ନୂଆଦିଲ୍ଲୀ: ଅକ୍ଟୋବର ୧୦ରେ ଦିଲ୍ଲୀର ଜନ୍ତର ମନ୍ତରରେ ହେବାକୁ ଥିବା ପ୍ରସ୍ତାବିତ ପ୍ରତିବାଦକୁ ନେଇ ତଣାପୋଡ଼ ବଢ଼ୁଥିବା ଦେଖାଯାଉଛି। CJP (Cockroach Janta Party)ର ପ୍ରତିଷ୍ଠାତା ଅଭିଜିତ ଦୀପକେ କେନ୍ଦ୍ର ସରକାରଙ୍କୁ ଟାର୍ଗେଟ୍ କରିବା ସହ ତାଙ୍କ ସଂଗଠନର କର୍ମୀମାନଙ୍କୁ ପୁଲିସ ନୋଟିସ୍‌ ଦିଆଯାଉଥିବା ଦାବି କରିଛନ୍ତି। 

ଦୀପକେଙ୍କ ଅଭିଯୋଗ ଅନୁଯାୟୀ, ଚନ୍ଦ୍ରପୁର ପୁଲିସ CJP କର୍ମୀମାନଙ୍କୁ ନୋଟିସ୍‌ ଦେଇ ଜନ୍ତର ମନ୍ତରରେ ହେବାକୁ ଥିବା ଆନ୍ଦୋଳନରେ ଯୋଗ ନଦେବାକୁ କହିଛି। ଏଥିସହ ପ୍ରତିବାଦ ପାଇଁ ଦିଲ୍ଲୀ ଯିବାର ଖର୍ଚ୍ଚର ଉତ୍ସ ସମ୍ପର୍କରେ ମଧ୍ୟ ପଚରାଯାଇଥିବା ସେ ଦାବି କରିଛନ୍ତି। 

ପୁଲିସ ପୂର୍ବରୁ କିପରି ଅନୁମାନ କରିପାରୁଛି ଯେ ପ୍ରତିବାଦ ହିଂସାତ୍ମକ ହୋଇପାରେ, ସେ ନେଇ ଦୀପକେ ପ୍ରଶ୍ନ ଉଠାଇଛନ୍ତି। ସୋସିଆଲ ମିଡିଆରେ ଏପରି ପୋଷ୍ଟ ନକରିବାକୁ ମଧ୍ୟ କର୍ମୀମାନଙ୍କୁ କୁହାଯାଉଥିବା ସେ ଅଭିଯୋଗ କରିଛନ୍ତି। 

CJPର ସହ-ସଂଯୋଜକ ସୌରଭ ଦାସ କହିଛନ୍ତି ଯେ, ଅକ୍ଟୋବର ୧୦ର ପ୍ରତିବାଦକୁ କେବଳ CJPର କାର୍ଯ୍ୟକ୍ରମ ଭାବେ ଦେଖାଯିବା ଉଚିତ ନୁହେଁ। ଏହା ଯୁବପିଢ଼ି ଓ Gen Zର ଏକ ବ୍ୟାପକ ଆହ୍ୱାନ ବୋଲି ସେ କହିଛନ୍ତି। ସେ ସମସ୍ତ ଶାନ୍ତିପୂର୍ଣ୍ଣ ପ୍ରତିବାଦକୁ ସମର୍ଥନ କରିବା ସହ ନିଜ ଅଧିକାର ପାଇଁ ସ୍ୱର ଉଠାଇବାକୁ କହିଛନ୍ତି। 

ଏହା ସହିତ, CJP ପକ୍ଷରୁ ଦାବି କରାଯାଇଛି ଯେ ଅକ୍ଟୋବର ୧୦ ପୂର୍ବରୁ ସଂଗଠନର କିଛି ନେତାଙ୍କୁ ଗିରଫ କରାଯାଇପାରେ। ତେବେ ଗିରଫ କିମ୍ବା ଅଟକ କରାଗଲେ ମଧ୍ୟ ପ୍ରତିବାଦ ଜାରି ରହିବ ବୋଲି ଦାସ କହିଛନ୍ତି। 

ଅକ୍ଟୋବର ୧୦ର ପ୍ରତିବାଦରେ ମୁଖ୍ୟ ଦାବି ହେଉଛି ମୁଖ୍ୟ ନିର୍ବାଚନ କମିଶନର ଜ୍ଞାନେଶ କୁମାରଙ୍କ ଇସ୍ତଫା। CJP ପକ୍ଷରୁ ଏହାକୁ ଶାନ୍ତିପୂର୍ଣ୍ଣ ଆନ୍ଦୋଳନ ବୋଲି କୁହାଯାଇଛି।