ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ‘ମନ କି ବାତ’ ମାସିକ ରେଡିଓ କାର୍ଯ୍ୟକ୍ରମର ୧୩୯ତମ ଏପିସୋଡ୍‌ରେ ଦେଶର ସାଧାରଣ ଲୋକଙ୍କ ପରିଶ୍ରମ, ସାହସ, ସଂକଳ୍ପ ଓ ସେବା ମନୋଭାବକୁ ପ୍ରଶଂସା କରିଛନ୍ତି। ଦେଶବାସୀଙ୍କ ସହ ଏହି ଯାତ୍ରାକୁ ସେ ଏକ ତୀର୍ଥଯାତ୍ରା ସହ ତୁଳନା କରିଥିଲେ।

ଏହି ଅବସରରେ ପ୍ରଧାନମନ୍ତ୍ରୀ ପ୍ରାକୃତିକ ଓ ପାରମ୍ପରିକ କୃଷି ଉପରେ ଗୁରୁତ୍ୱ ଦେଇ ପଞ୍ଜାବର ‘ଖେତି ବିରାସତ ମିଶନ’ ଏବଂ ‘ନବ-ତ୍ରିଞ୍ଜନ’ ପଦକ୍ଷେପର ଉଦାହରଣ ଦେଇଥିଲେ। ଏହି ପଦକ୍ଷେପ ମାଧ୍ୟମରେ ମାଲୱା ଅଞ୍ଚଳରେ ରାସାୟନିକ ପଦାର୍ଥ ବିନା ଜୈବିକ କପା ଚାଷକୁ ପ୍ରୋତ୍ସାହନ ଦିଆଯାଉଛି। ପ୍ରାକୃତିକ ରଙ୍ଗଯୁକ୍ତ କପା ଚାଷ ଦ୍ୱାରା ପରବର୍ତ୍ତୀ ପ୍ରକ୍ରିୟାରେ ରାସାୟନିକ ରଙ୍ଗର ବ୍ୟବହାର କମାଇବା ସମ୍ଭବ ବୋଲି ସେ ଉଲ୍ଲେଖ କରିଥିଲେ।

ଜଳ ସଂରକ୍ଷଣ ଓ ପ୍ରାକୃତିକ ଜଳ ଉତ୍ସର ପୁନରୁଦ୍ଧାର ସମ୍ପର୍କରେ ଉତ୍ତରାଖଣ୍ଡର ହେୱାଲ ନଦୀର ଉଦାହରଣ ଦେଇଥିଲେ ପ୍ରଧାନମନ୍ତ୍ରୀ। ସ୍ଥାନୀୟ ଲୋକ ଓ ପ୍ରଶାସନର ମିଳିତ ପ୍ରୟାସରେ ନଦୀକୁ ନୂଆ ଜୀବନ ମିଳିଥିବା ସେ କହିଥିଲେ। ସମାଜର ସାମୂହିକ ପ୍ରୟାସ ଦ୍ୱାରା ବଡ଼ ପରିବର୍ତ୍ତନ ସମ୍ଭବ ବୋଲି ସେ ମତ ଦେଇଥିଲେ।

‘ଭୋକାଲ୍ ଫର୍ ଲୋକାଲ୍’ ଉପରେ ଜୋର ଦେଇ ମୋଦୀ ବିହାରର ମଖାନା, କର୍ଣ୍ଣାଟକର ହରଡ଼ ଡାଲି ଏବଂ ମହାରାଷ୍ଟ୍ରର ଆଦିବାସୀ ଉତ୍ପାଦର ଉଦାହରଣ ଦେଇଥିଲେ। ଭାରତୀୟ ସ୍ଥାନୀୟ ଉତ୍ପାଦକୁ ନୂଆ ବଜାର ମିଳୁଥିବା ଉଲ୍ଲେଖ କରି ସ୍ଥାନୀୟ କାରିଗରଙ୍କ ଦ୍ୱାରା ତିଆରି ସାମଗ୍ରୀ କିଣିବାକୁ ସେ ଲୋକଙ୍କୁ ଆହ୍ୱାନ କରିଥିଲେ।

ଖଦି ଓ ହସ୍ତଶିଳ୍ପକୁ ପ୍ରୋତ୍ସାହନ ଦେବାର ଆବଶ୍ୟକତା ଉପରେ ମଧ୍ୟ ସେ ଆଲୋକପାତ କରିଥିଲେ। ସ୍ଥାନୀୟ କାରିଗରଙ୍କ ଉତ୍ପାଦ ବ୍ୟବହାର କରିବା ଦ୍ୱାରା ଦେଶର ପାରମ୍ପରିକ କଳା ଓ ଜୀବିକାକୁ ସମର୍ଥନ ମିଳିବ ବୋଲି କହିଥିଲେ।

ଦୀପାବଳି ଓ ଛଠ୍ ପର୍ବକୁ ଦୃଷ୍ଟିରେ ରଖି ସ୍ୱଚ୍ଛତା ଉପରେ ମଧ୍ୟ ପ୍ରଧାନମନ୍ତ୍ରୀ ଗୁରୁତ୍ୱ ଦେଇଥିଲେ। ପର୍ବପର୍ବାଣୀ ସମୟରେ ନିଜ ଆଖପାଖର ପରିବେଶକୁ ସ୍ୱଚ୍ଛ ରଖିବା ସହ ସ୍ୱଚ୍ଛତା ଅଭିଯାନରେ ସମସ୍ତେ ଭାଗ ନେବା ଆବଶ୍ୟକ ବୋଲି ସେ କହିଥିଲେ।