ମୁମ୍ବାଇ: IPL 2027 ପୂର୍ବରୁ ମୁମ୍ବାଇ ଇଣ୍ଡିଆନ୍ସର ଅଧିନାୟକ ପଦକୁ ନେଇ ବଡ଼ ଚର୍ଚ୍ଚା ଆରମ୍ଭ ହୋଇଛି। ରିପୋର୍ଟ ଅନୁସାରେ, ଦଳର ସଫଳତମ ଅଧିନାୟକ ରୋହିତ ଶର୍ମା ପୁଣିଥରେ ଦଳର ନେତୃତ୍ୱ ନେଇପାରନ୍ତି। ଯୁବ ଭାରତୀୟ ବ୍ୟାଟର ତିଲକ ବର୍ମାଙ୍କୁ ଉପ-ଅଧିନାୟକ ଦାୟିତ୍ୱ ମିଳିବାର ସମ୍ଭାବନା ମଧ୍ୟ ରହିଛି।

ରୋହିତଙ୍କ ନେତୃତ୍ୱରେ ମୁମ୍ବାଇ ଇଣ୍ଡିଆନ୍ସ ୨୦୧୩, ୨୦୧୫, ୨୦୧୭, ୨୦୧୯ ଓ ୨୦୨୦ରେ ମୋଟ ପାଞ୍ଚଥର IPL ଟ୍ରଫି ଜିତିଥିଲା। ୨୦୨୪ରେ ହାର୍ଦ୍ଦିକ ପାଣ୍ଡ୍ୟା ଦଳର ଅଧିନାୟକ ହେବା ପରେ ରୋହିତ ଏହି ଦାୟିତ୍ୱରୁ ହଟିଥିଲେ।

ରିପୋର୍ଟ ଅନୁଯାୟୀ, ହାର୍ଦ୍ଦିକ ପାଣ୍ଡ୍ୟାଙ୍କୁ ଅନ୍ୟ ଏକ ଫ୍ରାଞ୍ଚାଇଜିକୁ ଟ୍ରେଡ୍ କରିବା ନେଇ ମୁମ୍ବାଇ ଇଣ୍ଡିଆନ୍ସ ତିନୋଟି ଦଳ ସହ ଆଲୋଚନା କରୁଛି। ଏହି ପ୍ରକ୍ରିୟାରେ ଚୂଡ଼ାନ୍ତ ନିଷ୍ପତ୍ତି ଓ ଆନୁଷ୍ଠାନିକ ଘୋଷଣାକୁ ଅପେକ୍ଷା କରାଯାଇଛି।

ଏପଟେ ମୁମ୍ବାଇ ଇଣ୍ଡିଆନ୍ସ ନିଜର କୋଚିଂ ଟିମ୍‌ରେ ମଧ୍ୟ ବଡ଼ ପରିବର୍ତ୍ତନ କରିଛି। କିରନ୍ ପୋଲାର୍ଡଙ୍କୁ ମୁଖ୍ୟ କୋଚ୍ କରାଯାଇଥିବା ବେଳେ ରବିନ୍ ଉଥାପ୍ପା ବ୍ୟାଟିଂ କୋଚ୍, ମିଚେଲ୍ ମ୍ୟାକ୍ଲେନାଘାନ୍ ବୋଲିଂ କୋଚ୍ ଏବଂ ଟି. ଦିଲୀପ ଫିଲ୍ଡିଂ କୋଚ୍ ଦାୟିତ୍ୱ ପାଇଛନ୍ତି। ଧୱଲ କୁଲକର୍ଣ୍ଣିଙ୍କୁ ଡେଭଲପମେଣ୍ଟ ବୋଲିଂ କୋଚ୍ ଭାବେ ନିଯୁକ୍ତ କରାଯାଇଛି।

୨୦୨୬ IPLରେ ମୁମ୍ବାଇ ଇଣ୍ଡିଆନ୍ସ ନବମ ସ୍ଥାନରେ ରହିଥିଲା। ଦୀର୍ଘ ଛଅ ବର୍ଷର ଟାଇଟଲ୍ ମରୁଡ଼ି ଶେଷ କରିବା ଲକ୍ଷ୍ୟରେ ଦଳ ଏବେ ନୂଆ ରଣନୀତି ପ୍ରସ୍ତୁତ କରୁଛି। ରୋହିତ ପୁଣି ଅଧିନାୟକ ହେବେ କି ନାହିଁ, ସେନେଇ ଆନୁଷ୍ଠାନିକ ଘୋଷଣା ହେବା ପରେ ହିଁ ସ୍ଥିତି ସ୍ପଷ୍ଟ ହେବ।