ବ୍ରିଟେନ୍‌ରେ ଉଚ୍ଚଶିକ୍ଷା ଲାଭ କରିବାକୁ ଚାହୁଁଥିବା ଭାରତୀୟ ଛାତ୍ରଛାତ୍ରୀଙ୍କ ପାଇଁ ଗୁରୁତ୍ୱପୂର୍ଣ୍ଣ ଅପଡେଟ୍। ୟୁକେ ସରକାର ୩୦ ନଭେମ୍ବର ୨୦୨୬ରୁ ଷ୍ଟୁଡେଣ୍ଟ ଭିସା ପାଇଁ ଆବଶ୍ୟକ ଆର୍ଥିକ ପ୍ରମାଣର ସୀମା ବୃଦ୍ଧି କରୁଛନ୍ତି। ଏହା ଅନୁସାରେ, ଆବେଦନକାରୀଙ୍କୁ ପାଠପଢ଼ା ସମୟରେ ରହିବା ଓ ଦୈନନ୍ଦିନ ଖର୍ଚ୍ଚ ମେଣ୍ଟାଇବା ପାଇଁ ଅଧିକ ଅର୍ଥ ଥିବା ପ୍ରମାଣ ଦେବାକୁ ହେବ।

ଲଣ୍ଡନ୍‌ରେ ପଢ଼ୁଥିବା ଛାତ୍ରଙ୍କ ପାଇଁ କେତେ ଟଙ୍କା ଆବଶ୍ୟକ?

ବର୍ତ୍ତମାନ ଲଣ୍ଡନ୍‌ରେ ପଢ଼ିବାକୁ ଯାଉଥିବା ଛାତ୍ରଙ୍କୁ ପ୍ରତି ମାସରେ £1,529 ହିସାବରେ ସର୍ବାଧିକ ୯ ମାସ ପାଇଁ £13,761 ଦେଖାଇବାକୁ ପଡ଼େ। ନୂଆ ନିୟମ ଅନୁସାରେ ଏହା ପ୍ରତି ମାସରେ £1,570 ଏବଂ ୯ ମାସ ପାଇଁ £14,130କୁ ବୃଦ୍ଧି ପାଇବ। ଅର୍ଥାତ୍, ପୂର୍ବ ତୁଳନାରେ £369 ଅଧିକ ଦେଖାଇବାକୁ ହେବ।

ଲଣ୍ଡନ୍ ବାହାରେ ପଢ଼ିଲେ କେତେ ଅର୍ଥ ଦରକାର?

ଲଣ୍ଡନ୍ ବାହାରେ ଥିବା ବିଶ୍ୱବିଦ୍ୟାଳୟରେ ପଢ଼ୁଥିବା ଛାତ୍ରଙ୍କ ପାଇଁ ମାସିକ ଆର୍ଥିକ ଆବଶ୍ୟକତା £1,171ରୁ £1,203କୁ ବଢ଼ିବ। ୯ ମାସ ପାଇଁ ମୋଟ ରାଶି £10,539ରୁ £10,827 ହେବ। ଏହାର ଅର୍ଥ ଛାତ୍ରଙ୍କୁ ପୂର୍ବ ଅପେକ୍ଷା £288 ଅଧିକ ଅର୍ଥର ପ୍ରମାଣ ଦେବାକୁ ପଡ଼ିବ।

ଟ୍ୟୁସନ୍ ଫି’ ଅଲଗା ଦେଖାଇବାକୁ ହେବ

ଏହି ଆର୍ଥିକ ଆବଶ୍ୟକତା କେବଳ ଜୀବନଯାପନ ଖର୍ଚ୍ଚ ପାଇଁ। ଏହା ବ୍ୟତୀତ ଛାତ୍ରଛାତ୍ରୀଙ୍କୁ ନିଜର Confirmation of Acceptance for Studies (CAS)ରେ ଉଲ୍ଲେଖ ଥିବା ବକେୟା ଟ୍ୟୁସନ୍ ଫି’ ଦେବାକୁ ସକ୍ଷମ ଥିବା ପ୍ରମାଣ ମଧ୍ୟ ଦେବାକୁ ହେବ। ସାଧାରଣତଃ ଆବେଦନ ପୂର୍ବରୁ ଆବଶ୍ୟକ ଅର୍ଥ କ୍ରମାଗତ ୨୮ ଦିନ ପର୍ଯ୍ୟନ୍ତ ଖାତାରେ ରହିଥିବା ଦରକାର।

ଭାରତୀୟ ଛାତ୍ରଛାତ୍ରୀ କ’ଣ କରିବେ?

୩୦ ନଭେମ୍ବର ୨୦୨୬ କିମ୍ବା ଏହା ପରେ ଭିସା ଆବେଦନ କରିବାକୁ ଯୋଜନା କରୁଥିବା ଛାତ୍ରଛାତ୍ରୀ ନୂଆ ଆର୍ଥିକ ସୀମାକୁ ଧ୍ୟାନରେ ରଖି ନିଜର ବ୍ୟାଙ୍କ ବାଲାନ୍ସ ଓ ଅନ୍ୟ ଆର୍ଥିକ ବ୍ୟବସ୍ଥା ପ୍ରସ୍ତୁତ କରନ୍ତୁ। ଟ୍ୟୁସନ୍ ଫି’, ରହିବା ଖର୍ଚ୍ଚ, ଭିସା ଫି’ ଓ ଅନ୍ୟାନ୍ୟ ଖର୍ଚ୍ଚକୁ ମିଶାଇ ମୋଟ ବଜେଟ୍ ପ୍ରସ୍ତୁତ କରିବା ଉଚିତ। ଆବେଦନ ପୂର୍ବରୁ ୟୁକେ ସରକାରଙ୍କ ଅଧିକାରିକ ୱେବସାଇଟ୍‌ରେ ସର୍ବଶେଷ ନିୟମ ଯାଞ୍ଚ କରନ୍ତୁ।