କୋଲକାତା: ୧୩ ବର୍ଷ ପୁରୁଣା ଏକ ମାମଲାକୁ ନେଇ ପଶ୍ଚିମବଙ୍ଗର ପୂର୍ବତନ ମୁଖ୍ୟମନ୍ତ୍ରୀ ତଥା ତୃଣମୂଳ କଂଗ୍ରେସ (TMC) ମୁଖ୍ୟ ମମତା ବାନାର୍ଜୀଙ୍କୁ ନୋଟିସ୍ ଜାରି କରିଛି ଦିଲ୍ଲୀ ପୋଲିସ । ୨୦୧୩ ମସିହାରେ ଦିଲ୍ଲୀରେ ହୋଇଥିବା ଏକ ବିକ୍ଷୋଭ ସମୟରେ ଟିଏମସି ନେତା ଓ ପୋଲିସ ମଧ୍ୟରେ ହୋଇଥିବା ସଂଘର୍ଷ ଘଟଣାର ତଦନ୍ତ ପାଇଁ ମମତାଙ୍କ ବୟାନ ରେକର୍ଡ କରିବାକୁ ଏହି ନୋଟିସ୍ ଦିଆଯାଇଛି ।

ତେବେ ଏହି ମାମଲାରେ ମମତା ବାନାର୍ଜୀଙ୍କୁ ଅଭିଯୁକ୍ତ ଭାବେ ନୁହେଁ, ବରଂ ସାକ୍ଷୀ ଭାବେ ଡକାଯାଇଛି ବୋଲି ପୋଲିସ ସୂତ୍ରରୁ ଜଣାପଡ଼ିଛି। ସୋମବାର ଦିଲ୍ଲୀ ପୋଲିସର ଏକ ଟିମ୍ କୋଲକାତାସ୍ଥିତ ମମତାଙ୍କ ବାସଭବନରେ ପହଞ୍ଚି ନୋଟିସ୍ ହସ୍ତାନ୍ତର କରିଥିଲା ।

ପୋଲିସ ପକ୍ଷରୁ ମମତାଙ୍କୁ ତାଙ୍କ ସୁବିଧା ଅନୁସାରେ ତାରିଖ ଓ ସ୍ଥାନ ନିର୍ଦ୍ଧାରଣ କରି ତଦନ୍ତରେ ସାମିଲ ହେବାକୁ କୁହାଯାଇଛି। ସେ ନିଜ ବାସଭବନ, କାର୍ଯ୍ୟାଳୟ କିମ୍ବା ନିଜ ପସନ୍ଦର ଅନ୍ୟ କୌଣସି ସ୍ଥାନରେ ବୟାନ ରେକର୍ଡ କରାଇପାରିବେ ।

କ'ଣ ଥିଲା ୨୦୧୩ର ପୂରା ଘଟଣା?

ଏହି ମାମଲା ୨୦୧୩ ଏପ୍ରିଲ୍ ମାସର। ସେତେବେଳେ ମମତା ବାନାର୍ଜୀ ଟିଏମସିର ମନ୍ତ୍ରୀ ଓ ସାଂସଦମାନଙ୍କ ସହ ଦିଲ୍ଲୀ ଗସ୍ତ କରିଥିଲେ । ପଶ୍ଚିମବଙ୍ଗର ତତ୍କାଳୀନ ଅର୍ଥମନ୍ତ୍ରୀ ଅମିତ ମିତ୍ରଙ୍କୁ ଷ୍ଟୁଡେଣ୍ଟସ୍ ଫେଡେରେସନ୍ ଅଫ୍ ଇଣ୍ଡିଆ (SFI)ର କର୍ମୀମାନେ ଆକ୍ରମଣ କରିଥିବା ଅଭିଯୋଗର ପ୍ରତିବାଦରେ ଏହି ଗସ୍ତ ହୋଇଥିଲା ।

ଏହାପରେ ଟିଏମସି ପ୍ରତିନିଧି ଦଳ ଦିଲ୍ଲୀର ସଂସଦ ମାର୍ଗରେ ଥିବା ଯୋଜନା ଆୟୋଗ (Planning Commission) କାର୍ଯ୍ୟାଳୟ ନିକଟରେ ବିକ୍ଷୋଭ କରିଥିଲେ । ସେଠାରେ ମମତା ବାନାର୍ଜୀ ଓ ଦିଲ୍ଲୀ ପୋଲିସ କର୍ମଚାରୀଙ୍କ ମଧ୍ୟରେ ପ୍ରବେଶ ପଥକୁ ନେଇ ବିବାଦ ଦେଖାଦେଇଥିଲା ।

VIP ଗେଟ୍ ବଦଳରେ ମୁଖ୍ୟ ଗେଟ୍ ଦେଇ ଯିବାକୁ ଚାହୁଁଥିଲେ ମମତା

ପୋଲିସ ପକ୍ଷରୁ ମମତାଙ୍କୁ ମୁଖ୍ୟ ଗେଟ୍ ବଦଳରେ ନିର୍ଦ୍ଧାରିତ VIP ପ୍ରବେଶ ପଥ ବ୍ୟବହାର କରିବାକୁ ପରାମର୍ଶ ଦିଆଯାଇଥିଲା। କାରଣ ମୁଖ୍ୟ ଗେଟ୍ ନିକଟରେ ବାମପନ୍ଥୀ ସଂଗଠନର କର୍ମୀମାନେ ଏକାଠି ହୋଇଥିଲେ। କିନ୍ତୁ ମମତା ନିଜ ଗାଡ଼ିରୁ ଓହ୍ଲାଇ ମୁଖ୍ୟ ଗେଟ୍ ଆଡ଼କୁ ଚାଲିଯାଇଥିଲେ ।

କେନ୍ଦ୍ର ଗୃହ ମନ୍ତ୍ରଣାଳୟ ନିକଟରେ ଦାଖଲ ହୋଇଥିବା ପୋଲିସ ରିପୋର୍ଟ ଅନୁଯାୟୀ, CISF କର୍ମଚାରୀମାନେ ମମତାଙ୍କ ପ୍ରବେଶ ପାଇଁ ମୁଖ୍ୟ ଗେଟ୍ ଖୋଲିଥିଲେ। ତାଙ୍କ ପଛରେ ଆସୁଥିବା ଅମିତ ମିତ୍ରଙ୍କୁ ବିକ୍ଷୋଭକାରୀମାନେ ଘେରିଯାଇଥିଲେ। ଏହି ସମୟରେ ତାଙ୍କୁ ଠେଲାପେଲା କରାଯିବା ସହ ତାଙ୍କ ସାର୍ଟ ମଧ୍ୟ ଚିରିଯାଇଥିଲା । ପରେ ସୁରକ୍ଷା କର୍ମୀମାନେ ତାଙ୍କୁ ସୁରକ୍ଷିତ ଭାବେ ଭିତରକୁ ନେଇଥିଲେ ।

ନିଜକୁ VIP ନୁହେଁ, LIP କହିଥିଲେ ମମତା

ଏହି ଘଟଣାକୁ ନେଇ ଦିଲ୍ଲୀ ପୋଲିସର କାର୍ଯ୍ୟଶୈଳୀକୁ ମମତା ବାନାର୍ଜୀ ସମାଲୋଚନା କରିଥିଲେ। ତାଙ୍କୁ VIP ଗେଟ୍ ବ୍ୟବହାର କରିବାକୁ ପରାମର୍ଶ ଦିଆଯାଇଥିବା ଖବରକୁ ମଧ୍ୟ ସେ ଖଣ୍ଡନ କରିଥିଲେ ।

ନିଜ ନିଷ୍ପତ୍ତିର ସମର୍ଥନ କରି ମମତା କହିଥିଲେ ଯେ ସେ ନିଜକୁ VIP (Very Important Person) ନୁହେଁ, ବରଂ LIP (Less Important Person) ଭାବେ ଦେଖନ୍ତି। ସେ କାହା ଆଗରେ ମୁଣ୍ଡ ନୁଆଁଇବେ ନାହିଁ ବୋଲି ମଧ୍ୟ କହିଥିଲେ ।

ଦିଲ୍ଲୀରୁ ଫେରିବା ପରେ ହସ୍ପିଟାଲରେ ଭର୍ତ୍ତି ହୋଇଥିଲେ

ବିକ୍ଷୋଭ ପରେ ଦିଲ୍ଲୀରୁ କୋଲକାତା ଫେରିବା ପରେ ମମତା ବାନାର୍ଜୀଙ୍କୁ ବେଲ୍ ଭ୍ୟୁ କ୍ଲିନିକ୍‌ରେ ଭର୍ତ୍ତି କରାଯାଇଥିଲା। ସେଠାରେ ସେ ଶ୍ୱାସକ୍ରିୟାରେ ସମସ୍ୟା, ହୃଦ୍‌ସ୍ପନ୍ଦନ ବଢ଼ିଯିବା ଏବଂ ଶରୀରରେ ଯନ୍ତ୍ରଣା ଭଳି ସମସ୍ୟା ଅନୁଭବ କରିଥିବା ଜଣାପଡ଼ିଥିଲା ।

ଦୀର୍ଘ ୧୩ ବର୍ଷ ପରେ ଏହି ମାମଲାର ତଦନ୍ତରେ ମମତାଙ୍କୁ ସାକ୍ଷୀ ଭାବେ ବୟାନ ଦେବାକୁ ଦିଲ୍ଲୀ ପୋଲିସର ନୋଟିସ୍ ଏବେ ରାଜନୈତିକ ମହଲରେ ଚର୍ଚ୍ଚା ସୃଷ୍ଟି କରିଛି ।