ପାରାଦୀପ ବନ୍ଦରରେ ଅଟକି ରହିଥିବା MT Unity ଜାହାଜର ୨୨ ଜଣ କ୍ରୁ ସଦସ୍ୟଙ୍କୁ ନେଇ ଓଡ଼ିଶା ହାଇକୋର୍ଟ ଗୁରୁତ୍ୱପୂର୍ଣ୍ଣ ରାୟ ଦେଇଛନ୍ତି। ଜାହାଜର ମାଷ୍ଟର ଇସ୍ତ୍ୟାଗିନ୍ ଇଭ୍‌ଗେନି ନିକୋଲାଏଭିଚ୍‌ଙ୍କ ସମେତ ୨୨ ଜଣ କ୍ରୁ ସଦସ୍ୟଙ୍କୁ ଜାହାଜରୁ ଓହ୍ଲାଇ ସେମାନଙ୍କ ଦେଶକୁ ଫେରାଇବାକୁ କୋର୍ଟ କର୍ତ୍ତୃପକ୍ଷଙ୍କୁ ନିର୍ଦ୍ଦେଶ ଦେଇଛନ୍ତି।

ସୂଚନା ଅନୁସାରେ, ମେ ୧୧, ୨୦୨୬ରୁ MT Unity ପାରାଦୀପ ବନ୍ଦରର ଆଉଟର ଆଙ୍କରେଜ୍‌ରେ ରହିଥିଲା। ଜାହାଜ ବିରୋଧରେ ଏକାଧିକ ଆଡମିରାଲ୍ଟି ମାମଲା ହେବା ପରେ ଏହାକୁ ଅଟକ ରଖାଯାଇଥିଲା। ଏହା ପରେ ଜାହାଜରେ ଥିବା କ୍ରୁ ସଦସ୍ୟମାନେ ଆବଶ୍ୟକ ମୌଳିକ ସୁବିଧା ନେଇ ସମସ୍ୟାର ସମ୍ମୁଖୀନ ହୋଇଥିଲେ।

ପୂର୍ବରୁ ଅଗଷ୍ଟ ୭ ତାରିଖରେ ହାଇକୋର୍ଟ ପାରାଦୀପ ପୋର୍ଟ ଅଥରିଟିଙ୍କୁ ଜାହାଜରେ ଜମା ହୋଇଥିବା sludge ତୁରନ୍ତ ହଟାଇବା ପାଇଁ ପଦକ୍ଷେପ ନେବାକୁ କହିଥିଲେ। ସେତେବେଳେ ଜାହାଜରେ କ୍ୟାପ୍ଟେନ୍‌ଙ୍କ ସମେତ ୨୩ ଜଣ କ୍ରୁ ସଦସ୍ୟ ଥିବା ଅଦାଲତୀ ରେକର୍ଡରେ ଉଲ୍ଲେଖ ଥିଲା।

ପରବର୍ତ୍ତୀ ରାୟରେ ହାଇକୋର୍ଟ କହିଛନ୍ତି ଯେ ସମ୍ପୃକ୍ତ କର୍ତ୍ତୃପକ୍ଷମାନେ ଜାହାଜର ମାଷ୍ଟର ଓ କ୍ରୁ ସଦସ୍ୟଙ୍କ ଦାୟିତ୍ୱ ନେଇ ସେମାନଙ୍କୁ disembarkation ଏବଂ repatriation କରାଇବା ସୁନିଶ୍ଚିତ କରିବେ। ଜାହାଜର ଚଳାଚଳ ପାଇଁ ଆବଶ୍ୟକ replacement crew ମଧ୍ୟ ବ୍ୟବସ୍ଥା କରିବାକୁ କୋର୍ଟ ନିର୍ଦ୍ଦେଶ ଦେଇଛନ୍ତି।

ଏହି ପ୍ରକ୍ରିୟାରେ ହେଉଥିବା ଖର୍ଚ୍ଚ ଜାହାଜ ମାଲିକ କିମ୍ବା ଦାୟୀ ଏଜେଣ୍ଟଙ୍କଠାରୁ ଆଦାୟ କରାଯିବ। ରାୟର ନକଲ ପାଇବା ପରେ ସମ୍ଭବ ଶୀଘ୍ର, ପ୍ରାଥମିକତା ଭିତ୍ତିରେ ତିନି ସପ୍ତାହ ମଧ୍ୟରେ ଏହି ନିର୍ଦ୍ଦେଶ ପାଳନ କରିବାକୁ କୋର୍ଟ କହିଛନ୍ତି।

MT Unity ବିରୋଧରେ ପାରାଦୀପ ବନ୍ଦର ସମ୍ପର୍କିତ ବିଭିନ୍ନ ଦାବି ନେଇ ଆଡମିରାଲ୍ଟି ମାମଲା ଚାଲିଛି। ଏହି ମାମଲାଗୁଡ଼ିକରେ ଜାହାଜକୁ ଗିରଫ/ଅଟକ ରଖିବା ସମ୍ପର୍କିତ ଆଦେଶ ମଧ୍ୟ ଜାରି ହୋଇଥିଲା।

ହାଇକୋର୍ଟଙ୍କ ନୂଆ ନିର୍ଦ୍ଦେଶ ପରେ ଦୀର୍ଘ ସମୟ ଧରି ପାରାଦୀପରେ ଅଟକି ରହିଥିବା କ୍ରୁ ସଦସ୍ୟମାନଙ୍କୁ ଫେରାଇବା ପ୍ରକ୍ରିୟା ଆଗକୁ ବଢ଼ିବ।
​​​​​​​
ଆହୁରି ପଢନ୍ତୁ: ଛାତ୍ର ସଂସଦ ନିର୍ବାଚନ ପାଇଁ କ୍ୟାମ୍ପସ୍‌ରେ ଚଳଚଞ୍ଚଳ, ଆସନ୍ତାକାଲିଠୁ ନାମାଙ୍କନ
​​​​