ଇସ୍ରାଏଲ୍‌ର ରାଜନୀତିରେ ବଡ଼ ହଲଚଲ୍। ଦୀର୍ଘଦିନ ଧରି କ୍ଷମତାରେ ଥିବା ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁଙ୍କୁ ମିଳିଛି ଝଟକା। ଦେଶରେ ନୂଆ ସରକାର ଗଠନ ପାଇଁ ଚାଲିଥିବା ରାଜନୈତିକ ଅଙ୍କକଷାରେ ପୂର୍ବତନ ସେନାମୁଖ୍ୟ ତଥା ବିରୋଧୀ ନେତା ଗାଡି ଆଇଜେନକୋଟ୍ ଆଗରେ ରହିଛନ୍ତି। ଗୁରୁବାର ଶେଷ ହୋଇଥିବା ରାଜନୈତିକ ଦଳଗୁଡ଼ିକର ଆଲୋଚନା ପରେ ୬୭ ଜଣ ସାଂସଦ ଆଇଜେନକୋଟ୍‌ଙ୍କୁ ସମର୍ଥନ ଜଣାଇଥିବା ବେଳେ ନେତାନ୍ୟାହୁଙ୍କ ସପକ୍ଷରେ ରହିଛନ୍ତି ୪୬ ଜଣ ସାଂସଦ।

ଇସ୍ରାଏଲ୍‌ର ୧୨୦ ଆସନ ବିଶିଷ୍ଟ ସଂସଦ ‘କ୍ନେସେଟ୍’ରେ ସରକାର ଗଠନ ପାଇଁ ୬୧ ଆସନର ସମର୍ଥନ ଆବଶ୍ୟକ। ଅକ୍ଟୋବର ୨୭ରେ ହୋଇଥିବା ନିର୍ବାଚନରେ କୌଣସି ଦଳ କିମ୍ବା ମେଣ୍ଟ ସ୍ପଷ୍ଟ ବହୁମତ ପାଇନଥିଲା। ନେତାନ୍ୟାହୁଙ୍କ ଲିକୁଡ୍ ପାର୍ଟି ୨୭ଟି ଆସନ ପାଇ ସବୁଠୁ ବଡ଼ ଏକକ ଦଳ ହୋଇଥିଲେ ମଧ୍ୟ ତାଙ୍କ ମେଣ୍ଟର ମୋଟ ଆସନ ସଂଖ୍ୟା ୫୩ରେ ସୀମିତ ରହିଛି। ଅନ୍ୟପଟେ ଆଇଜେନକୋଟ୍‌ଙ୍କ ବିରୋଧୀ ମେଣ୍ଟର ଦଳଗୁଡ଼ିକ ୪୮ଟି ଆସନ ପାଇଛନ୍ତି। ଆରବ ସମର୍ଥିତ ଦୁଇଟି ଦଳ ୧୯ଟି ଆସନ ହାସଲ କରିଛନ୍ତି।

ଆଇଜେନକୋଟ୍‌ଙ୍କୁ ମିଳିଥିବା ସମର୍ଥନ ପଛରେ ଆରବ ସମର୍ଥିତ ଦଳଗୁଡ଼ିକର ଭୂମିକା ଗୁରୁତ୍ୱପୂର୍ଣ୍ଣ। ରା'ଅମ୍ ଦଳର ୮ ଜଣ ଏବଂ ଜଏଣ୍ଟ ଲିଷ୍ଟର ୧୧ ଜଣ ସାଂସଦ ତାଙ୍କ ନାମକୁ ସମର୍ଥନ କରିଛନ୍ତି। ତେବେ ଏହି ଦଳଗୁଡ଼ିକ ସରକାରରେ ସାମିଲ ହେବେ କି ନାହିଁ, ତାହା ଏବେ ବି ସ୍ପଷ୍ଟ ହୋଇନାହିଁ। ବିରୋଧୀ ଶିବିର ମଧ୍ୟରେ ଏହି ପ୍ରସଙ୍ଗକୁ ନେଇ ମତଭେଦ ରହିଛି।

ଅନ୍ୟପଟେ ନେତାନ୍ୟାହୁଙ୍କ ପୁରୁଣା ସହଯୋଗୀ ଅଲ୍ଟ୍ରା-ଅର୍ଥୋଡକ୍ସ ଦଳ ‘ୟୁନାଇଟେଡ୍ ତୋରା ଜୁଡାଇଜମ୍’ କୌଣସି ନେତାଙ୍କୁ ସରକାର ଗଠନ ପାଇଁ ସୁପାରିଶ ନକରିବା ନେତାନ୍ୟାହୁଙ୍କ ପାଇଁ ଆଉ ଏକ ଝଟକା ବୋଲି ଦେଖାଯାଉଛି। ଏହି ଦଳର ନିଷ୍ପତ୍ତି ତାଙ୍କ ମେଣ୍ଟର ସ୍ଥିତିକୁ ଆହୁରି ଦୁର୍ବଳ କରିଛି।

ଏବେ ସମସ୍ତଙ୍କ ନଜର ଇସ୍ରାଏଲ୍‌ର ରାଷ୍ଟ୍ରପତି ଆଇଜାକ୍ ହର୍ଜୋଗ୍‌ଙ୍କ ଉପରେ। ସେ ଆସନ୍ତା ରବିବାର ସରକାର ଗଠନ ପାଇଁ କାହାକୁ ଦାୟିତ୍ୱ ଦେବେ, ତାହା ଘୋଷଣା କରିବେ। ଆଇଜେନକୋଟ୍‌ଙ୍କୁ ଅଧିକ ସାଂସଦଙ୍କ ସମର୍ଥନ ମିଳିଥିଲେ ମଧ୍ୟ ଦୁଇ ଶିବିର ମଧ୍ୟରେ ଥିବା ମତଭେଦ ଓ ପରସ୍ପର ବିରୋଧୀ ସର୍ତ୍ତ ଯୋଗୁଁ କିଏ ସଫଳତାର ସହ ସରକାର ଗଠନ କରିପାରିବ, ତାହା ନେଇ ରାଷ୍ଟ୍ରପତି ଦ୍ୱନ୍ଦ୍ୱରେ ଅଛନ୍ତି।

ରାଷ୍ଟ୍ରପତିଙ୍କଠାରୁ ଦାୟିତ୍ୱ ମିଳିବା ପରେ ମନୋନୀତ ନେତାଙ୍କୁ ସରକାର ଗଠନ ପାଇଁ ୨୮ ଦିନ ସମୟ ମିଳିବ। ଆବଶ୍ୟକ ହେଲେ ଆଉ ୧୪ ଦିନ ବଢ଼ାଯାଇପାରିବ। ଏହି ସମୟ ମଧ୍ୟରେ ଯଦି କୌଣସି ନେତା ବହୁମତ ଯୋଗାଡ଼ କରିବାରେ ବିଫଳ ହୁଅନ୍ତି, ତେବେ ଇସ୍ରାଏଲ୍‌ରେ ପୁଣି ନିର୍ବାଚନର ସମ୍ଭାବନା ରହିଛି। ନୂଆ ସରକାର ଗଠନ ନହେବା ପର୍ଯ୍ୟନ୍ତ ନେତାନ୍ୟାହୁ କାମଚଳା ପ୍ରଧାନମନ୍ତ୍ରୀ ଭାବେ ଦାୟିତ୍ୱରେ ରହିବେ।

ସେହିପରି ଆଇଜେନକୋଟ୍‌ଙ୍କୁ ମିଳିଥିବା ୬୭ ସାଂସଦଙ୍କ ସମର୍ଥନ ତାଙ୍କୁ ରାଜନୈତିକ ଭାବେ ଆଗରେ ରଖିଥିଲେ ମଧ୍ୟ ଏହା ସରକାର ଗଠନର ନିଶ୍ଚିତତା ନୁହେଁ। ରବିବାର ରାଷ୍ଟ୍ରପତିଙ୍କ ଘୋଷଣା ପରେ ଇସ୍ରାଏଲ୍‌ରେ କ୍ଷମତା ପରିବର୍ତ୍ତନ ହେବ କି ନେତାନ୍ୟାହୁ ପୁଣି ସରକାର ଗଠନର ସୁଯୋଗ ପାଇବେ, ତାହା ସ୍ପଷ୍ଟ ହେବ।