିତ ହୋଇଛନ୍ତି, ତାହା ଏହି ଅଧ୍ୟୟନରୁ ସ୍ପଷ୍ଟ ହୋଇନାହିଁ।

କିଛି ବିଶେଷଜ୍ଞ ପଶ୍ଚିମ ଗ୍ରୀନଲ୍ୟାଣ୍ଡରୁ ତିମିଙ୍କ ବଡ଼ ଆଗମନକୁ ନେଇ ଚିନ୍ତା ପ୍ରକାଶ କରିଛନ୍ତି। ଗ୍ରୀନଲ୍ୟାଣ୍ଡରେ କେତେକ ତିମି ପ୍ରଜାତିର ଶିକାର କରାଯାଉଥିବାରୁ ଏହା ଏକ ସମ୍ବେଦନଶୀଳ ପ୍ରସଙ୍ଗ।

ତେବେ ଗବେଷକମାନେ କହିଛନ୍ତି ଯେ ଏହି ‘ସୁଯୋଗସନ୍ଧାନୀ’ ବାଲିନ୍ ତିମିମାନେ ଜଳବାୟୁ ପରିବର୍ତ୍ତନ ସହ ନିଜକୁ ଖାପ ଖୁଆଇବା ସହ ଏଥିରୁ ଲାଭ ମଧ୍ୟ ପାଉଥିବା ଭଳି ଲାଗୁଛି।

କିନ୍ତୁ ସମସ୍ତ ଆର୍କଟିକ୍ ପ୍ରାଣୀଙ୍କ ପାଇଁ ଏହି ପରିବର୍ତ୍ତନ ଲାଭଦାୟକ ନୁହେଁ। ନାର୍ୱାଲ୍ ଓ ବେଲୁଗା ଭଳି ପ୍ରଜାତିମାନେ ଏହି ନୂଆ ତିମି ପ୍ରଜାତିଙ୍କ ସହ ସମାନ ଆବାସ ବାଣ୍ଟିବାକୁ ବାଧ୍ୟ ହେଉଛନ୍ତି କିମ୍ବା କେତେକ ସ୍ଥାନରୁ ବିସ୍ଥାପିତ ହେଉଛନ୍ତି।

ବୈଜ୍ଞାନିକମାନଙ୍କ ମତରେ, ଜଳବାୟୁ ପରିବର୍ତ୍ତନ କେତେକ ପ୍ରଜାତି ପାଇଁ ନୂଆ ସୁଯୋଗ ସୃଷ୍ଟି କରୁଥିବା ବେଳେ ଅନ୍ୟ କେତେକ ପ୍ରଜାତି ନିଜର ପାରମ୍ପରିକ ଆବାସ ହରାଉଛନ୍ତି।