Joint CSIR-UGC NET December 2026 ପରୀକ୍ଷାକୁ ନେଇ ଆଶାୟୀ ପ୍ରାର୍ଥୀଙ୍କ ପାଇଁ ବଡ଼ ଖବର। ପରୀକ୍ଷା ପାଇଁ ମୋଟ୍ ୨.୩୬ ଲକ୍ଷରୁ ଅଧିକ ପଞ୍ଜୀକରଣ ହୋଇଥିବା ବେଳେ ଆବେଦନର ଶେଷ ତାରିଖକୁ ନଭେମ୍ବର ୯ ପର୍ଯ୍ୟନ୍ତ ବଢ଼ାଇଛି ନ୍ୟାସନାଲ ଟେଷ୍ଟିଂ ଏଜେନ୍ସି (NTA)। ଏନେଇ ନଭେମ୍ବର ୬ ତାରିଖରେ NTA ପକ୍ଷରୁ ନୂଆ ତଥ୍ୟ ଜାରି କରାଯାଇଛି।

୨.୩୬ ଲକ୍ଷରୁ ଅଧିକ ପଞ୍ଜୀକରଣ

NTAର ସଦ୍ୟତମ ତଥ୍ୟ ଅନୁସାରେ, ଏହି ପରୀକ୍ଷା ପାଇଁ ମୋଟ୍ ୨,୩୬,୬୫୬ ଜଣ ପ୍ରାର୍ଥୀ ପଞ୍ଜୀକରଣ କରିଛନ୍ତି। ସେମାନଙ୍କ ମଧ୍ୟରୁ ୨,୦୩,୯୭୩ ଜଣ ଫଟୋ ଓ ଅନ୍ୟାନ୍ୟ ଆବଶ୍ୟକୀୟ ଛବି ଅପଲୋଡ୍ କରିଛନ୍ତି। ୨,୦୨,୭୬୮ ଜଣ ଆବେଦନ ଫର୍ମ ଦାଖଲ କରିଥିବା ବେଳେ ୧,୯୮,୪୭୯ ଜଣ ପରୀକ୍ଷା ଫି’ ଜମା କରିଛନ୍ତି। ସେହିପରି ୧,୯୫,୦୩୪ ଜଣ କନଫର୍ମେସନ୍ ପେଜ୍ ଡାଉନଲୋଡ୍ କରିଛନ୍ତି।

ଏହି ତଥ୍ୟ ଅନୁସାରେ, ୩୮,୧୭୭ ଜଣ ପଞ୍ଜୀକରଣ କରିଥିଲେ ମଧ୍ୟ ଏପର୍ଯ୍ୟନ୍ତ ପରୀକ୍ଷା ଫି’ ଦାଖଲ କରିନାହାନ୍ତି। ତେବେ ଫି’ ଦେବା ପରେ ବ୍ୟାଙ୍କ ମେଳକ ପ୍ରକ୍ରିୟା ଅନୁସାରେ ଏହି ସଂଖ୍ୟାରେ ପରିବର୍ତ୍ତନ ହୋଇପାରେ।

ନଭେମ୍ବର ୯ ଯାଏଁ ବଢ଼ିଲା ଆବେଦନ ଅବଧି

ପୂର୍ବରୁ ଆବେଦନର ଶେଷ ତାରିଖ ନଭେମ୍ବର ୫ ରହିଥିଲା। ହେଲେ ପ୍ରାର୍ଥୀଙ୍କ ସୁବିଧା ପାଇଁ NTA ଏହାକୁ ଆଉ ୪ ଦିନ ବଢ଼ାଇ ନଭେମ୍ବର ୯ କରିଛି। ଏହି ତାରିଖ ରାତି ୧୧ଟା ୫୦ ମିନିଟ୍ ପର୍ଯ୍ୟନ୍ତ ଅନଲାଇନ୍ ଆବେଦନ ଏବଂ ପରୀକ୍ଷା ଫି’ ଦାଖଲ କରିହେବ। ଏହି ସମୟସୀମା ମଧ୍ୟରେ କୌଣସି ବିଳମ୍ବ ଶୁଳ୍କ ଦେବାକୁ ପଡ଼ିବ ନାହିଁ।

କେମିତି କରିବେ ଆବେଦନ?

୧. ପ୍ରଥମେ ଅଫିସିଆଲ୍ ୱେବସାଇଟ୍ https://csirnet.nta.nic.in କୁ ଯାଆନ୍ତୁ।

୨. Joint CSIR-UGC NET December 2026 ଆବେଦନ ଲିଙ୍କ୍ ଉପରେ କ୍ଲିକ୍ କରନ୍ତୁ।

୩. ଆବଶ୍ୟକୀୟ ତଥ୍ୟ ଦେଇ ନୂଆ ପଞ୍ଜୀକରଣ କରନ୍ତୁ।

୪. ମିଳିଥିବା ଆପ୍ଲିକେସନ୍ ନମ୍ବର ଓ ପାସୱାର୍ଡ ଦ୍ୱାରା ଲଗ୍‌ଇନ୍ କରନ୍ତୁ।

୫. ବ୍ୟକ୍ତିଗତ ଓ ଶିକ୍ଷାଗତ ତଥ୍ୟ ସହ ଆବଶ୍ୟକୀୟ ଡକ୍ୟୁମେଣ୍ଟ ଅପଲୋଡ୍ କରନ୍ତୁ।

୬. ନିଜ ବର୍ଗ ଅନୁସାରେ ପରୀକ୍ଷା ଫି’ ଦାଖଲ କରନ୍ତୁ।

୭. ଫର୍ମ ସବମିଟ୍ କରିବା ପରେ କନଫର୍ମେସନ୍ ପେଜ୍ ଡାଉନଲୋଡ୍ କରି ରଖନ୍ତୁ।

କାହିଁକି ହୁଏ CSIR-UGC NET ପରୀକ୍ଷା?

Joint CSIR-UGC NET ପରୀକ୍ଷା ମାଧ୍ୟମରେ ପ୍ରାର୍ଥୀଙ୍କୁ ଜୁନିୟର ରିସର୍ଚ୍ଚ ଫେଲୋସିପ୍ (JRF), ଆସିଷ୍ଟାଣ୍ଟ ପ୍ରଫେସର ପଦବୀ ପାଇଁ ଯୋଗ୍ୟତା ଏବଂ ପିଏଚ୍‌ଡିରେ ନାମଲେଖା ପାଇଁ ଯୋଗ୍ୟତା ନିର୍ଦ୍ଧାରଣ କରାଯାଏ।

ତେଣୁ ଯେଉଁ ପ୍ରାର୍ଥୀମାନେ ଏପର୍ଯ୍ୟନ୍ତ ନିଜର ଆବେଦନ ଓ ଫି’ ଦାଖଲ ପ୍ରକ୍ରିୟା ଶେଷ କରିନାହାନ୍ତି, ସେମାନେ ନଭେମ୍ବର ୯ ତାରିଖ ପୂର୍ବରୁ ସମସ୍ତ ପ୍ରକ୍ରିୟା ସମାପ୍ତ କରିବାକୁ NTA ପରାମର୍ଶ ଦେଇଛି।