ତେହେରାନ: ଆମେରିକା ଓ ଇସ୍ରାଏଲ ସହ ଚାଲିଥିବା ଉତ୍ତେଜନା ମଧ୍ୟରେ ଇରାନର ସର୍ବୋଚ୍ଚ ନେତା ମୋଜତବା ଖାମେନେଇ ସେନାକୁ କଠୋର ନିର୍ଦ୍ଦେଶ ଦେଇଛନ୍ତି। ଶତ୍ରୁପକ୍ଷରୁ ଯେକୌଣସି ଧମକ ଆସିଲେ ତୁରନ୍ତ, ପ୍ରଭାବଶାଳୀ ଏବଂ ଭୌଗୋଳିକ ସୀମାରେ ସୀମିତ ନଥିବା ଜବାବ ଦେବାକୁ ସେ କହିଛନ୍ତି ।

ରଏଟର୍ସର ରିପୋର୍ଟକୁ ଉଦ୍ଧୃତ କରିଟାଇମ୍ସ ଅଫ୍ ଇଣ୍ଡିଆପ୍ରକାଶ କରିଛି ଯେ, ଏକ ଲିଖିତ ବାର୍ତ୍ତାରେ ଖାମେନେଇ ସେନାକୁ ଆମେରିକା ଓ ଇସ୍ରାଏଲର ସମସ୍ତ ସାମରିକ ଏବଂ ଅନ୍ୟାନ୍ୟ ସମ୍ପତ୍ତିକୁ ସମ୍ଭାବ୍ୟ ଲକ୍ଷ୍ୟ ତାଲିକାରେ ସାମିଲ କରିବାକୁ ନିର୍ଦ୍ଦେଶ ଦେଇଥିବା କୁହାଯାଇଛି ।

ଅସ୍ତ୍ର ଉତ୍ପାଦନ ବଢ଼ାଇବା ଉପରେ ଗୁରୁତ୍ୱ

ଇରାନର ସେନାକୁ ଗୁଳିଗୋଳା ଓ ବିଭିନ୍ନ ପ୍ରକାରର ଅସ୍ତ୍ରଶସ୍ତ୍ର ଉତ୍ପାଦନ ବଢ଼ାଇବାକୁ ମଧ୍ୟ ନିର୍ଦ୍ଦେଶ ଦିଆଯାଇଛି । ଏଥିସହ ଗୁଇନ୍ଦା ସୂଚନା ସଂଗ୍ରହ କ୍ଷମତା ବଢ଼ାଇବା, ନିଜସ୍ୱ ପ୍ରତିରକ୍ଷା ପ୍ରଣାଳୀର ବିକାଶ କରିବା ଏବଂ ବିଦେଶୀ ଯୋଗାଣ ଉପରେ ନିର୍ଭରଶୀଳତା କମାଇବାକୁ ତେହେରାନ ଗୁରୁତ୍ୱ ଦେଉଛି ।

ଯୁଦ୍ଧର ସମୟ ଓ ସର୍ତ୍ତ ଇରାନ ନିର୍ଦ୍ଧାରଣ କରିବ: ଖାମେନେଇ

ଆମେରିକା କିମ୍ବା ଇସ୍ରାଏଲ ପକ୍ଷରୁ ପୁଣି ସାମରିକ ଆକ୍ରମଣ ହେଲେ ନୂଆ ସଂଘର୍ଷ ଆରମ୍ଭ ହୋଇପାରେ ବୋଲି ଖାମେନେଇ ଚେତାବନୀ ଦେଇଛନ୍ତି। ଭବିଷ୍ୟତରେ କୌଣସି ସଂଘର୍ଷ ହେଲେ ତାହାର ସମୟ ଓ ଶେଷ କରିବାର ସର୍ତ୍ତ ଇରାନ ନିଜେ ନିର୍ଦ୍ଧାରଣ କରିବ ବୋଲି ସେ ଦାବି କରିଛନ୍ତି ।

ହର୍ମୁଜ୍ ପ୍ରଣାଳୀକୁ ନେଇ ତେହେରାନ ଓ ୱାଶିଂଟନ ମଧ୍ୟରେ ଉତ୍ତେଜନା ଜାରି ରହିଥିବା ବେଳେ ଏହି ବୟାନ ଆସିଛି । ଆଞ୍ଚଳିକ ଦେଶଗୁଡ଼ିକର ମଧ୍ୟସ୍ଥତାରେ କୂଟନୈତିକ ଉଦ୍ୟମ ଚାଲିଥିଲେ ମଧ୍ୟ ଏପର୍ଯ୍ୟନ୍ତ କୌଣସି ବଡ଼ ସଫଳତା ମିଳିନଥିବା ରିପୋର୍ଟରେ କୁହାଯାଇଛି ।

ତେବେ ଇରାନର ଏହି ନିର୍ଦ୍ଦେଶ ପରେ ଆଗାମୀ ଦିନରେ ମଧ୍ୟପ୍ରାଚ୍ୟର ସୁରକ୍ଷା ପରିସ୍ଥିତି କିପରି ବଦଳିବ, ତାହା ଉପରେ ଅନ୍ତର୍ଜାତୀୟ ସମୁଦାୟର ନଜର ରହିଛି ।