ଓଡ଼ିଆଙ୍କ ପାଇଁ ନଡ଼ିଆ କେବଳ ଏକ ଫଳ ନୁହେଁ, ଏହା ଓଡ଼ିଆ ସଂସ୍କୃତି ଓ ପରମ୍ପରାର ଏକ ଅବିଚ୍ଛେଦ୍ୟ ଅଂଶ। ବିବାହ, ପୂଜା, ପର୍ବପର୍ବାଣୀଠାରୁ ଆରମ୍ଭ କରି ଦୈନନ୍ଦିନ ଖାଦ୍ୟ ଓ ପାରମ୍ପରିକ ଚିକିତ୍ସା ପର୍ଯ୍ୟନ୍ତ ନଡ଼ିଆର ବ୍ୟବହାର ରହିଛି। ଅନେକ ପରିବାରଙ୍କ ପାଇଁ ଘର ବାଡ଼ିରେ ଥିବା ନଡ଼ିଆ ଗଛ ଆୟର ମଧ୍ୟ ଏକ ମାଧ୍ୟମ।
ତେବେ ବିଶ୍ୱ ନଡ଼ିଆ ଦିବସ ଅବସରରେ ଓଡ଼ିଶାରେ ନଡ଼ିଆ ଗଛର ସଂଖ୍ୟା ଧୀରେଧୀରେ କମିବା ଏବଂ ବାହାର ରାଜ୍ୟରୁ ନଡ଼ିଆ ଆମଦାନୀ ବଢ଼ିବା ଚିନ୍ତାର ବିଷୟ ପାଲଟିଛି।
ନଡ଼ିଆ ଗଛର ପ୍ରାୟ ପ୍ରତ୍ୟେକ ଅଂଶର ବ୍ୟବହାର ରହିଛି। ନଡ଼ିଆ ପାଣି, ଫଳ, ପତ୍ର ଓ ତନ୍ତୁ ଆଦି ସ୍ଥାନୀୟ ଅର୍ଥନୀତି ସହ ଜଡ଼ିତ। ୧୦ରୁ ୧୫ଟି ନଡ଼ିଆ ଗଛ ଥିବା ପରିବାର ମଧ୍ୟ ଏଥିରୁ ନିଜ ଘରୋଇ ଆବଶ୍ୟକତା ସହ କିଛି ଆୟ କରିପାରନ୍ତି।
ନଡ଼ିଆ ଚାଷୀ ପ୍ରମୋଦ ପରିଡ଼ା କହିଛନ୍ତି ଯେ, ନଡ଼ିଆ ଗଛ ଲଗାଇ ଏହାର ଯତ୍ନ ନେଲେ ପ୍ରାୟ ପ୍ରତି ତିନି ମାସରେ ଫଳ ମିଳିଥାଏ। ଫଳ ବିକ୍ରି କରି ଚାଷୀମାନେ ଆୟ କରିବା ସହ ଗଛର ଅନ୍ୟ ଅଂଶ ମଧ୍ୟ ବ୍ୟବହାର କରିପାରନ୍ତି।
ଉପକୂଳ ଓଡ଼ିଶାର ପୁରୀ, ଖୋର୍ଦ୍ଧା, ଗଞ୍ଜାମ, କଟକ, ବାଲେଶ୍ୱର ଓ ଜଗତସିଂହପୁର ଜିଲ୍ଲାରେ ନଡ଼ିଆ ଚାଷ ଅଧିକ ଦେଖାଯାଏ।
ବାରମ୍ବାର ବାତ୍ୟା ଯୋଗୁଁ ଉପକୂଳ ଅଞ୍ଚଳରେ ବହୁ ନଡ଼ିଆ ଗଛ ନଷ୍ଟ ହୋଇଛି। ଏହା ଚାଷୀଙ୍କୁ ନଡ଼ିଆ ଚାଷରୁ ଦୂରେଇବାକୁ ବାଧ୍ୟ କରିଛି।
ନଡ଼ିଆ ବ୍ୟବସାୟୀ କାଳୁଚରଣ ବେହେରାଙ୍କ କହିବା ଅନୁସାରେ, ଓଡ଼ିଶାର ଧେନକାନାଳ, ବନରପାଳ, ତାଳଚେର ଓ ଖୋର୍ଦ୍ଧା ଭଳି ଅଞ୍ଚଳକୁ ନଡ଼ିଆ ପଠାଯାଏ। ଏବେ ତାମିଲନାଡୁ ଓ କେରଳରୁ ମଧ୍ୟ ବହୁ ପରିମାଣରେ ନଡ଼ିଆ ଓଡ଼ିଶାକୁ ଆସୁଛି।
କୋକୋଟର ଫାର୍ମ ଓ କଳ୍ପବୃକ୍ଷ ଫାଉଣ୍ଡେସନର ପ୍ରତିଷ୍ଠାତା ସତ୍ୟ ତପସଙ୍କ ଅନୁସାରେ, ସୁପର ସାଇକ୍ଲୋନ୍ ଓ ବାତ୍ୟା ‘ଫନି’ ପରେ ଉପକୂଳ ଅଞ୍ଚଳରେ ପ୍ରାୟ ୭ ଲକ୍ଷ ନଡ଼ିଆ ଗଛ ନଷ୍ଟ ହୋଇଥିଲା। ଏହାର ପ୍ରଭାବ ନଡ଼ିଆ ଚାଷୀଙ୍କ ଜୀବିକା ଉପରେ ମଧ୍ୟ ପଡ଼ିଛି।
ତାଙ୍କ କହିବା ଅନୁସାରେ, ନଡ଼ିଆ ଉତ୍ପାଦନରେ ଓଡ଼ିଶା ପୂର୍ବରୁ ପଞ୍ଚମ ସ୍ଥାନରେ ଥିବାବେଳେ ଏବେ ଷଷ୍ଠ ସ୍ଥାନକୁ ଖସିଛି। ତାଙ୍କ ମତରେ, ଉତ୍ପାଦନ ବିଚାର କଲେ ଗୁଜରାଟ ମଧ୍ୟ ଓଡ଼ିଶାଠାରୁ ଆଗକୁ ଯାଇଛି।
ନଡ଼ିଆ ଓଡ଼ିଶାର ସଂସ୍କୃତି, ଗ୍ରାମୀଣ ଅର୍ଥନୀତି ଓ ଚାଷୀଙ୍କ ଜୀବନ ସହ ଗଭୀର ଭାବେ ଜଡ଼ିତ। ତେଣୁ ନୂଆ ନଡ଼ିଆ ଚାରା ରୋପଣ, ବାତ୍ୟାଜନିତ କ୍ଷତିରୁ ସୁରକ୍ଷା ଓ ଚାଷୀଙ୍କ ପାଇଁ ଉନ୍ନତ ବଜାର ବ୍ୟବସ୍ଥା ଦିଗରେ ଅଧିକ ସରକାରୀ ସହାୟତାର ଆବଶ୍ୟକତା ରହିଛି।
ପ୍ରାୟ ୫ ବର୍ଷ ଧରି ଚାଲିଥିବା IDBI ବ୍ୟାଙ୍କର ଘରୋଇକରଣ ପ୍...
ଲଗାଣ ବର୍ଷା ପରେ ବିହାରରେ ବନ୍ୟା ପରିସ୍ଥିତି ଆହୁରି ଗମ୍ଭୀ...
ପିତାମାତାଙ୍କ ସମ୍ପତ୍ତିକୁ ନେଇ ଚାଲିଥିବା ଏକ ବିବାଦରେ ସୁପ...
ଓଡ଼ିଶା ସମେତ ୫ଟି ରାଜ୍ୟର ରେଳ ଯୋଗାଯୋଗକୁ ଆହୁରି ମଜବୁତ କ...
ପାକିସ୍ତାନ କ୍ରିକେଟ୍‌ ଟିମ୍‌ର ଖରାପ ପ୍ରଦର୍ଶନ...
ଉତ୍ତରପ୍ରଦେଶରେ ଶ୍ରମିକ ଓ ଅନ୍ୟାନ୍ୟ ଦୁର୍ବଳ ପରିବାରର ପିଲ...
କନିଷ୍ଠ ଏସିଆ କପ୍‌ ହକିରେ ଭାରତୀୟ ଯୁବ ଦଳର ଦମଦାର ପ...
ଭାରତୀୟ କ୍ରିକେଟ୍‌ ଟିମ୍‌ ସହ ଯୋଡ଼ିହୋଇଛି ୩ଟି...
ଅଷ୍ଟ୍ରେଲିଆ ଏ’ ବିପକ୍ଷରେ ଆସନ୍ତା ଘରୋଇ ସିରିଜ୍ ପା...
