ଭୁବନେଶ୍ୱର: ଓଡ଼ିଶା ଓ ଜାପାନ ମଧ୍ୟରେ ବ୍ୟବସାୟିକ ସମ୍ପର୍କକୁ ଆହୁରି ସୁଦୃଢ଼ କରିବା ଦିଗରେ ଏକ ନୂଆ ପଦକ୍ଷେପ ନିଆଯାଇଛି। ଓଡ଼ିଶାରେ ଷ୍ଟାର୍ଟଅପ୍, ଶିଳ୍ପ ଓ ନିବେଶ କ୍ଷେତ୍ରରେ ନୂଆ ସମ୍ଭାବନା ଖୋଜିବା ଲକ୍ଷ୍ୟରେ ଜାପାନର ଟୋଟୋରି ପ୍ରିଫେକ୍ଚରର ଏକ ପ୍ରତିନିଧି ଦଳ ଭୁବନେଶ୍ୱରସ୍ଥିତ ଷ୍ଟାର୍ଟଅପ୍ ଓଡ଼ିଶାର ଓ-ହବ୍ ପରିଦର୍ଶନ କରିଛନ୍ତି।

ଏହି ଗସ୍ତର ମୁଖ୍ୟ ଉଦ୍ଦେଶ୍ୟ ହେଉଛି ଓଡ଼ିଶା ଓ ଜାପାନ ମଧ୍ୟରେ ଷ୍ଟାର୍ଟଅପ୍ ବିନିମୟ, ନିବେଶ, ଶିଳ୍ପ ସହଯୋଗ ଏବଂ ବ୍ୟବସାୟିକ ସୁଯୋଗକୁ ବଢ଼ାଇବା। ଏଥିପାଇଁ ଷ୍ଟାର୍ଟଅପ୍ ଓଡ଼ିଶା ଏବଂ ଜାପାନର ଟୋଟୋରି ପ୍ରିଫେକ୍ଚର ସହ ଜଡ଼ିତ ଦୁଇଟି ସଂସ୍ଥା ମଧ୍ୟରେ ଏକ ତ୍ରିପାକ୍ଷିକ ବୁଝାମଣାପତ୍ର ସ୍ୱାକ୍ଷର ହେବାକୁ ଯାଉଛି। ଏହି ଚୁକ୍ତି ଦ୍ୱାରା ଉଭୟ ପକ୍ଷର ଷ୍ଟାର୍ଟଅପ୍ ଓ ଉଦ୍ୟୋଗୀମାନଙ୍କୁ ପରସ୍ପର ସହ ଯୋଡ଼ିବା ସହ ନିବେଶ ଏବଂ ଶିଳ୍ପ କ୍ଷେତ୍ରରେ ସହଯୋଗର ନୂଆ ରାସ୍ତା ଖୋଲିବା ଆଶା କରାଯାଉଛି।

ଏହାବ୍ୟତୀତ ଓଡ଼ିଶାର ସଷ୍ଟେନେବିଲିଟି ଲିଡର୍ସ ଏବଂ ଜାପାନର ONESTRUCTION Inc. ମଧ୍ୟରେ ଆଉ ଏକ ବୁଝାମଣାପତ୍ର ସ୍ୱାକ୍ଷର ହେବ। ଏହି ସହଯୋଗ ମାଧ୍ୟମରେ ସ୍ଥାୟୀ ବିକାଶ ଓ ବ୍ୟବସାୟିକ ସହଭାଗିତା କ୍ଷେତ୍ରରେ ନୂଆ ସମ୍ଭାବନା ସୃଷ୍ଟି ହୋଇପାରିବ।

ଏହି କାର୍ଯ୍ୟକ୍ରମରେ ରାଜ୍ୟର ଏମ୍‌ଏସ୍‌ଏମ୍‌ଇ ମନ୍ତ୍ରୀ ଗୋକୁଳାନନ୍ଦ ମଲ୍ଲିକ ଯୋଗ ଦେଇଥିଲେ। ଓଡ଼ିଶାର ଉଦ୍ୟୋଗୀ ଏବଂ ନୂଆ ଷ୍ଟାର୍ଟଅପ୍‌ଗୁଡ଼ିକୁ ଅନ୍ତର୍ଜାତୀୟ ବଜାର ସହ ଯୋଡ଼ିବା ଦିଗରେ ଏହି ପଦକ୍ଷେପ ଗୁରୁତ୍ୱପୂର୍ଣ୍ଣ ହେବ।

ଓଡ଼ିଶାରେ ଜାପାନୀ ନିବେଶ ଓ ବ୍ୟବସାୟିକ ସହଯୋଗର ସମ୍ଭାବନା ବଢ଼ୁଥିବା ବେଳେ ଏଭଳି ବୁଝାମଣା ରାଜ୍ୟର ଷ୍ଟାର୍ଟଅପ୍ ଇକୋସିଷ୍ଟମ୍‌କୁ ଆନ୍ତର୍ଜାତୀୟ ସ୍ତରରେ ନୂଆ ପରିଚୟ ଦେବାରେ ସହାୟକ ହୋଇପାରେ।