ରାଜ୍ୟ ସରକାରୀ କାର୍ଯ୍ୟକ୍ରମ ଓ ଉଚ୍ଚପଦସ୍ଥ ଅଧିକାରୀଙ୍କ ଯାତାୟାତକୁ ସୁବିଧାଜନକ କରିବା ପାଇଁ ଏକ ଟ୍ୱିନ୍-ଇଞ୍ଜିନ୍ ହେଲିକପ୍ଟର ଭଡ଼ାରେ ନେବାକୁ ଓଡ଼ିଶା ସରକାର ପଦକ୍ଷେପ ନେଇଛନ୍ତି। ଏହା ପାଇଁ ରାଜ୍ୟ ବାଣିଜ୍ୟ ଓ ପରିବହନ ବିଭାଗ ପକ୍ଷରୁ ଟେଣ୍ଡର ଆହ୍ୱାନ କରାଯାଇଛି।

ଟେଣ୍ଡର ସର୍ତ୍ତ ଅନୁଯାୟୀ, ହେଲିକପ୍ଟରରେ ୨ ଜଣ ପାଇଲଟଙ୍କ ସହ ଅତି କମରେ ୮ ଜଣ ଯାତ୍ରୀ ବସିବାର ବ୍ୟବସ୍ଥା ରହିବା ଆବଶ୍ୟକ। ହେଲିକପ୍ଟରଟି DGCA (Directorate General of Civil Aviation) ର ସମସ୍ତ ସୁରକ୍ଷା ମାନଦଣ୍ଡ ଅନୁସାରେ ପରିଚାଳିତ ହେବ।

ଏହି ହେଲିକପ୍ଟରକୁ ରାଜ୍ୟପାଳ, ମୁଖ୍ୟମନ୍ତ୍ରୀ, ମନ୍ତ୍ରୀମଣ୍ଡଳ ସଦସ୍ୟ ଏବଂ ଅନ୍ୟାନ୍ୟ ବିଶିଷ୍ଟ ବ୍ୟକ୍ତିଙ୍କ ସରକାରୀ ଯାତ୍ରା ଓ କାର୍ଯ୍ୟ ପାଇଁ ବ୍ୟବହାର କରାଯିବ।

ସୂଚନା ଅନୁସାରେ, ଚୁକ୍ତିର ଅବଧି ୨ ବର୍ଷ ରହିବ। ଏହା ୧୨ ଅଗଷ୍ଟ ୨୦୨୬ ଠାରୁ ୧୧ ଅଗଷ୍ଟ ୨୦୨୮ ପର୍ଯ୍ୟନ୍ତ ବୈଧ ରହିବ। ହେଲିକପ୍ଟର ଓ ଏହାର କ୍ରୁ ସଦସ୍ୟମାନଙ୍କୁ ଭୁବନେଶ୍ୱରସ୍ଥିତ ବିଜୁ ପଟ୍ଟନାୟକ ଆନ୍ତର୍ଜାତୀୟ ବିମାନବନ୍ଦରରେ ରଖାଯିବ।

ଆଗ୍ରହୀ ଏବଂ ଯୋଗ୍ୟ ହେଲିକପ୍ଟର ଅପରେଟରମାନେ ସରକାରୀ ୱେବସାଇଟରୁ RFP ଡକ୍ୟୁମେଣ୍ଟ ଡାଉନଲୋଡ୍ କରି ପ୍ରସ୍ତାବ ଦାଖଲ କରିପାରିବେ। ପ୍ରସ୍ତାବ ଦାଖଲ କରିବାର ଶେଷ ତାରିଖ ୨୦ ଜୁଲାଇ ୨୦୨୬ ଅପରାହ୍ନ ୩ଟା ଧାର୍ଯ୍ୟ କରାଯାଇଛି।

ସରକାରଙ୍କ ଏହି ପଦକ୍ଷେପ ଉଚ୍ଚସ୍ତରୀୟ ସରକାରୀ ଯାତାୟାତ ବ୍ୟବସ୍ଥାକୁ ଅଧିକ ସୁଦୃଢ଼ ଓ କାର୍ଯ୍ୟକ୍ଷମ କରିବ ବୋଲି ଆଶା କରାଯାଉଛି।