ଏଲ୍ ନିନୋ ପ୍ରଭାବ ଥିବା ବର୍ଷରେ ସାଧାରଣତଃ ଭାରତରେ ବର୍ଷା କମ୍ ହେବାର ସମ୍ଭାବନା ରହିଥାଏ। କିନ୍ତୁ ଚଳିତ ବର୍ଷ ମୁମ୍ବାଇରେ ଘଟିଥିବା ଅସ୍ୱାଭାବିକ ବର୍ଷା ପାଣିପାଗ ବୈଜ୍ଞାନିକଙ୍କୁ ମଧ୍ୟ ଆଶ୍ଚର୍ଯ୍ୟଚକିତ କରିଛି। ଦକ୍ଷିଣ-ପଶ୍ଚିମ ମୌସୁମୀ ବାୟୁ ବିଳମ୍ବରେ ପହଞ୍ଚିଥିଲେ ମଧ୍ୟ କେବଳ ୭ ଦିନ ମଧ୍ୟରେ ମାସକର ବର୍ଷା ରେକର୍ଡ ହୋଇଛି।

୨୦୦୦ ମସିହା ପରେ ଜୁନ୍ ଶେଷ ସପ୍ତାହରୁ ଜୁଲାଇ ୮ ତାରିଖ ପର୍ଯ୍ୟନ୍ତ ଏହା ସର୍ବାଧିକ ବର୍ଷା ବୋଲି ରେକର୍ଡ କରାଯାଇଛି। ଜୁଲାଇ ୬ ସୁଦ୍ଧା ମୁମ୍ବାଇରେ ପ୍ରାୟ୧,୨୪୦ ମିଲିମିଟର ବର୍ଷାହୋଇଥିଲା, ଯାହା ଜନଜୀବନକୁ ଗୁରୁତର ଭାବେ ପ୍ରଭାବିତ କରିଥିଲା।

କୋଲାବା ପର୍ଯ୍ୟବେକ୍ଷଣ କେନ୍ଦ୍ରରେ ଜୁଲାଇ ମାସର ସାଧାରଣ ବର୍ଷା ପରିମାଣ ୭୬୮.୫ ମିମି ହୋଇଥିବା ବେଳେ, ଚଳିତ ବର୍ଷ କେବଳ ଜୁଲାଇ ୧ରୁ ୭ ତାରିଖ ମଧ୍ୟରେ ୭୯୧ ମିମି ବର୍ଷା ରେକର୍ଡ ହୋଇଛି। ସେହିପରି ସାନ୍ତାକ୍ରୁଜ ପର୍ଯ୍ୟବେକ୍ଷଣ କେନ୍ଦ୍ରରେ ଜୁଲାଇ ପ୍ରଥମ ସପ୍ତାହରେ ୮୭୯ ମିମି ବର୍ଷା ହୋଇଛି।

ଜୁଲାଇ ୨ରୁ ୬ ତାରିଖ ମଧ୍ୟରେ ସାଧାରଣତଃ ୩୫୦ ମିମି ବର୍ଷା ହେଉଥିବା ବେଳେ, ଏଥର ଏହା ୭୫୦ ମିମିକୁ ଅତିକ୍ରମ କରିଥିଲା। ଜୁଲାଇ ୫ରେ ଏକ ଦିନରେ ୨୨୫ ମିମିରୁ ଅଧିକ ବର୍ଷା ହୋଇଥିବା ବେଳେ ସାନ୍ତାକ୍ରୁଜରେ ୨୪ ଘଣ୍ଟାରେ ୨୬୮ ମିମି ବର୍ଷା ରେକର୍ଡ ହୋଇଛି।

ଭାରତୀୟ ପାଣିପାଗ ବିଭାଗ (IMD)ର ଜଳବାୟୁ ବୈଜ୍ଞାନିକଙ୍କ ମତାନୁସାରେ, ଆରବ ସାଗରରେ ସମୁଦ୍ର ପୃଷ୍ଠର ତାପମାତ୍ରା ରେକର୍ଡ ସ୍ତରରେ ବୃଦ୍ଧି ପାଇବା, ବଙ୍ଗୋପସାଗରର ଲଘୁଚାପ ପ୍ରଣାଳୀର ପରିବର୍ତ୍ତିତ ଗତିପଥ, ପଶ୍ଚିମ ଘାଟର ଭୌଗୋଳିକ ପ୍ରଭାବ ଓ ଗ୍ଲୋବାଲ ୱାର୍ମିଂ ଯୋଗୁଁ ବାୟୁମଣ୍ଡଳରେ ଅଧିକ ଆର୍ଦ୍ରତା ସଞ୍ଚୟ ହେଉଛି। ଏହି କାରଣରୁ ଅଳ୍ପ ସମୟ ମଧ୍ୟରେ ଅତ୍ୟଧିକ ବର୍ଷା ହେଉଛି।

ବିଶେଷଜ୍ଞମାନେ କହିଛନ୍ତି, ଏବେ ଏଲ୍ ନିନୋକୁ ଜଳବାୟୁ ପରିବର୍ତ୍ତନଠାରୁ ଅଲଗା କରି ବିଶ୍ଳେଷଣ କରାଯାଇପାରିବ ନାହିଁ। ଉଭୟର ମିଶ୍ର ପ୍ରଭାବ ଯୋଗୁଁ କମ୍ ସମୟ ମଧ୍ୟରେ ଅତ୍ୟଧିକ ବର୍ଷା ଓ ସହରାଞ୍ଚଳରେ ହଠାତ୍ ବନ୍ୟା ପରିସ୍ଥିତି ସୃଷ୍ଟି ହେଉଛି।