ଇସଲାମାବାଦ: ପାକିସ୍ତାନରେ ହୋଇଥିବା ଉପନିର୍ବାଚନରେ ମୁମ୍ବାଇ ୨୬/୧୧ ଆତଙ୍କୀ ଆକ୍ରମଣର ମାଷ୍ଟରମାଇଣ୍ଡ ହାଫିଜ୍ ସଇଦଙ୍କ ସହ ସମ୍ପର୍କ ଥିବା ରାଜନୈତିକ ଦଳକୁ ବଡ଼ ଝଟକା ଲାଗିଛି । ହାଫିଜ୍ ସଇଦଙ୍କ ସହ ଲିଙ୍କ୍ ଥିବା ପାକିସ୍ତାନ ମାର୍କାଜି ମୁସଲିମ୍ ଲିଗ୍ (PMML) ପଞ୍ଜାବ ପ୍ରଦେଶର NA-77 ସଂସଦୀୟ ଆସନରେ ପରାଜୟର ସାମ୍ନା କରିଛି। ଦଳର ପ୍ରାର୍ଥୀ ୩୦ ହଜାରରୁ ଅଧିକ ଭୋଟ ପାଇଥିଲେ ମଧ୍ୟ ବିଜୟ ହାସଲ କରିପାରିନାହାନ୍ତି ।

ରବିବାର ଗୁଜରାନୱାଲା ଜିଲ୍ଲାର NA-77 ନିର୍ବାଚନମଣ୍ଡଳୀରେ ଏହି ଉପନିର୍ବାଚନ ହୋଇଥିଲା। ପୂର୍ବତନ ସାଂସଦ ମେହମୁଦ୍ ବଶିର୍ ବିର୍କଙ୍କ ମୃତ୍ୟୁ ପରେ ଏହି ଆସନ ଖାଲି ପଡ଼ିଥିଲା। ଲାହୋରଠାରୁ ପ୍ରାୟ ୮୦ କିଲୋମିଟର ଦୂରରେ ଥିବା ଏହି ଅଞ୍ଚଳରେ ନିର୍ବାଚନ ହୋଇଥିଲା ।

୪୩ ହଜାର ଭୋଟ ପାଇ ଜିତିଲା PML-N

ସୋମବାର ପାକିସ୍ତାନ ନିର୍ବାଚନ ଆୟୋଗ ଘୋଷଣା କରିଥିବା ଫଳାଫଳ ଅନୁଯାୟୀ, ଶାସକ ପାକିସ୍ତାନ ମୁସଲିମ୍ ଲିଗ୍-ନୱାଜ୍ (PML-N)ର ପ୍ରାର୍ଥୀ ରାଶିଦ୍ ବଶିର୍ ବିର୍କ ୪୩ ହଜାରରୁ ଅଧିକ ଭୋଟ ପାଇ ବିଜୟୀ ହୋଇଛନ୍ତି ।

ଅନ୍ୟପଟେ ହାଫିଜ୍ ସଇଦଙ୍କ ସହ ଲିଙ୍କ୍ ଥିବା PMMLର ପ୍ରାର୍ଥୀ ମହମ୍ମଦ ଇବ୍ରାହିମ୍ ଗୁଜ୍ଜର ୩୦ ହଜାରରୁ ଅଧିକ ଭୋଟ ପାଇ ଦ୍ୱିତୀୟ ସ୍ଥାନରେ ରହିଛନ୍ତି । ଅଧିକ ଭୋଟ ପାଇଥିଲେ ମଧ୍ୟ ଦଳ ବିଜୟରୁ ବଞ୍ଚିତ ହୋଇଛି ।

ଇମ୍ରାନ ଖାନଙ୍କ ଦଳ ଲଢ଼ିଲାନି ନିର୍ବାଚନ

ଏହି ଉପନିର୍ବାଚନରେ ଜେଲ୍‌ରେ ଥିବା ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କ ଦଳ ପାକିସ୍ତାନ ତେହରିକ୍-ଏ-ଇନସାଫ୍ (PTI), ପାକିସ୍ତାନ ପିପୁଲ୍ସ ପାର୍ଟି (PPP) ଏବଂ ଜମାତ୍-ଏ-ଇସଲାମି ନିଜର କୌଣସି ପ୍ରାର୍ଥୀ ଦେଇନଥିଲେ ।

ନିର୍ବାଚନରେ ମତଦାନ ହାର କମ୍ ରହିଥିଲା । ଏପରିକି ଗୋଟିଏ ଗାଁରେ ଭୋଟରମାନେ ସମ୍ପୂର୍ଣ୍ଣ ଭାବେ ନିର୍ବାଚନ ବର୍ଜନ କରିଥିଲେ। ଏହା ବ୍ୟତୀତ ନିର୍ବାଚନ ଆଚରଣବିଧି ଉଲ୍ଲଂଘନ ଅଭିଯୋଗରେ PML-Nର ପାଞ୍ଚ ଜଣ ମହିଳା ସାଂସଦଙ୍କୁ ନିର୍ବାଚନ ଆୟୋଗ ପକ୍ଷରୁ କାରଣ ଦର୍ଶାଅ ନୋଟିସ୍ ଜାରି କରାଯାଇଛି ।

ନିର୍ବାଚନରେ ହେରଫେର ଅଭିଯୋଗ କଲା PMML

ଉପନିର୍ବାଚନ ଫଳାଫଳକୁ ନେଇ PMML ଶାସକ PML-N ବିରୋଧରେ ବ୍ୟାପକ ନିର୍ବାଚନୀ ହେରଫେର ଅଭିଯୋଗ ଆଣିଛି । ଏଥିସହ ଦଳ ନିର୍ବାଚନ ଫଳାଫଳକୁ ଅସ୍ୱୀକାର କରିଛି ।

୨୦୨୪ ମସିହାରେ ହୋଇଥିବା ପାକିସ୍ତାନ ସାଧାରଣ ନିର୍ବାଚନରେ ମଧ୍ୟ PMML ପ୍ରତିଦ୍ୱନ୍ଦ୍ୱିତା କରିଥିଲା । କିନ୍ତୁ ସେତେବେଳେ ମଧ୍ୟ ଦଳ ଗୋଟିଏ ହେଲେ ଆସନ ଜିତିପାରିନଥିଲା ।

କିଏ ଏହି ହାଫିଜ୍ ସଇଦ?

ହାଫିଜ୍ ସଇଦ ନିଷିଦ୍ଧ ଆତଙ୍କବାଦୀ ସଂଗଠନ ଲସ୍କର-ଏ-ତୈବା (LeT) ଏବଂ ଜମାତ୍-ଉଦ୍-ଦାୱା (JuD)ର ପ୍ରତିଷ୍ଠାତା। ପୂର୍ବରୁ ସେ ମିଲ୍ଲି ମୁସଲିମ୍ ଲିଗ୍ ସହ ଜଡ଼ିତ ଥିଲେ। ପରବର୍ତ୍ତୀ ସମୟରେ ତାଙ୍କ ସହ ସମ୍ପର୍କ ଥିବା ଅନ୍ୟ ଏକ ରାଜନୈତିକ ମଞ୍ଚ ଭାବେ PMML ସାମ୍ନାକୁ ଆସିଥିଲା। ରିପୋର୍ଟ ଅନୁଯାୟୀ, ଏହି ଦଳକୁ ପାକିସ୍ତାନର କ୍ଷମତା ପ୍ରତିଷ୍ଠାନର ସମର୍ଥନ ମଧ୍ୟ ମିଳୁଥିବା କୁହାଯାଏ ।

ତେବେ ୨୦୨୪ ସାଧାରଣ ନିର୍ବାଚନରେ ଗୋଟିଏ ଆସନ ମଧ୍ୟ ଜିତିପାରିନଥିବା ଏହି ଦଳ ପାଇଁ ଏବେର ଉପନିର୍ବାଚନ ଫଳାଫଳ ଆଉ ଏକ ରାଜନୈତିକ ଝଟକା ବୋଲି ଚର୍ଚ୍ଚା ହେଉଛି ।