ଲକ୍ଷ୍ନୌ: ଦୀପାବଳିରେ ବାଣ ଫୁଟାଇବାକୁ ନେଇ ବାୟୁ ପ୍ରଦୂଷଣର ଚିନ୍ତା କାହିଁକି? ଏହା ନିଜେ ନିଜେ କମିଯିବ । ଏଭଳି ମତ ରଖି ଚର୍ଚ୍ଚାକୁ ଆସିଛନ୍ତି ଉତ୍ତରପ୍ରଦେଶର ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ।

ବୁଧବାର ଲକ୍ଷ୍ନୌରେ ଏକ କାର୍ଯ୍ୟକ୍ରମରେ ଯୋଗଦେଇ ଯୋଗୀ ଦୀପାବଳି ସମୟରେ ବାଣ ଫୁଟାଇବାକୁ ନେଇ ହେଉଥିବା ସମାଲୋଚନାର ଜବାବ ଦେଇଥିଲେ। ସେ କହିଥିଲେ ଯେ ଏବେ ଲୋକମାନେ ବିନା ଭୟରେ ଦୀପାବଳି ସମେତ ଅନ୍ୟାନ୍ୟ ପର୍ବପର୍ବାଣୀ ପାଳନ କରିପାରୁଛନ୍ତି। କିନ୍ତୁ କିଛି ଲୋକ ସାଧାରଣ ଲୋକଙ୍କ ପର୍ବ ପାଳନକୁ ନେଇ ଆପତ୍ତି ଉଠାଉଛନ୍ତି ।

ବାୟୁ ପ୍ରଦୂଷଣ ସମ୍ପର୍କରେ ମତ ରଖି ଯୋଗୀ କହିଥିଲେ, ଦୀପାବଳି ସମୟରେ ପ୍ରଦୂଷଣ ବଢ଼ିଥିବା କଥା ଅନେକ ଲୋକ କହିଥିଲେ। ମୁଁ କହିଥିଲି ଯେ ପ୍ରଦୂଷଣ ହୋଇଥିବ, କିନ୍ତୁ ଏହା ଶେଷ ମଧ୍ୟ ହୋଇଯିବ। ତେଣୁ ଏହାକୁ ନେଇ ଏତେ ଚିନ୍ତା କାହିଁକି?

ସେ ଆହୁରି କହିଥିଲେ ଯେ ଦୁର୍ନୀତି ଯୋଗୁଁ ସମଗ୍ର ବ୍ୟବସ୍ଥା ପ୍ରଦୂଷିତ ହୋଇଥିବା ବେଳେ ଗୋଟିଏ ଦିନର ପର୍ବ ପାଳନକୁ ନେଇ ସାଧାରଣ ଲୋକଙ୍କୁ ସମାଲୋଚନା କରାଯାଉଛି। ବାଣ ଫୁଟାଇବା ଦ୍ୱାରା ସୃଷ୍ଟି ହେଉଥିବା ପ୍ରଦୂଷଣ ସାମୟିକ ବୋଲି ସେ ଯୁକ୍ତି ରଖିଥିଲେ ।

ଏହା ସହିତ ଅଯୋଧ୍ୟାରେ ନିଜେ ଦୀପାବଳି ଉତ୍ସବରେ ସାମିଲ ହୋଇଥିବା କଥା ମଧ୍ୟ ଯୋଗୀ କହିଥିଲେ। ବହୁ ସଂଖ୍ୟାରେ ଲୋକ ବାଣ ଫୁଟାଇ ଦୀପାବଳି ପାଳନ କରିଥିବାରୁ ସେ ଖୁସି ବୋଲି ପ୍ରକାଶ କରିଥିଲେ ।

ଉତ୍ତରପ୍ରଦେଶ ସରକାରଙ୍କ ଆଭିମୁଖ୍ୟକୁ ପୁନର୍ବାର ଦୋହରାଇ ଯୋଗୀ କହିଥିଲେ ଯେ ପର୍ବପର୍ବାଣୀ ପାଳନରେ ଅଯଥା ବାଧା ସୃଷ୍ଟି କରାଯିବା ଉଚିତ ନୁହେଁ ।

ତେବେ ଦୀପାବଳି ସମୟରେ ବାଣ ଫୁଟାଇବା ଦ୍ୱାରା ବାୟୁର ଗୁଣବତ୍ତା ଉପରେ ପ୍ରଭାବ ପଡ଼ିବା ଏକ ପରିବେଶଗତ ଚିନ୍ତାର ବିଷୟ। ଏହାକୁ ନେଇ ଦେଶର ବିଭିନ୍ନ ସ୍ଥାନରେ ପ୍ରଦୂଷଣ ନିୟନ୍ତ୍ରଣ ଓ ପର୍ବ ପାଳନ ମଧ୍ୟରେ ସନ୍ତୁଳନ ରଖିବା ନେଇ ଆଲୋଚନା ଜାରି ରହିଛି ।