ଜାତିସଂଘ ସୁରକ୍ଷା ପରିଷଦରେ ଆଫଗାନିସ୍ତାନ ପରିସ୍ଥିତି ଉପରେ ଆୟୋଜିତ ଏକ ବୈଠକରେ ଭାରତ ପାକିସ୍ତାନକୁ କଡ଼ା ଭାଷାରେ ସମାଲୋଚନା କରିଛି। ପାକିସ୍ତାନ ନିଜ ଦେଶ ଭିତରେ କାର୍ଯ୍ୟରତ କିଛି ଉଗ୍ରପନ୍ଥୀ ଗୋଷ୍ଠୀଙ୍କୁ ‘ଫିତନା ଅଲ୍ ହିନ୍ଦୁସ୍ତାନ’ ନାମରେ ଚିହ୍ନଟ କରି ଭାରତ ସହ ଯୋଡ଼ିବାକୁ ଚେଷ୍ଟା କରୁଥିବା ଅଭିଯୋଗକୁ ନୂଆଦିଲ୍ଲୀ ଦୃଢ଼ତାର ସହ ଖଣ୍ଡନ କରିଛି।

ଜାତିସଂଘରେ ଭାରତର ସ୍ଥାୟୀ ପ୍ରତିନିଧି ରାଜଦୂତ ପି. ହରୀଶ କହିଛନ୍ତି ଯେ ପାକିସ୍ତାନ ଦ୍ୱାରା ପ୍ରଚାରିତ ‘ଫିତନା ଅଲ୍ ହିନ୍ଦୁସ୍ତାନ’ ନାରେଟିଭ୍ ହେଉଛି ରାଷ୍ଟ୍ର ପ୍ରୋତ୍ସାହିତ ଭ୍ରାନ୍ତ ତଥ୍ୟ ଏବଂ ଦୁଷ୍ପ୍ରଚାରର ଏକ ଉଦାହରଣ। ସେ କହିଛନ୍ତି ଯେ ଏହି ପ୍ରଚାର ଧାର୍ମିକ ଶବ୍ଦାବଳୀର ଆବରଣରେ ଲୁଚିଥିବା ଏକ ସଂଗଠିତ ମିଥ୍ୟା ପ୍ରଚାର ଅଭିଯାନ।

ଭାରତର ମତାନୁସାରେ, ପାକିସ୍ତାନ ଏପରି ଅଭିଯୋଗ ମାଧ୍ୟମରେ ନିଜ ଦେଶର ରାଜନୈତିକ ଓ ଆର୍ଥିକ ସମସ୍ୟାରୁ ଲୋକଙ୍କ ଧ୍ୟାନ ହଟାଇବାକୁ ଚେଷ୍ଟା କରୁଛି। ରାଜଦୂତ ହରୀଶ ଏହାକୁ ‘ଘୃଣାର ଏକ ସଂଗଠିତ କାରଖାନା’ ବୋଲି ବର୍ଣ୍ଣନା କରିଥିଲେ।

ସେ ପାକିସ୍ତାନର ରାଜନୈତିକ ବ୍ୟବସ୍ଥା ଓ ଶାସନରେ ସେନାର ବୃଦ୍ଧିଶୀଳ ପ୍ରଭାବ ଉପରେ ମଧ୍ୟ ପ୍ରଶ୍ନ ଉଠାଇଥିଲେ। ସମ୍ପ୍ରତି ସମ୍ବିଧାନିକ ସଂଶୋଧନଗୁଡ଼ିକ ନାଗରିକ ଶାସନ ଉପରେ ସେନାର ପ୍ରଭାବ ବଢ଼ୁଥିବାର ସଙ୍କେତ ବୋଲି ସେ ମତ ପ୍ରକାଶ କରିଥିଲେ।

ଆଞ୍ଚଳିକ ସୁରକ୍ଷା ପ୍ରସଙ୍ଗରେ ଭାରତ ପାକିସ୍ତାନର ସୀମାପାର ସାମରିକ କାର୍ଯ୍ୟକଳାପକୁ ମଧ୍ୟ ସମାଲୋଚନା କରିଥିଲା। ଆଫଗାନିସ୍ତାନ ଭିତରେ ହୋଇଥିବା ବିମାନ ଆକ୍ରମଣରେ ଅନେକ ସାଧାରଣ ନାଗରିକଙ୍କ ମୃତ୍ୟୁ ଓ କ୍ଷତି ପାଇଁ ପାକିସ୍ତାନକୁ ଦାୟୀ କରିଥିଲା।

ରାଜଦୂତ ହରୀଶ କହିଥିଲେ ଯେ ନିରୀହ ନାଗରିକଙ୍କୁ ହତ୍ୟା କରି ତାହାକୁ ଆତଙ୍କବାଦ ବିରୋଧୀ ଅଭିଯାନ ବୋଲି କହିବା କେବେ ବି ଯୁକ୍ତିସଙ୍ଗତ ନୁହେଁ। ରମଜାନ ମାସରେ ବିମାନ ଆକ୍ରମଣ କରି ଏକ ପଟେ ଆନ୍ତର୍ଜାତିକ ଆଇନ ଓ ଇସ୍ଲାମିକ ଏକତାର କଥା କହିବାକୁ ସେ କପଟତାର ଉଦାହରଣ ବୋଲି ଅଭିହିତ କରିଥିଲେ।

ଜାତିସଂଘର ତଥ୍ୟ ଅନୁଯାୟୀ, ଚଳିତ ବର୍ଷ ପ୍ରାରମ୍ଭରେ ପାକିସ୍ତାନର ବିମାନ ଆକ୍ରମଣରେ ଆଫଗାନିସ୍ତାନରେ ମହିଳା ଓ ଶିଶୁଙ୍କ ସମେତ ଅନେକ ସାଧାରଣ ନାଗରିକ ପ୍ରାଣ ହରାଇଥିଲେ। ପରବର୍ତ୍ତୀ ସୀମା ସଂଘର୍ଷ ଓ ସାମରିକ କାର୍ଯ୍ୟକଳାପ ଯୋଗୁଁ ଶତାଧିକ ଲୋକ ଆହତ ହୋଇଥିବା ସହ ବହୁ ସଂଖ୍ୟକ ଲୋକ ବିସ୍ଥାପିତ ହୋଇଥିବା ସୂଚନା ମିଳିଛି।

ଏହି ପ୍ରସଙ୍ଗକୁ ନେଇ ଭାରତ ଜାତିସଂଘ ମଞ୍ଚରେ ପାକିସ୍ତାନର ଭୂମିକା ଓ ତାହାର ପ୍ରଚାର ନୀତି ଉପରେ କଡ଼ା ପ୍ରଶ୍ନ ଉଠାଇଛି।