କୋରାପୁଟ: କୋରାପୁଟ ଜିଲ୍ଲାର କୋଟିଆ ଅଞ୍ଚଳରେ ଆନ୍ଧ୍ରପ୍ରଦେଶ ପକ୍ଷରୁ ସୋଲାର ସାମଗ୍ରୀ ବଣ୍ଟନ ଉଦ୍ୟମକୁ ଓଡ଼ିଶା ପ୍ରଶାସନ ଓ ପୋଲିସ ରୋକିଛନ୍ତି। ଶନିବାର ପ୍ରାୟ ଅପରାହ୍ନ ୨ଟା ସମୟରେ ଆନ୍ଧ୍ରପ୍ରଦେଶର କିଛି କର୍ମଚାରୀ ଓ ପ୍ରତିନିଧି ଏକ ବଡ଼ ଟ୍ରକ୍‌ରେ ସୋଲାର ସାମଗ୍ରୀ ନେଇ କୋଟିଆର ଉପର ସେମ୍ବି ଗାଁରେ ପହଞ୍ଚିଥିଲେ।

ସ୍ଥାନୀୟ ଲୋକଙ୍କ ମଧ୍ୟରେ ମାଗଣାରେ ସୋଲାର ସାମଗ୍ରୀ ବଣ୍ଟନ କରିବାକୁ ସେମାନଙ୍କର ଯୋଜନା ଥିବା ଜଣାପଡ଼ିଥିଲା। ଘଟଣା ସମ୍ପର୍କରେ ସୂଚନା ପାଇବା ପରେ ଓଡ଼ିଶାର ରାଜସ୍ୱ ଅଧିକାରୀ, ସ୍ଥାନୀୟ ପ୍ରଶାସନ ଓ କୋଟିଆ ପୋଲିସର ଏକ ଟିମ୍ ତୁରନ୍ତ ଘଟଣାସ୍ଥଳରେ ପହଞ୍ଚିଥିଲା।

ଓଡ଼ିଶା ପ୍ରଶାସନ ଓ ପୋଲିସ ଏହି ସୋଲାର ସାମଗ୍ରୀ ବଣ୍ଟନକୁ ଦୃଢ଼ ଭାବେ ବିରୋଧ କରିବା ସହ ବିନା ଅନୁମତିରେ ଏଭଳି କାର୍ଯ୍ୟକଳାପ ନକରିବାକୁ ଆନ୍ଧ୍ର ପ୍ରତିନିଧିମାନଙ୍କୁ ସତର୍କ କରିଥିଲେ।

ସାମଗ୍ରୀ ନେଇ ଫେରିଲେ ଆନ୍ଧ୍ର ପ୍ରତିନିଧି

ଓଡ଼ିଶା ଅଧିକାରୀମାନଙ୍କ ହସ୍ତକ୍ଷେପ ଓ ଚେତାବନୀ ପରେ ଆନ୍ଧ୍ରପ୍ରଦେଶର ପ୍ରତିନିଧିମାନେ ସୋଲାର ସାମଗ୍ରୀ ଭର୍ତ୍ତି ଟ୍ରକ୍‌ ସହ ଗାଁରୁ ଫେରିଯାଇଥିଲେ। ଫଳରେ ପ୍ରସ୍ତାବିତ ସୋଲାର ସାମଗ୍ରୀ ବଣ୍ଟନ ହୋଇପାରିନଥିଲା।

କୋଟିଆ ଅଞ୍ଚଳକୁ ନେଇ ଓଡ଼ିଶା ଓ ଆନ୍ଧ୍ରପ୍ରଦେଶ ମଧ୍ୟରେ ଦୀର୍ଘଦିନ ଧରି ବିବାଦ ରହିଥିବା ବେଳେ ଏହି ଘଟଣା ପରେ ସୀମାନ୍ତ ଅଞ୍ଚଳରେ ପ୍ରଶାସନିକ ସତର୍କତା ଆହୁରି ବଢ଼ିଛି।

ଓଡ଼ିଶା ପ୍ରଶାସନ ପକ୍ଷରୁ କୋଟିଆ ଅଞ୍ଚଳରେ ଘଟୁଥିବା ବିଭିନ୍ନ କାର୍ଯ୍ୟକଳାପ ଉପରେ ନଜର ରଖାଯାଉଛି।