ଆଫଗାନିସ୍ତାନରେ ଝିଅମାନଙ୍କ ଶିକ୍ଷା ଉପରେ ତାଲିବାନ୍‌ର କଟକଣାକୁ ସମର୍ଥନ କରୁଥିବା ଭଳି ମନ୍ତବ୍ୟ ଦେଇ ବିବାଦରେ ଭାରତୀୟ ଧର୍ମପ୍ରଚାରକ ଜାକିର ନାଇକ । ଏକ ଭିଡିଓରେ ସେ ଦାବି କରିଛନ୍ତି ଯେ, ଆଫଗାନିସ୍ତାନରେ ଝିଅଙ୍କ ଉଚ୍ଚଶିକ୍ଷାକୁ ସମ୍ପୂର୍ଣ୍ଣ ବନ୍ଦ କରାଯାଇନାହିଁ; ବରଂ ସୁରକ୍ଷା ସମସ୍ୟା ଓ ମହିଳା ଶିକ୍ଷକଙ୍କ ଅଭାବ ଯୋଗୁଁ ଏହାକୁ ସ୍ଥଗିତ ରଖାଯାଇଛି। ତାଙ୍କ ଏହି ମନ୍ତବ୍ୟକୁ ନେଇ ଭାରତ, ପାକିସ୍ତାନ ଓ ଆଫଗାନିସ୍ତାନର ଅନେକ ବ୍ୟକ୍ତି ତୀବ୍ର ଆପତ୍ତି ଉଠାଇଛନ୍ତି।

କ’ଣ କହିଛନ୍ତି ଜାକିର ନାଇକ?

ଭିଡିଓରେ ଜାକିର ନାଇକ କହିଛନ୍ତି ଯେ, ଗଣମାଧ୍ୟମରେ ପ୍ରକାଶ ପାଉଥିବା ସବୁ ଖବର ସତ୍ୟ ନୁହେଁ। ତାଲିବାନ୍‌ର ପ୍ରତିନିଧିମାନଙ୍କ ସହ ସେ ବ୍ୟକ୍ତିଗତ ଭାବେ ଆଲୋଚନା କରିଥିବା ଦାବି କରିଛନ୍ତି।

ତାଙ୍କ ଅନୁସାରେ, ଆଫଗାନିସ୍ତାନରେ ଝିଅମାନେ ଷଷ୍ଠ ଶ୍ରେଣୀ ପର୍ଯ୍ୟନ୍ତ ପଢ଼ିପାରୁଛନ୍ତି। ଏହା ପରେ ଶିକ୍ଷା ଜାରି ରଖିବା ପାଇଁ ସୁରକ୍ଷିତ ପରିବେଶ ଓ ପର୍ଯ୍ୟାପ୍ତ ମହିଳା ଶିକ୍ଷକଙ୍କ ଆବଶ୍ୟକତା ରହିଛି ବୋଲି ସେ କହିଛନ୍ତି। ଏଥିସହ ଇସଲାମୀୟ ଅଧ୍ୟୟନ, ଆରବୀ ଭାଷା ଓ କୁରାନ୍‌ ସମ୍ପର୍କିତ ବିଷୟରେ ମହିଳାମାନେ ମାଷ୍ଟର୍ସ ଓ ପିଏଚ୍‌ଡି କରିପାରୁଥିବା ମଧ୍ୟ ସେ ଦାବି କରିଛନ୍ତି ।

ତେବେ ତାଙ୍କ ଏହି ଦାବିକୁ ନେଇ ସମାଲୋଚକମାନେ ପ୍ରଶ୍ନ ଉଠାଇଛନ୍ତି। ଝିଅମାନେ ଯଦି ମାଧ୍ୟମିକ ଶିକ୍ଷାରୁ ବଞ୍ଚିତ ହେବେ, ତେବେ ଭବିଷ୍ୟତରେ ମହିଳା ଶିକ୍ଷକଙ୍କ ଅଭାବ କିପରି ଦୂର ହେବ ବୋଲି ସେମାନେ ପ୍ରଶ୍ନ କରିଛନ୍ତି ।

ଜାତିସଂଘର ରିପୋର୍ଟ କ’ଣ କହୁଛି?

ଜାକିର ନାଇକଙ୍କ ମନ୍ତବ୍ୟକୁ ସମାଲୋଚକମାନେ ଜାତିସଂଘର ରିପୋର୍ଟ ସହ ତୁଳନା କରିଛନ୍ତି । ଦିଆଯାଇଥିବା ରିପୋର୍ଟ ଅନୁସାରେ, ତାଲିବାନ୍‌ ୨୦୨୧ରେ ପୁନର୍ବାର କ୍ଷମତାକୁ ଫେରିବା ପରେ ଆଫଗାନିସ୍ତାନରେ ଝିଅମାନଙ୍କ ଶିକ୍ଷା ଉପରେ କଟକଣା ଲାଗୁ କରିଥିଲା । 

୨୦୨୧ ସେପ୍ଟେମ୍ବରରୁ ଝିଅମାନଙ୍କୁ ଷଷ୍ଠ ଶ୍ରେଣୀ ପରେ ଔପଚାରିକ ଶିକ୍ଷା ଜାରି ରଖିବାରୁ ବଞ୍ଚିତ କରାଯାଇଥିବାବେଳେ, ୨୦୨୨ ଡିସେମ୍ବରରୁ ମହିଳାଙ୍କ ପାଇଁ ବିଶ୍ୱବିଦ୍ୟାଳୟ ଶିକ୍ଷା ଉପରେ ମଧ୍ୟ କଟକଣା ଲାଗୁ ହୋଇଥିଲା । UNICEFର ରିପୋର୍ଟ ଅନୁସାରେ, ଲକ୍ଷ ଲକ୍ଷ ଆଫଗାନ ଝିଅ ମାଧ୍ୟମିକ ଶିକ୍ଷାରୁ ବଞ୍ଚିତ ହୋଇଛନ୍ତି ।

ଏହି କଟକଣା କେବଳ ସ୍କୁଲ ଓ ବିଶ୍ୱବିଦ୍ୟାଳୟରେ ସୀମିତ ରହିନାହିଁ। ୨୦୨୪ ଡିସେମ୍ବରରେ ମହିଳାଙ୍କ ଚିକିତ୍ସା ତାଲିମ ସଂସ୍ଥାରେ ଶିକ୍ଷା ଗ୍ରହଣ ଉପରେ ମଧ୍ୟ ପ୍ରତିବନ୍ଧକ ଲାଗିଥିବା ରିପୋର୍ଟରେ ଉଲ୍ଲେଖ ରହିଛି ।

ଆଫଗାନ କର୍ମୀ ଓ ସାମ୍ବାଦିକଙ୍କ ସମାଲୋଚନା

ଜାକିର ନାଇକଙ୍କ ମନ୍ତବ୍ୟ ପରେ ଅନେକ ଆଫଗାନ ସାମାଜିକ କର୍ମୀ, ସାମ୍ବାଦିକ ଓ ରାଜନୈତିକ ବ୍ୟକ୍ତି ତାଙ୍କ ଯୁକ୍ତିକୁ ପ୍ରଶ୍ନ କରିଛନ୍ତି ।

ଆଫଗାନ ସଂସଦର ନିର୍ବାସିତ ସଦସ୍ୟ ମରିୟମ ସୋଲାଇମାନଖିଲ୍‌ ମହିଳା ଶିକ୍ଷକଙ୍କ ଅଭାବକୁ ନେଇ ନାଇକଙ୍କ ଯୁକ୍ତିରେ ବିରୋଧାଭାସ ଥିବା କହିଛନ୍ତି। ତାଙ୍କ ମତରେ, ଯେତେବେଳେ ମହିଳାଙ୍କ ଶିକ୍ଷା ଓ କାର୍ଯ୍ୟକ୍ଷେତ୍ର ଉପରେ କଟକଣା ରହିଛି, ସେତେବେଳେ ନୂଆ ମହିଳା ଶିକ୍ଷକ ସୃଷ୍ଟି ହେବେ କିପରି?

ଆଫଗାନ ସାମ୍ବାଦିକ ଲିନା ରୋଜବିହ୍‌ ମଧ୍ୟ ନାଇକଙ୍କ ମନ୍ତବ୍ୟକୁ ସମାଲୋଚନା କରିଛନ୍ତି। ଅନ୍ୟପକ୍ଷରେ, ଆଫଗାନ ମିଡିଆ ସହ ଜଡ଼ିତ ମହବୋବ ଶାହ ମହବୋବ ଝିଅଙ୍କ ଶିକ୍ଷାକୁ କେବଳ ସ୍ଥଗିତ ରଖାଯାଇଛି ବୋଲି କହିବା ପରିବର୍ତ୍ତେ ସେମାନଙ୍କୁ ଶିକ୍ଷାର ଅଧିକାର ଦେବା ଆବଶ୍ୟକ ବୋଲି ମତ ଦେଇଛନ୍ତି ।

ମଲାଲାଙ୍କ ପିତା ଓ ଭାରତୀୟ ଶିକ୍ଷାବିତ୍‌ଙ୍କ ପ୍ରତିକ୍ରିୟା

ନୋବେଲ ଶାନ୍ତି ପୁରସ୍କାର ବିଜେତା ମଲାଲା ୟୁସୁଫଜାଇଙ୍କ ପିତା ତଥା ପାକିସ୍ତାନୀ ଶିକ୍ଷା ଅଧିକାର କର୍ମୀ ଜିଆଉଦ୍ଦିନ୍‌ ୟୁସୁଫଜାଇ ମଧ୍ୟ ନାଇକଙ୍କ ମନ୍ତବ୍ୟକୁ ନେଇ ନିରାଶା ପ୍ରକାଶ କରିଛନ୍ତି। ତାଙ୍କ ମତରେ, ଅନିର୍ଦ୍ଦିଷ୍ଟ କାଳ ପାଇଁ ଲାଗୁ ହୋଇଥିବା ଶିକ୍ଷା କଟକଣାକୁ କେବଳ ସ୍ଥଗିତାଦେଶ ବୋଲି କହିବା ଏହାର ଯଥାର୍ଥ ସମର୍ଥନ ହୋଇପାରିବ ନାହିଁ ।

ଭାରତୀୟ ଇସଲାମୀୟ ଶିକ୍ଷାବିତ୍‌ ଏ. ଫୈଜୁର ରହମାନ ମାଲେସିଆରେ ଜାକିର ନାଇକଙ୍କ ଉପସ୍ଥିତି ଓ ସେଠାକାର ନେତୃତ୍ୱଙ୍କ ସମର୍ଥନକୁ ନେଇ ପ୍ରଶ୍ନ ଉଠାଇଛନ୍ତି। ଭାରତୀୟ ଇତିହାସବିଦ୍‌ ଏସ୍‌. ଇରଫାନ୍‌ ହବିବ୍‌ ମଧ୍ୟ ମାଲେସିଆର ପ୍ରଧାନମନ୍ତ୍ରୀ ଅନୱର ଇବ୍ରାହିମଙ୍କ ଆଭିମୁଖ୍ୟକୁ ନେଇ ମନ୍ତବ୍ୟ ଦେଇଛନ୍ତି ।

୨୦୧୬ରୁ ଭାରତ ବାହାରେ ଅଛନ୍ତି ଜାକିର ନାଇକ

ଜାକିର ନାଇକ ୨୦୧୬ରେ ଭାରତ ଛାଡ଼ିଥିଲେ। ତାଙ୍କ ଭାଷଣ ଢାକାର ଏକ କାଫେରେ ହୋଇଥିବା ଆତଙ୍କବାଦୀ ଆକ୍ରମଣରେ ଜଡ଼ିତ ଜଣେ ଆକ୍ରମଣକାରୀଙ୍କୁ ପ୍ରଭାବିତ କରିଥିବା ଅଭିଯୋଗ ସହ ଅନ୍ୟାନ୍ୟ ମାମଲାରେ ତାଙ୍କ ନାଁ ଆସିଥିଲା। ତାଙ୍କ ବିରୋଧରେ ଧାର୍ମିକ ଘୃଣା ପ୍ରସାର, ବେଆଇନ କାର୍ଯ୍ୟକଳାପ ଓ ଅର୍ଥ ହେରଫେର ସମ୍ପର୍କିତ ଅଭିଯୋଗ ରହିଛି। ନାଇକ ଏହି ଅଭିଯୋଗଗୁଡ଼ିକୁ ଖଣ୍ଡନ କରିଆସିଛନ୍ତି ।

୨୦୧୭ରେ ସେ ମାଲେସିଆରେ ଆଶ୍ରୟ ନେଇଥିବା ରିପୋର୍ଟରେ ଉଲ୍ଲେଖ ରହିଛି। ତାଙ୍କୁ ଭାରତକୁ ଫେରାଇ ଆଣିବା ପାଇଁ ଭାରତର ଉଦ୍ୟମ ଏଯାଏଁ ସଫଳ ହୋଇନାହିଁ ।

ମହିଳା ଶିକ୍ଷାକୁ ନେଇ ବଢ଼ୁଛି ଚିନ୍ତା

ଆଫଗାନିସ୍ତାନରେ ଝିଅ ଓ ମହିଳାଙ୍କ ଶିକ୍ଷା ଉପରେ ଦୀର୍ଘକାଳୀନ କଟକଣା ଭବିଷ୍ୟତରେ ଶିକ୍ଷା ଓ ସ୍ୱାସ୍ଥ୍ୟ କ୍ଷେତ୍ରରେ ମହିଳା କର୍ମଚାରୀଙ୍କ ଅଭାବକୁ ଆହୁରି ବଢ଼ାଇପାରେ ବୋଲି ଚିନ୍ତା ପ୍ରକାଶ ପାଇଛି । UNICEFର ଏକ ଆକଳନ ଅନୁସାରେ, ଶିକ୍ଷା ଓ ନିଯୁକ୍ତି ଉପରେ କଟକଣା ଜାରି ରହିଲେ ୨୦୩୦ ସୁଦ୍ଧା ଆଫଗାନିସ୍ତାନ ୨୦ ହଜାର ପର୍ଯ୍ୟନ୍ତ ମହିଳା ଶିକ୍ଷକ ଏବଂ ୫,୪୦୦ ସ୍ୱାସ୍ଥ୍ୟକର୍ମୀଙ୍କୁ ହରାଇପାରେ ବୋଲି ଚେତାବନୀ ଦିଆଯାଇଛି ।

ଜାକିର ନାଇକଙ୍କ ମନ୍ତବ୍ୟକୁ ନେଇ ଉଠିଥିବା ବିବାଦ ଏବେ ମହିଳାଙ୍କ ଶିକ୍ଷା ଅଧିକାର, ଧାର୍ମିକ ଯୁକ୍ତି ଏବଂ ତାଲିବାନ୍‌ର ନୀତିକୁ ନେଇ ଆନ୍ତର୍ଜାତୀୟ ଆଲୋଚନାକୁ ପୁଣିଥରେ ସାମ୍ନାକୁ ଆଣିଛି । ଆଫଗାନିସ୍ତାନରେ ଝିଅମାନଙ୍କ ପାଇଁ ମାଧ୍ୟମିକ ଓ ବିଶ୍ୱବିଦ୍ୟାଳୟ ଶିକ୍ଷା କେବେ ପୁନଃ ଖୋଲିବ, ସେ ସମ୍ପର୍କରେ ଏପର୍ଯ୍ୟନ୍ତ କୌଣସି ନିର୍ଦ୍ଦିଷ୍ଟ ତାରିଖ ଘୋଷଣା ହୋଇନାହିଁ ।