ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଶନିବାର ଆଦିତ୍ୟ ବିର୍ଲା ଗ୍ରୁପ୍ ଅଧ୍ୟକ୍ଷ କୁମାର ମଙ୍ଗଳମ୍ ବିର୍ଲାଙ୍କ ସହ ରାଜ୍ୟରେ ଗ୍ରୁପର ଚାଲୁ ଓ ପ୍ରସ୍ତାବିତ ବିନିଯୋଗ ନେଇ ଆଲୋଚନା କରିଛନ୍ତି।

ବୈଠକରେ ରାଜ୍ୟରେ ଆଦିତ୍ୟ ବିର୍ଲା ଗ୍ରୁପ୍‌ର ବିଭିନ୍ନ ପ୍ରକଳ୍ପର କାର୍ଯ୍ୟାନ୍ୱୟନ, ସମୟସୀମା ମଧ୍ୟରେ ପ୍ରକଳ୍ପ ସମ୍ପନ୍ନ କରିବା ଓ ଆଗାମୀ ବିନିଯୋଗ ସମ୍ଭାବନା ନେଇ ଆଲୋଚନା ହୋଇଥିଲା।

ଏହି ବୈଠକର ମୁଖ୍ୟ ଆକର୍ଷଣ ଥିଲା ରାୟଗଡ଼ା ଜିଲ୍ଲା କାଶୀପୁର ତହସିଲ ଅନ୍ତର୍ଗତ କଂସାରିଗୁଡ଼ାରେ ହିଣ୍ଡାଲ୍କୋ ଇଣ୍ଡଷ୍ଟ୍ରିଜ୍ ଲିମିଟେଡ୍ ପକ୍ଷରୁ ପ୍ରସ୍ତାବିତ ଗ୍ରୀନଫିଲ୍ଡ ଆଲୁମିନା ରିଫାଇନାରୀ ପ୍ରକଳ୍ପର ବିସ୍ତାର।

ପ୍ରଥମେ ଏହି ପ୍ରକଳ୍ପକୁ ୧ ମିଲିୟନ୍ ଟନ୍ ପ୍ରତି ବର୍ଷ କ୍ଷମତା ଓ ପ୍ରାୟ ୮ ହଜାର କୋଟି ଟଙ୍କା ବିନିଯୋଗରେ ନିର୍ମାଣ କରିବା ଯୋଜନା ଥିଲା। କିନ୍ତୁ ରାଜ୍ୟ ସରକାରଙ୍କ ସହଯୋଗ ଓ ପ୍ରକଳ୍ପର ଭବିଷ୍ୟତ ସମ୍ଭାବନାକୁ ଦେଖି ଗ୍ରୁପ୍ ଅତିରିକ୍ତ ୧୨ ହଜାର କୋଟି ଟଙ୍କା ବିନିଯୋଗ କରି କ୍ଷମତା ଆଉ ୨ ମିଲିୟନ୍ ଟନ୍ ବୃଦ୍ଧି କରିବାକୁ ପ୍ରସ୍ତାବ ଦେଇଛି।

ଏହି ବିସ୍ତାର ପରେ କଂସାରିଗୁଡ଼ା ଆଲୁମିନା ରିଫାଇନାରୀର ମୋଟ କ୍ଷମତା ୩ ମିଲିୟନ୍ ଟନ୍ ପ୍ରତି ବର୍ଷ ହେବ। ଏହାସହ ପ୍ରକଳ୍ପରେ ମୋଟ ବିନିଯୋଗ ପ୍ରାୟ ୨୦ ହଜାର କୋଟି ଟଙ୍କାରେ ପହଞ୍ଚିବ।

ପ୍ରକଳ୍ପ ଦ୍ୱାରା ପ୍ରତ୍ୟକ୍ଷ ଓ ପରୋକ୍ଷ ଭାବେ ବହୁ ନିଯୁକ୍ତି ସୃଷ୍ଟି ହେବା ସହ ସ୍ଥାନୀୟ ଉଦ୍ୟୋଗ, ସେବା ପ୍ରଦାତା ଓ ଡାଉନଷ୍ଟ୍ରିମ୍ ଶିଳ୍ପକୁ ନୂଆ ସୁଯୋଗ ମିଳିବ।

ମୁଖ୍ୟମନ୍ତ୍ରୀ ମୋହନ ଚରଣ ମାଝୀ କହିଛନ୍ତି ଯେ, ଓଡ଼ିଶାର ଖଣିଜ ସମ୍ପଦକୁ ମୂଲ୍ୟ ସଂଯୋଜିତ ଉତ୍ପାଦନ ଓ ଗୁଣବତ୍ତାପୂର୍ଣ୍ଣ ନିଯୁକ୍ତିରେ ପରିଣତ କରିବା ସରକାରଙ୍କ ଲକ୍ଷ୍ୟ। ଆଲୁମିନିୟମ୍ କ୍ଷେତ୍ରରେ ଓଡ଼ିଶାକୁ ଏକ ବିଶ୍ୱସ୍ତରୀୟ ହବ୍ ଭାବେ ଗଢ଼ିବା ଉପରେ ଗୁରୁତ୍ୱ ଦିଆଯାଉଛି।

ବୈଠକରେ ଆଲୁମିନିୟମ୍, ଆଲୁମିନା, କେମିକାଲ୍ସ, ସିମେଣ୍ଟ, ନବୀକରଣଯୋଗ୍ୟ ଶକ୍ତି, ବସ୍ତ୍ର ଓ ଅନ୍ୟାନ୍ୟ କ୍ଷେତ୍ରରେ ଗ୍ରୁପର ବର୍ତ୍ତମାନ ଓ ଭବିଷ୍ୟତ ବିନିଯୋଗ ନେଇ ମଧ୍ୟ ଆଲୋଚନା ହୋଇଥିଲା।