ନୂଆଦିଲ୍ଲୀ: ଡାକ୍ତର ହେବାର ସ୍ୱପ୍ନ ଦେଖୁଥିବା NEET ଆଶାୟୀ ଏବଂ ସେମାନଙ୍କ ଅଭିଭାବକଙ୍କ ପାଇଁ ଆସିଛି ଏକ ଜରୁରୀ ସତର୍କବାଣୀ। MBBS ଆଡମିଶନ ନାଁରେ ଠକେଇ ଓ ବିନା ଅନୁମତିରେ ମେଡିକାଲ ପାଠ୍ୟକ୍ରମ ଚଳାଉଥିବା ସଂସ୍ଥାଗୁଡ଼ିକୁ ନେଇ ଜାତୀୟ ମେଡିକାଲ କମିସନ (NMC) ଛାତ୍ରଛାତ୍ରୀଙ୍କୁ ସତର୍କ କରିଛି। କୌଣସି ମେଡିକାଲ କଲେଜରେ ନାମ ଲେଖାଇବା କିମ୍ବା ଟଙ୍କା ଜମା କରିବା ପୂର୍ବରୁ ଏହାର ଆଇନଗତ ମାନ୍ୟତା ଓ ନିୟାମକ ଅନୁମତି ଯାଞ୍ଚ କରିବାକୁ କମିସନ ପରାମର୍ଶ ଦେଇଛି।

NMCର ଏହି ପରାମର୍ଶ ସୁପ୍ରିମକୋର୍ଟଙ୍କ ନିର୍ଦ୍ଦେଶ ପରେ ଜାରି ହୋଇଛି। Ayesha Jain v. Amity University, Noida and Others ମାମଲାରେ ଶିକ୍ଷାନୁଷ୍ଠାନର ପ୍ରାମାଣିକତା ଯାଞ୍ଚ ନକରି ଆଡମିଶନ ନେବା କିମ୍ବା ଟଙ୍କା ଦେବାର ବିପଦ ସମ୍ପର୍କରେ ଛାତ୍ରଛାତ୍ରୀ ଓ ଅଭିଭାବକଙ୍କୁ ସଚେତନ କରିବାକୁ ନିୟାମକ ସଂସ୍ଥାଗୁଡ଼ିକୁ କୋର୍ଟ କହିଥିଲେ। ଏକ ଫାର୍ମହାଉସ୍ରୁ ନକଲି ମେଡିକାଲ କଲେଜ ଚାଲୁଥିବା ଏବଂ ବିଭିନ୍ନ ପାଠ୍ୟକ୍ରମ ଅଫର୍ କରାଯାଉଥିବା ଅଭିଯୋଗ ମଧ୍ୟ ଏହି ମାମଲାରେ ସାମ୍ନାକୁ ଆସିଥିଲା।

MBBS ଆଡମିଶନ ପୂର୍ବରୁ କ'ଣ ଯାଞ୍ଚ କରିବେ?

NMC ଅନୁସାରେ, MBBS ପଢ଼ିବାକୁ ଚାହୁଁଥିବା ଛାତ୍ରଛାତ୍ରୀ ପ୍ରଥମେ ସମ୍ପୃକ୍ତ କଲେଜର ନାମ କମିସନର ଅଫିସିଆଲ୍ ମେଡିକାଲ କଲେଜ ତାଲିକାରେ ଅଛି କି ନାହିଁ ଯାଞ୍ଚ କରିବା ଉଚିତ। ଏହା ସହିତ ଚଳିତ ଶିକ୍ଷାବର୍ଷରେ ସେହି କଲେଜକୁ MBBS ଛାତ୍ରଛାତ୍ରୀ ନାମଲେଖା ପାଇଁ ଅନୁମତି ମିଳିଛି କି ନାହିଁ ଏବଂ କେତୋଟି ସିଟ୍ ଅନୁମୋଦିତ ହୋଇଛି, ତାହା ମଧ୍ୟ ଯାଞ୍ଚ କରିବା ଜରୁରୀ।

କୌଣସି କଲେଜ ପୂର୍ବ ବର୍ଷରେ ଚାଲୁଥିଲା କିମ୍ବା ସରକାରୀ ତାଲିକାରେ ନାମ ଥିଲା ବୋଲି ପରବର୍ତ୍ତୀ ପ୍ରତ୍ୟେକ ଶିକ୍ଷାବର୍ଷରେ ଆଡମିଶନ ଅନୁମତି ରହିଛି ବୋଲି ଧରିନେବା ଠିକ୍ ନୁହେଁ। ଅନୁମତି, ପାଠ୍ୟକ୍ରମ ଓ ସିଟ୍ ସଂଖ୍ୟା ସମ୍ପର୍କିତ ତଥ୍ୟ NMC ଏବଂ Medical Assessment and Rating Boardର ଅଫିସିଆଲ୍ ରେକର୍ଡରୁ ଯାଞ୍ଚ କରିବାକୁ କୁହାଯାଇଛି।

ବ୍ରୋସର୍, ୱେବସାଇଟ୍ କିମ୍ବା ଜାଲ୍ ଅନୁମତି ପତ୍ର ଉପରେ ଭରସା କରନ୍ତୁ ନାହିଁ

କଲେଜର ବିଜ୍ଞାପନ, ୱେବସାଇଟ୍, ସୋସିଆଲ ମିଡିଆ ପୋଷ୍ଟ, ବ୍ରୋସର୍ କିମ୍ବା ସଂସ୍ଥା ପକ୍ଷରୁ ଦିଆଯାଉଥିବା ଅନୁମତି ପତ୍ରକୁ ଦେଖି ତୁରନ୍ତ ନିଷ୍ପତ୍ତି ନେବାକୁ NMC ମନା କରିଛି। କଲେଜର ପ୍ରଚାର ଓ ବାସ୍ତବ ଅନୁମୋଦନ ମଧ୍ୟରେ ତଫାତ ଥାଇପାରେ। ତେଣୁ ସମସ୍ତ ତଥ୍ୟକୁ ସିଧାସଳଖ ଅଫିସିଆଲ୍ ରେକର୍ଡ ସହ ମେଳ କରିବା ଆବଶ୍ୟକ।

ଅନଧିକୃତ ଏଜେଣ୍ଟଙ୍କୁ ଟଙ୍କା ଦିଅନ୍ତୁ ନାହିଁ

MBBS ଆଡମିଶନ ପାଇଁ ଟଙ୍କା ଦେବା ସମୟରେ ମଧ୍ୟ ସତର୍କ ରହିବାକୁ କମିସନ ପରାମର୍ଶ ଦେଇଛି। ଅନଧିକୃତ ଏଜେଣ୍ଟ, ମଧ୍ୟସ୍ଥି କିମ୍ବା କୌଣସି ବ୍ୟକ୍ତିଗତ ବ୍ୟାଙ୍କ ଆକାଉଣ୍ଟକୁ ଆଡମିଶନ ଫି’ ଦେବାରୁ ଦୂରେଇ ରହିବା ଉଚିତ। ଯେଉଁ ଆଡମିଶନ ପାଇଁ କାଉନସେଲିଂ ବ୍ୟବସ୍ଥା ରହିଛି, ସେଥିପାଇଁ Medical Counselling Committee (MCC) କିମ୍ବା ସମ୍ପୃକ୍ତ ରାଜ୍ୟ/କେନ୍ଦ୍ରଶାସିତ ଅଞ୍ଚଳର ଅଧିକୃତ କାଉନସେଲିଂ କର୍ତ୍ତୃପକ୍ଷଙ୍କ ମାଧ୍ୟମରେ ଆଡମିଶନ ନେବାକୁ କୁହାଯାଇଛି।

ନକଲି କଲେଜ କିମ୍ବା ଠକେଇ ଅଫର୍ ଦେଖିଲେ ଅଭିଯୋଗ କରନ୍ତୁ

କୌଣସି ସଂସ୍ଥା ବିନା ଅନୁମତିରେ MBBS ପାଠ୍ୟକ୍ରମ ଚଳାଉଥିବା, ଜାଲ୍ ଅନୁମତି ପତ୍ର ଦେଖାଉଥିବା କିମ୍ବା ମିଥ୍ୟା ଆଡମିଶନ ଅଫର୍ ଦେଉଥିବା ସନ୍ଦେହ ହେଲେ NMC କିମ୍ବା ସମ୍ପୃକ୍ତ କର୍ତ୍ତୃପକ୍ଷଙ୍କୁ ଜଣାଇବାକୁ କୁହାଯାଇଛି। ଏଭଳି ଠକେଇରୁ ଛାତ୍ରଛାତ୍ରୀଙ୍କ ଆର୍ଥିକ କ୍ଷତି ରୋକିବା ସହ ମେଡିକାଲ ଶିକ୍ଷାର ମାନ ବଜାୟ ରଖିବା ଏହି ପରାମର୍ଶର ମୁଖ୍ୟ ଉଦ୍ଦେଶ୍ୟ।

ଏହା ସହିତ ନର୍ସିଂ, ଫାର୍ମାସି, ଆୟୁର୍ବେଦ ଓ ଅନ୍ୟାନ୍ୟ ଆଲାଏଡ୍ ହେଲ୍ଥ କୋର୍ସ ପାଇଁ ଭିନ୍ନ ନିୟାମକ ସଂସ୍ଥା ରହିଛନ୍ତି। ତେଣୁ ଏହି ପାଠ୍ୟକ୍ରମରେ ନାମ ଲେଖାଇବା ପୂର୍ବରୁ ସମ୍ପୃକ୍ତ କୋର୍ସର ଅଧିକୃତ ନିୟାମକ ସଂସ୍ଥାଠାରୁ ମାନ୍ୟତା ଯାଞ୍ଚ କରିବାକୁ ମଧ୍ୟ NMC ସ୍ପଷ୍ଟ କରିଛି।