କନିଷ୍ଠ ଏସିଆ କପ୍ ହକିରେ ଭାରତୀୟ ଯୁବ ଦଳର ଦମଦାର ପ୍ରଦର୍ଶନ ଜାରି ରହିଛି। ପୁଲ୍-ଏ’ର ଶେଷ ମ୍ୟାଚ୍ରେ ଚାଇନିଜ୍ ତାଇପେକୁ ୧୫-୦ ଗୋଲ୍ରେ ହରାଇ ଭାରତ ଶୀର୍ଷ ଦଳ ଭାବେ ସେମିଫାଇନାଲରେ ପ୍ରବେଶ କରିଛି।
ଏହି ମ୍ୟାଚ୍ରେ ଓଡ଼ିଆ ପୁଅ ତଥା ଭାରତୀୟ ଦଳର ଅଧିନାୟକ ଅନମୋଲ ଏକ୍କାଙ୍କ ଦମଦାର ପ୍ରଦର୍ଶନ ସବୁଠାରୁ ଅଧିକ ଚର୍ଚ୍ଚାରେ ରହିଛି। ଅନମୋଲ ଏକାକୀ ୬ଟି ଗୋଲ୍ ସ୍କୋର କରିଥିବା ବେଳେ ଅନ୍ୟ ଓଡ଼ିଆ ଖେଳାଳି ଆର୍ଯ୍ୟନ ଖେସ୍ ହ୍ୟାଟ୍ରିକ୍ ହାସଲ କରିଛନ୍ତି।
ମ୍ୟାଚ୍ର ପ୍ରଥମ କ୍ୱାର୍ଟରରେ ଭାରତୀୟ ଖେଳାଳିମାନେ ଅନେକ ସୁଯୋଗ ପାଇଥିଲେ ମଧ୍ୟ ତାହାକୁ ଗୋଲ୍ରେ ପରିଣତ କରିପାରିନଥିଲେ। ଫଳରେ ପ୍ରଥମ କ୍ୱାର୍ଟର ଗୋଲ୍ଶୂନ୍ୟ ରହିଥିଲା।
ତେବେ ବିରତି ସମୟରେ ପ୍ରଶିକ୍ଷକ ଫ୍ରେଡେରିକ୍ ସୋୟେଜଙ୍କ ରଣନୀତି ଭାରତ ପାଇଁ ଫଳପ୍ରଦ ହୋଇଥିଲା। ଦ୍ୱିତୀୟ କ୍ୱାର୍ଟରରେ ଭାରତୀୟ ଦଳ ଆକ୍ରମଣକୁ ତୀବ୍ର କରି ୬ଟି ଗୋଲ୍ ସ୍କୋର କରିଥିଲା।
୧୭ତମ ମିନିଟ୍ରେ ଆର୍ଯ୍ୟନ ଖେସ୍ ପ୍ରଥମ ଫିଲ୍ଡ ଗୋଲ୍ କରି ଭାରତର ଖାତା ଖୋଲିଥିଲେ। ଏହାପରେ ପ୍ରଭଦୀପ ସିଂହ, ଗୁରସେବକ ସିଂହ, ଅଧିନାୟକ ଅନମୋଲ, ଅର୍ଜୁନ ସନ୍ତୋଷ ହାର୍ଗୁଡେ ଏବଂ ପୁଣି ଅନମୋଲଙ୍କ ଗୋଲ୍ ବଳରେ ଭାରତ ଦ୍ୱିତୀୟ କ୍ୱାର୍ଟର ଶେଷ ସୁଦ୍ଧା ୬-୦ରେ ଆଗୁଆ ରହିଥିଲା।
ତୃତୀୟ କ୍ୱାର୍ଟରରେ ମଧ୍ୟ ଭାରତର ଆକ୍ରମଣ ଜାରି ରହିଥିଲା। ଅନମୋଲଙ୍କ ହ୍ୟାଟ୍ରିକ୍ ସହ ଅଜିତ ଯାଦବଙ୍କ ଗୋଲ୍ ବଳରେ ଭାରତ ୧୦-୦ରେ ପହଞ୍ଚିଥିଲା।
ଶେଷ କ୍ୱାର୍ଟରରେ ମଧ୍ୟ ଭାରତୀୟ ଖେଳାଳିମାନେ ଚାଇନିଜ୍ ତାଇପେର ରକ୍ଷଣଭାଗ ଉପରେ ଲଗାତାର ଚାପ ସୃଷ୍ଟି କରିଥିଲେ। ହରପାଲ ଦୁଇଟି ଗୋଲ୍ ସ୍କୋର କରିଥିବା ବେଳେ ୫୧ତମ ମିନିଟ୍ରେ ଅନମୋଲ ନିଜର ଷଷ୍ଠ ଗୋଲ୍ କରିଥିଲେ।
ଅନ୍ୟପଟେ ଆର୍ଯ୍ୟନ ଖେସ୍ ଆଉ ଦୁଇଟି ଗୋଲ୍ କରି ନିଜର ହ୍ୟାଟ୍ରିକ୍ ପୂରଣ କରିଥିଲେ। ଶେଷରେ ଭାରତ ୧୫-୦ର ବଡ଼ ବ୍ୟବଧାନରେ ବିଜୟୀ ହୋଇ ସେମିଫାଇନାଲ୍ ଟିକେଟ୍ ନିଶ୍ଚିତ କରିଥିଲା।
ମ୍ୟାଚ୍ର ଶ୍ରେଷ୍ଠ ଖେଳାଳି ଭାବେ ମନମିତ ସିଂହଙ୍କୁ ପୁରସ୍କୃତ କରାଯାଇଥିଲା।
ଆମେରିକାର ମଧ୍ୟାବଧି ନିର୍ବାଚନରେ ଡେମୋକ୍ରାଟିକ୍ ପାର୍ଟିର...
ଆମେରିକାର ମଧ୍ୟବର୍ତ୍ତୀ ନିର୍ବାଚନ ଫଳାଫଳ ପରେ ଭାରତୀୟ ସେୟ...
ଧନତେରସ ଆସିଲେ ସୁନା କିଣିବାର ପରମ୍ପରା ଭାରତୀୟ ପରିବାରରେ...
‘ଅରାଜକତା ହଟାଅ, ଗଣତନ୍ତ୍ର ବଞ୍ଚାଅ’ ସ୍ଲୋଗା...
ଦେଶରେ ଗବେଷଣା ଓ ନୂତନ ଉଦ୍ଭାବନକୁ ଉତ୍ସାହିତ କରିବା ଲକ୍ଷ୍...
ମହଙ୍ଗା ବିମାନ ଇନ୍ଧନ ଏବେ ଭାରତୀୟ ବିମାନ ଚଳାଚଳ କ୍ଷେତ୍ର...
ଆମେରିକାର ରାଜନୀତିରେ ଡୋନାଲ୍ଡ ଟ୍ରମ୍ପଙ୍କ ପାଇଁ ମଧ୍ୟବର୍ତ...
ଗବେଷଣା ଓ ଉଚ୍ଚଶିକ୍ଷା କ୍ଷେତ୍ରରେ ନୂଆ ସହଯୋଗ ଉଚ୍ଚଶିକ...
