ଉତ୍ତରପ୍ରଦେଶରେ ବନ୍ୟା ପରିସ୍ଥିତି ଯୋଗୁଁ ୧୩ଟି ଜିଲ୍ଲାର ୧୭୩ଟି ଗାଁ ପ୍ରଭାବିତ ହୋଇଛି। ଏହି ବନ୍ୟାରେ ୮୪,୩୬୨ ଜଣ ଲୋକ ଏବଂ ପ୍ରାୟ ୧୩,୦୫୮ ହେକ୍ଟର ଅଞ୍ଚଳ ପ୍ରଭାବିତ ହୋଇଥିବା ଅଧିକାରୀମାନେ ମଙ୍ଗଳବାର ସୂଚନା ଦେଇଛନ୍ତି।

ବନ୍ୟା ପରିସ୍ଥିତି ସାଧାରଣ ଓ ନିୟନ୍ତ୍ରଣରେ ଥିବା ରାଜ୍ୟ ସରକାର କହିଛନ୍ତି। ପ୍ରଭାବିତ ଲୋକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରିବା ସହ ଖାଦ୍ୟ, ଚିକିତ୍ସା ଏବଂ ଆବଶ୍ୟକ ରିଲିଫ୍ ସାମଗ୍ରୀ ଯୋଗାଇବା ପାଇଁ ଜିଲ୍ଲା ପ୍ରଶାସନକୁ ସକ୍ରିୟ ରଖାଯାଇଛି।

ବନ୍ୟା ପ୍ରଭାବିତ ଜିଲ୍ଲାଗୁଡ଼ିକ ମଧ୍ୟରେ ବଦାୟୁଁ, ବହରାଇଚ, ବଲିଆ, ବାରାବାଙ୍କୀ, ବିଜନୋର, ଫରୁଖାବାଦ, ଗୌତମ ବୁଦ୍ଧ ନଗର, ଗୋଣ୍ଡା, କାସଗଞ୍ଜ, ଲଖୀମପୁର ଖେରୀ, ମୁଜାଫରନଗର, ସୀତାପୁର ଏବଂ ଉନ୍ନାଓ ରହିଛି।

ରିଲିଫ୍ କମିଶନରଙ୍କ କାର୍ଯ୍ୟାଳୟର କଣ୍ଟ୍ରୋଲ୍ ରୁମ୍ ଲଗାତାର ବନ୍ୟା ପ୍ରଭାବିତ ଜିଲ୍ଲାଗୁଡ଼ିକ ସହ ଯୋଗାଯୋଗରେ ରହିଛି। ୧୦୭୦ ହେଲ୍ପଲାଇନ୍କୁ ଆସୁଥିବା ଅଭିଯୋଗ ଓ ସୂଚନା ଉପରେ ତୁରନ୍ତ ପଦକ୍ଷେପ ନିଆଯାଉଛି।

ପ୍ରଭାବିତ ଲୋକଙ୍କୁ ଆବଶ୍ୟକତା ଅନୁଯାୟୀ ରିଲିଫ୍ କ୍ୟାମ୍ପ କିମ୍ବା ଅନ୍ୟ ସୁରକ୍ଷିତ ସ୍ଥାନକୁ ନେବାକୁ ଜିଲ୍ଲାପାଳମାନଙ୍କୁ ନିର୍ଦ୍ଦେଶ ଦିଆଯାଇଛି। ରାଜ୍ୟରେ ମୋଟ ୧,୫୮୯ଟି ବନ୍ୟା ଆଉଟପୋଷ୍ଟ ଖୋଲାଯାଇଛି। ପ୍ରସ୍ତୁତ ରଖାଯାଇଥିବା ୧,୨୬୩ଟି ବନ୍ୟା ଆଶ୍ରୟସ୍ଥଳୀ ମଧ୍ୟରୁ ୪୧ଟି ବର୍ତ୍ତମାନ ବ୍ୟବହାରରେ ରହିଛି, ଯେଉଁଠାରେ ୧,୦୪୫ ଜଣ ଲୋକ ଆଶ୍ରୟ ନେଇଛନ୍ତି।

ଏପର୍ଯ୍ୟନ୍ତ ବନ୍ୟା ପ୍ରଭାବିତ ଅଞ୍ଚଳରୁ ୪,୮୪୫ ଜଣଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଇଛି। ଉଦ୍ଧାର କାର୍ଯ୍ୟରେ ୪୨୮ଟି ଡଙ୍ଗା ଓ ମୋଟରବୋଟ୍ ଏବଂ ୧,୧୦୧ ଜଣ ସ୍ଥାନୀୟ ଡାଇଭରଙ୍କୁ ନିୟୋଜିତ କରାଯାଇଛି।

ପ୍ରଭାବିତ ଲୋକଙ୍କ ମଧ୍ୟରେ ଏପର୍ଯ୍ୟନ୍ତ ୧୫,୨୩୮ଟି ରିଲିଫ୍ ଖାଦ୍ୟଶସ୍ୟ ପ୍ୟାକେଟ୍ ଏବଂ ୩୦,୩୧୬ଟି ମଧ୍ୟାହ୍ନ ଭୋଜନ ପ୍ୟାକେଟ୍ ବଣ୍ଟନ କରାଯାଇଛି। ଜରୁରୀ ପରିସ୍ଥିତି ମୁକାବିଲା ପାଇଁ ରାଜ୍ୟରେ ୧୬ଟି NDRF ଟିମ୍ ନିୟୋଜିତ ହୋଇଛନ୍ତି। SDRF ଟିମ୍ ମଧ୍ୟ ବିଭିନ୍ନ ଜିଲ୍ଲାରେ ମୁତୟନ ରହିଛନ୍ତି।

ଲୋକଙ୍କୁ ପାଣିପାଗ ଓ ବନ୍ୟା ସମ୍ପର୍କିତ ସତର୍କ ସୂଚନା ପହଞ୍ଚାଇବା ପାଇଁ ଅଗଷ୍ଟ ୧ରୁ ୧୮ ମଧ୍ୟରେ ୧୪୦.୫୨ କୋଟି SMS ଆଲର୍ଟ ପଠାଯାଇଥିବା ରିଲିଫ୍ କମିଶନରଙ୍କ କାର୍ଯ୍ୟାଳୟ କହିଛି। ସୋସିଆଲ ମିଡିଆ ମାଧ୍ୟମରେ ମଧ୍ୟ ବନ୍ୟା ଓ ବିପର୍ଯ୍ୟୟ ସୁରକ୍ଷା ସମ୍ପର୍କିତ ସୂଚନା ଦିଆଯାଉଛି।