ଆମେରିକା ଓ ଇରାନ ମଧ୍ୟରେ ଚାଲିଥିବା ତିବ୍ର ଉତ୍ତେଜନା ପଶ୍ଚିମ ଏସିଆର ସୁରକ୍ଷା ପରିସ୍ଥିତିକୁ ଆହୁରି ଜଟିଳ କରିଛି। ଏହି ପରିପ୍ରେକ୍ଷୀରେ ହର୍ମୁଜ୍ ପ୍ରଣାଳୀରେ ବାଣିଜ୍ୟିକ ଜାହାଜ ଉପରେ ହେଉଥିବା ଆକ୍ରମଣକୁ ଭାରତ କଡ଼ା ଭାବରେ ନିନ୍ଦା କରିଛି।

ଜାତିସଂଘ ସୁରକ୍ଷା ପରିଷଦରେ ପଶ୍ଚିମ ଏସିଆର ପରିସ୍ଥିତି ଉପରେ ଆୟୋଜିତ ଖୋଲା ଚର୍ଚ୍ଚାରେ ଭାରତର ସ୍ଥାୟୀ ପ୍ରତିନିଧି ରାଷ୍ଟ୍ରଦୂତ ପାର୍ବଥନେନୀ ହରିଶ କହିଛନ୍ତି ଯେ, ହର୍ମୁଜ୍ ପ୍ରଣାଳୀ ଭଳି ଆନ୍ତର୍ଜାତୀୟ ଜଳପଥରେ ମୁକ୍ତ ଓ ନିରାପଦ ନୌଚାଳନା ସୁନିଶ୍ଚିତ ହେବା ଆବଶ୍ୟକ।

ସେ କହିଛନ୍ତି ଯେ, ସାମ୍ପ୍ରତିକ ଆକ୍ରମଣରେ ଅନେକ ଭାରତୀୟ ନାଗରିକ ଆହତ ହୋଇଥିବା ବେଳେ ଜଣେ ଭାରତୀୟଙ୍କ ମୃତ୍ୟୁ ଘଟିଛି ଓ ଜଣେ ନିଖୋଜ ଅଛନ୍ତି। ଏଭଳି ଘଟଣା ଆନ୍ତର୍ଜାତୀୟ ବାଣିଜ୍ୟ ଓ ସମୁଦ୍ର ପଥର ସୁରକ୍ଷା ଉପରେ ସିଧାସଳଖ ପ୍ରଭାବ ପକାଉଛି।

ହରିଶ ଆହୁରି କହିଛନ୍ତି ଯେ, ପଶ୍ଚିମ ଏସିଆ ଭାରତ ପାଇଁ ଏକ ଅତ୍ୟନ୍ତ ଗୁରୁତ୍ୱପୂର୍ଣ୍ଣ କ୍ଷେତ୍ର। ଏହି ଅଞ୍ଚଳ ସହ ଭାରତର ବାର୍ଷିକ ଦ୍ୱିପାକ୍ଷିକ ବାଣିଜ୍ୟ ପ୍ରାୟ ୧୮୦ ବିଲିୟନ ଡଲାର ହୋଇଥିବା ବେଳେ, ଗଲ୍ଫ ଦେଶଗୁଡ଼ିକରୁ ୩୧ ବିଲିୟନ ଡଲାରରୁ ଅଧିକ ବିଦେଶୀ ପ୍ରତ୍ୟକ୍ଷ ନିବେଶ ଆସିଛି।

ସେ ଦୋହରାଇଛନ୍ତି ଯେ, ପ୍ରାୟ ୧ କୋଟି ଭାରତୀୟ ଗଲ୍ଫ ଦେଶଗୁଡ଼ିକରେ ବସବାସ ଓ କାର୍ଯ୍ୟ କରୁଥିବାରୁ ସେମାନଙ୍କ ସୁରକ୍ଷା ଭାରତ ପାଇଁ ସର୍ବାଧିକ ପ୍ରାଥମିକତା। ଭାରତ ଏହି ଅଞ୍ଚଳରେ ଶାନ୍ତି, ସୁରକ୍ଷା ଓ ସ୍ଥିରତା ପାଇଁ ଆଲୋଚନା ଓ କୂଟନୀତିକୁ ସମର୍ଥନ କରୁଛି।